Biyl «Mektepke jol» qaiyrymdylyq aksiiasy üşın jergılıktı biudjetten 177 million 940 myŋ teŋge kölemınde qarajat bölınıp otyr. Būl turaly keşe «Bäiterek» halyqaralyq media-ortalyǧynda ötken baspasöz-mäslihatynda Astana qalasy Bılım basqarmasy basşysynyŋ orynbasary Qasymhan Senǧaziev mälımdedı.
Barşaǧa aian, «Mektepke jol» jalpyrespublikalyq qaiyrymdylyq aksiiasy Bılım jäne ǧylym ministrlıgınıŋ bastamasymen jetı jyldan berı ūiymdastyrylyp keledı. Äleumettık baǧyttaǧy şara biyl «Balaǧa meiırım syila!» ūranymen ötkızılıp otyr.
Bılım basqarmasy ökılınıŋ aituynşa, osy jylǧy ıs-şaralar Qazaqstan Respublikasy BŪŪ Bala qūqyqtary turaly konvensiiany ratifikasiialauynyŋ 20 jyldyǧyna arnalǧan.
Belgılı bolǧandai, ötken alty jyl ışınde Astana qalasynda «Mektepke jol» aksiiasy aiasynda 23 000-nan asa balaǧa 208 million 329 myŋ teŋge kölemınde materialdyq kömek körsetılıptı. Onyŋ ışınde 167 million 305 myŋ teŋge biudjet arnaiy qordan alynsa, 39 million 700 myŋ teŋge şamasyndaǧy qarajat mesenattar tarapynan jūmsalǧan. Būl qatarda «Nūr Otan» partiiasynyŋ jergılıktı ökıldıgı, Dın ısterı agenttıgı, «QazTransGaz» AQ, «Alians Bank» AQ, «Sesna bank» AQ, sonymen bırge, «KZ» jäne «Dar» qoǧamdyq qory men Astana qalasynyŋ ortalyq bazary da aksiiaǧa tūraqty qoldau körsetıp keledı.
Bılım basqarmasy basşysynyŋ orynbasary mälımdegendei, būl aksiia balalardyŋ tegın bılım alu qūqyn jüzege asyru maqsatynda qolǧa alynǧan. Öitkenı, tūrmys tarşylyǧyna kep tıreletın ärtürlı sebeptermen mektepke bara almai qalyp jürgen balalar barşylyq. Sözımızge dälel: bır ǧana 2013 jyly bılım jäne ışkı ıster salasy mamandarynyŋ arnaiy reid jürgızuı barysynda jaǧalai qarap ötken 65 847 päterdıŋ özınen mektepke barmaǧan, mektep jasyndaǧy ekı bala anyqtalǧan. Qaiyrymdylyq şarasy aiasynda ol balalar qajettı oqu qūraldary men mektep kiımderımen qamtamasyz etılıp, mektepke bara bastady.
Jalpy 2013 jyldyŋ özınde köp balaly, äleumettık jaǧynan az qamtylǧan, sondai-aq asyrauşysy joq 6256 balaǧa jäne 250 mügedek balaǧa 23 million teŋge şamasynda kömek körsetılgen.
Sonyŋ ışınde, 2013 jyly jergılıktı biudjetten orta bılım alyp jürgen jaǧdaiy tömen balalar üşın 169 million 345 myŋ teŋge bölınse, 2014 jyl üşın 177 million 940 myŋ teŋge kölemınde qarajat bölınıp otyr.
Biyl dästürlı türde 1 tamyz künı bastalǧan «Mektepke jol» aksiiasy 30 qyrküiekke deiın jalǧasady. Qaladaǧy aialdamalar men köpşılık oryndarda şara jönındegı qūlaqtandyrular ılınıp, üş audan men saiajailarda da reid jürgızıledı. Al ırı sauda oryndarynda şarany ıske asyru maqsatynda arnaiy butikter qyzmet ıstep, №13, 45, 55 mektepte aiyna ekı ret halyqqa keŋes ötkızıledı.
Mektep mūǧalımderı, ata-analar, bılım basqarmasy men ışkı ıster basqarmasy ökılderı qatysqan keşegı jiynda qaiyrymdylyq aksiiasynyŋ alǧaşqy syilyqtary taratyldy. Biyl mektep tabaldyryǧyn attaǧaly otyrǧan büldırşınderge 18 myŋ teŋge kölemındegı qarajatqa mektep qūraldary ülestırıldı.
Näzira SAILAUQYZY
