Astananyŋ 20 jyldyǧyna arnalǧan «Astanadan aq tılek» atty arnaiy baǧdarlama aiasynda elordanyŋ şyǧarmaşylyq ūjymdary Şyǧys Qazaqstanǧa attanady.
Eŋ aldymen astanalyq önerpazdar 17-18 şılde künderı Semei qalasynda öner körsetedı. Astana künderı «Abaidyŋ qara sözderı jäne änderı» konsertımen bastalady. Oǧan Astana qalasynyŋ Memlekettık akademiialyq filarmoniiasynyŋ Qazaq orkestrı, klassikalyq, estradalyq jäne halyq vokalynyŋ solisterı qatysady.
Sportsüier qauym balalar-jasöspırımder sport mektebınde dziudodan Astana men Semei qalalarynyŋ komandalarynyŋ arasyndaǧy joldastyq kezdesudı tamaşalai alady.
Nevzorovtar atyndaǧy Şyǧys Qazaqstan oblystyq beineleu önerı muzeiınde otandyq 50 suretşınıŋ türlı janrlarda salynǧan bıregei 100 kartinany köruge bolady. Täuelsızdık saraiy daiyndaǧan «Aq tılekpen, Astana!» körmesı önersüier qauymnyŋ ystyq yqylasyna bölenıp keledı.
19-20 şılde künderı elordalyq ärtıster Öskemen qalasyna at basyn tıreidı. Mūnda «Ertıs» konsert zalynda «Astanadan aq tılek» gala-konsertı köpşılık nazaryna ūsynylady.
Jergılıktı mūz aidyny arenasynda şaibaly hokkeiden «Astana-2009» jäne «Torpedo-
2009» komandalary arasynda joldastyq kezdesu ūiymdastyrylady.
