Qazaqstan mūsylmandary dıni basqarmasynyŋ töraǧasy Erjan qajy Malǧajyūly Ramazan aiyna arnap jariialaǧan ündeuınde küllı mūsylmandardy mübärak aida ızgı ısterdı jiı ūiymdastyryp, mūqtaj jandarǧa qol ūşyn sozuǧa şaqyrǧan edı.
Qaiyry mol qadırlı aida qaiyrymdylyq ısterın jasaudy «Nūr Astana» meşıtı de jyldaǧy dästürmen jalǧastyryp, köŋılı kemşın jandarǧa demeuşılık körsettı. Atap aitar bolsaq, äleumettık jaǧdaiy, tūrmysy tömen otbasylarmen qatar, taǧdyrdyŋ synaǧyna moiymai, tumysynan kemtar, mügedek jandardy baǧyp-qaǧyp otyrǧan şaŋyraqtarǧa da qamqorlyq jasaldy. Orazada bastau alǧan igı şarada 84 otbasy qamtylyp, är otbasyǧa azyq-tülık, kiım-keşekter, sondai-aq, mügedekterge arnalǧan kerek-jaraqtar, jattyǧu qūraldary taratyldy.
Qadırlı aida ärtürlı mekemelerde auyzaşar ūiymdastyryp, asyl dınnıŋ qūndylyqtaryn jetkızu de ökıldık nazarynan tys qalmai keledı. Atap aitar bolsaq, «SOS» jetım balalar üiınde 115 adamǧa arnalǧan dastarqan jaiyldy.
Bügınde meşıt jamaǧatynyŋ qatary öz qaraközderımızben qatar özge dın iaki özge ūlt ökılderımen de tolyǧyp keledı. Orazanyŋ osyndai qūtty keşınde «Nūr Astana» ortalyq meşıtı ökılderı elordamyzdaǧy islam dının qabyldaǧan bauyrlarmen auyzaşar ötkızdı. Haq dınmen qauyşqan bauyrlar būl keşte ızgı lebızderın, ystyq yqylastaryn bıldırıp, asyl dınnıŋ eldegı şaŋyraǧyn biıktetıp, uyǧyn köterıp otyrǧan barşa imamdarǧa alǧystaryn aitty.
Sondai-aq, künı keşe elordamyzdyŋ Esıl audany ardagerlerıne arnalyp dastarqan jasalyp, onda körgenı men köŋılge tüigenı mol, aqyly dariia qariialarymyzben önegelı, ösiettı otyrys öttı. Būǧan qosa, qala meşıtterınde qoǧam, dın jäne mädeniet qairatkerlerınıŋ basyn qosqan auyz-aşar keşterı de jyldaǧy ürdıspen ötkızılude.
Jaiyq NAǦYMAŞ
