Örelı öner ordasy
Talai talanttyŋ tomaǧasyn sypyrǧan Qazaq Ūlttyq Öner universitetıne 15 jyl toldy. Küllı älemdı has talantymen täntı etken, Memlekettık syilyqtyŋ iegerı, Halyqaralyq şyǧarmaşylyq akademiiasynyŋ akademigı, professor Aiman Mūsaqojaeva basqaratyn öner ordasy şyǧarmaşylyq şyŋdardyŋ talaiyn baǧyndyryp, Alaştyŋ atyn älemge tanytty.
Alaştyŋ aqmaŋdai qyzy
Qazaq Ūlttyq Öner universitetınıŋ ataǧy bügınde dürıldep tūr. Daŋqy tek Alaş jūrtyna ǧana emes, törtkül dünienıŋ törtbūryşyna da taraldy. Öner ordasynyŋ talantty ūl-qyzdary talai halyqaralyq baiqaularda baq synap, Batystyŋ özın bas idırıp keledı. Oqu ordasynyŋ şäkırtterı bairaqty bäsekede top jaryp, Qazaq degen halyqty älemge tanytqan saiyn Alaştyŋ Aimandai aqmaŋdai qyzynan ainalasyŋ.
Aiman Qojabekqyzy – halqymyzdyŋ maŋdaiyna bıtken bırtuar tūlǧa. Ūlt önerınıŋ baǧyna jaralǧan jaryq jūldyz.
Aiman Mūsaqojaeva qarşadaiynan önerge jaqyn bolyp östı. Kışkentaiynan apa-sıŋlılerımen bırge, Abai atyndaǧy opera jäne balet teatrynyŋ qoiylymdaryna baratyn.
Sonyŋ yqpaly bolsa kerek, aǧaiyndy tört qyz Almatydaǧy Küläş Baiseiıtova atyndaǧy muzyka mektebıne oquǧa tüstı.
Jastaiynan Nūrǧisa Tılendiev, Ǧaziza Jūbanova, Aram Hachaturian, Valerii Klimov syndy myqtylardyŋ közıne tüsıp, batasyn alǧan Aiman 18 jasynda-aq jūldyzdai jarqyrap, Iýgoslaviiada ötken halyqaralyq saiysta jeŋimpaz atandy. Sodan keiın-aq ataq-daŋqy aspandai berdı, aspandai berdı. Düniejüzınıŋ düiım düldülderımen üzeŋgı qaǧystyryp, talai bäigelerden at ozdyrdy. Skripkanyŋ qūdırettı sazymen talǧamy biık talai körermennıŋ jüregıne jol tapty. Qazaqtyŋ aqmaŋdai qyzynyŋ talantyna bas imegen, qol soqpaǧan el kemde-kem şyǧar. Esımı «XX ǧasyrdyŋ 2000 körnektı muzykanty» atty düniejüzılık qūrmettı tızımge endı. Küllı Alaştan jalǧyz özı «Älem ärtısı» ataǧyn aluynyŋ özı köp närsenı aŋǧartsa kerek. Oǧan ataqty Stradivaridıŋ skripkasy senıp tapsyryluy da bekerden-beker emes.
Keiın özı de «Solister akademiiasy» kameralyq orkestrın ūiymdastyryp, şyǧarmaşylyǧyn şyŋdai tüstı.
Aiman Qojabekqyzy qai elge, qai jerge barsa da tuǧan elınıŋ tūǧyryn biıktetudı esınen şyǧarǧan emes. «Şet memleketterge gastroldık saparlarmen şyǧyp, konsert qoiǧan kezde eŋ aldymen syrt elder qazaq önerın bılse eken, tanysa eken degen maqsatty alǧa qoiamyn. Sol sebeptı Evgenii Brusilovskii, Ǧaziza Jūbanova, Tiles Qajyǧaliev, Erkeǧali Rahmadiev tärızdı otandyq kompozitorlardyŋ şyǧarmalaryn jiı oryndaimyn. Qazaq muzykasy – qaimaǧy būzylmaǧan kırşıksız öner. Onyŋ tabiǧatyn, jan-düniesın şetel tyŋdarmandary da jaqsy sezınedı. Ünemı qoşemet bıldırıp, ıltipat körsetıp jatady», – deidı Aiman Qojabekqyzy.
Biıktı baǧyndyrǧan bılım ordasy
El maqtanyşyna ainalǧan bılım ordasynyŋ ırgetasy Astanamen bırge, 1998 jyly qalanǧan. Ūlt önerınıŋ ülken şaŋyraǧyn köteru ärı ony bas şahardyŋ märtebesıne sai älemdık oqu orny deŋgeiıne jetkızu – auyz toltyryp aitarlyqtai auqymdy ıs. Ärı ol kez kelgennıŋ qolynan kele bermeidı. Osy tūrǧydan alǧanda Aiman Mūsaqojaeva bır özı bır ministrlıktıŋ jūmysyna tatityn ıstı oidaǧydai alyp şyqty. Talantty jastardyŋ darynyn ūştauǧa den qoiǧan ol maqsatyn jüzege asyru jolynda aianbai ter töktı.
– Gastroldık saparlarmen köptegen memleketterdı aralaǧan kezde, olardyŋ muzykalyq bılım jüiesıne erekşe qyzyǧuşylyq tanytatyn edım. Öz elımızde de osyndai ülken öner ordasyn qūru – köpten kökeiımde jürgen joba bolatyn. Bır kezdesude osy oiymdy Elbasyna jetkızdım. Maǧan bırden qoldau bıldırgen Prezident bolaşaq Muzyka akademiiasy jaŋa astanada aşylu qajettıgın aitty. Ol kezde men Aqmola qalasyn onşa bıle bermeitın edım. Bıraq janyma jai tapqyzbaǧan oiymnyŋ osy şaharda jüzege asuǧa tiıs ekendıgıne ıştei özımdı daiyndap jürdım, – deidı Aiman Qojabekqyzy.
Söitıp, qazırgı Öner universitetı – būrynǧy Chaikovskii atyndaǧy №1 muzyka mektebi men Aqmolanyŋ muzyka kolledjiniŋ bazasynda qūryldy. Qiyndyqtar bolmai qalǧan joq. Bılıktı mamandardyŋ tapşylyǧyn bylai qoiǧanda, olardyŋ äleumettık mäselelerın şeşu oŋaiǧa soqpady. Mūnyŋ syrtynda qūral-jabdyqtar men muzykalyq aspaptardyŋ jetıspeuşılıgı, oqu auditoriialarynyŋ azdyǧy, qarajat tapşylyǧy bar. Bıraq Aiman Qojabekqyzy moiyǧan joq. Elbasynyŋ senımı men qamqorlyǧyn janyna demeu etıp, tüitkıldı mäselelerdı bırtındep şeşe bastady.
1998 jyly Astananyŋ halyqaralyq tūsaukeserımen bırge, būrynǧy Muzyka akademiiasy – qazırgı Qazaq Ūlttyq Öner universitetınıŋ de tūsauy kesıldı. Būl saltanatty jiynǧa Elbasy Nūrsūltan Nazarbaevtyŋ özı qatysty.
Būl öner ordasyndaǧy oqu jüiesı erekşe. Şet memleketterdıkı siiaqty, bılım berudıŋ barlyq türı bıryŋǧai oqytu jüiesıne bırıktırılgen. Iаǧni oqu ordasy tabaldyryǧyn attaǧan jetkınşek diplomyn qolǧa ūstap, bır-aq şyǧady.
Talanttar toǧysqan şaŋyraq
Bügıngı künı Qazaq Ūlttyq Öner universitetınde oqyǧan da, oqymaǧan da armanda bolyp tūr. Esıldıŋ sol jaǧalauyndaǧy «Şabyt» şyǧarmaşylyq saraiyna qonys tepken bılım men öner ordasynda oquşylar mektepten keiın kolledjde, kolledjden keiın universitetke tüsuge mümkındıgı bar. Tıptı bakalavriat, magistratura satylaryn bıtırgenşe oquyn jalǧastyra alady. Oǧan universitettıŋ materialdyq-tehnikalyq bazasy tolyǧymen jetkılıktı. «Şabytta» ekı balet zaly, ekı teatr zaly, aerobika zaly jäne är buynnyŋ özıne laiyq studiialary jūmys ısteidı. Organ zalynyŋ özı bar iri ortalyqqa ainaldy. Ortalyq Aziia boiynşa sirek kezdesetin üzdik organ zalynda nebir iri jarystar men festivalder ötkizilip, ataqty organşylar öner körsetedi.
Qazırgı künı universitet damudyŋ jaŋa jolyna tüsken. Bılım ordasynda mektep-kolledj keşenınde 5 baǧdarlama, bakalavriatta –19 jäne magistraturada 15 baǧdarlama boiynşa mamandar äzirleidı.
Oqu ornynda tek 2010 jyldyŋ özınde jaŋa öner mamandyqtary aşyldy: mädeniettanu, önertanu, horeografiia, keskindeme, müsin, rejissura (körkem jäne derektı kino), operatorlyq öner, ssenografiia (kiim dizainy, grim-vizaj), kitaphana isı. Sonymen qatar, 6 fakultet jūmys ısteidı: muzyka; teatr, kino jäne TV; dästürli muzykalyq öner; horeografiia; beineleu öneri; äleumettik-gumanitarlyq ǧylym.
Universitet qūrylymynyŋ bırı – önertanu ǧylymi-zertteu institutynda keleşekte IýNESKO kafedrasy men folklor kabinetın aşu josparlanyp otyr. Osy oqu ordasy tülekterınıŋ bırı qalmai, jūmyspen qamtylatyny da universitettıŋ märtebesın, oqytudaǧy sapasyn bıldırse kerek.
Universitet şäkırtterı jyl saiyn Avstriiada, Venada, Vatikanda, San-Bartolomeoda ötetin halyqaralyq konkurstarda top jaryp, jüldeger atanyp, el mereiın asqaqtatyp jür. Bügıngı künge deiın jastar 500 halyqaralyq baiqaudyŋ, 400-den astam respublikalyq saiystyŋ laureattary atanyp ülgergen.
Kezınde Qazaqstannyŋ ortalyq, soltüstık öŋırlerın, sonyŋ ışınde Astanadaǧy şyǧarmaşylyq ūjymdardy joǧary bılımdı käsıbi mamandarmen qamtamasyz etudı mındetıne alǧan öner ordasy bügınde sol maqsatyna tolyq jettı deuge äbden negız bar.
QazŪÖU-de sabaq berıp, şäkırtter tärbielep jürgen oqytuşylar da osal emes. Olardyŋ basym köpşılıgı elımızge tanymal tūlǧalar. Atap aitqanda, E.Rahmadiev, K.Düisekeev, S.Erkımbekov, S.Äbdınūrov, Q.Baibosynov, Ä.Syǧai, B.Nögerbek, Ä.Tarazi, R.Mūqanova, T.Älıpbaev syndy öz käsıbınıŋ bılıktı mamandary öz şeberlıkterınıŋ qyr-syryn şäkırtterge üiretıp keledı.
Būl būl ma, mūnda syrt memleketterden de kelıp sabaq beretın Resei men Europanyŋ bılıktı muzykanttary da barşylyq. Mysaly, Mäskeu, Peterburg, Kiev, Minsk, Vena men London konservatoriiasymen jasalǧan kelısım-şarttar bar. Jyl saiyn universitetımızge İtaliianyŋ öner şeberlerı de kelıp, därıs oqidy.
Mereitoi mäzırı
Qazaq Ūlttyq Öner universitetınıŋ 15 jyldyq mereitoiy joǧary deŋgeide öttı. «Qazaqstan» ortalyq konsert zalynda arnaiy äzırlengen auqymdy baǧdarlamamen bastalǧan mereitoilyq keş QR Halyq ärtısı, Memlekettık syilyqtyŋ laureaty Aiman Mūsaqojaeva men «Aigölek» balalar skripkaşylar ansamblınıŋ oryndauyndaǧy F.Kreislerdıŋ «G.Puniani stilındegı Preliudiia men Allegro» şyǧarmasymen aşyldy.
Konsertke Fransiia, Resei, Äzırbaijan, Belarus, Qyrǧyzstan, Latviia men İtaliianyŋ belgılı öner qairatkerlerı men joǧary oqu oryndarynyŋ basşylary arnaiy keldı.
Merekelık keşte jūrtşylyq Öner universitetınıŋ bügıngı künge deiıngı qol jetkızgen jetıstıkterın tamaşalap, dästürlı jäne älemdık muzyka jauharlarymen susyndap qaitty.
Osy mereitoi qūrmetıne Astanada on kün boiy halyqaralyq öner forumy öttı. Onda italiialyq pianist Bruno Kanino, Reseidıŋ Halyq ärtısı Maksim Fedotov, Graf Murja, germaniialyq äigılı muzykant Mihail Vaimen syndy tūlǧalar qatysyp, öner körsettı.
Al keşe halyqaralyq Öner forumy aiasynda «Şabyt» şyǧarmaşylyq saraiynda skripkaǧa arnalyp jazylǧan äuenderdıŋ konsertı öttı. Onda S.Frank jäne İ.Bramstyŋ skripka men fortepianoǧa arnalǧan şyǧarmalary äuelese, ekınşı bölımde «Solister akademiiasy» memlekettık kameralyq orkestrı men Astana Memlekettık filarmoniiasynyŋ konsertı körermen qauymǧa jol tartty.
Endı Aiman Mūsaqojaeva basqaratyn şyǧarmaşylyq top «Älemnıŋ segızınşı keremetı – Astana» atty osy mereitoilyq konserttık baǧdarlamasyn Astanadan bölek, Milan jäne Turin, Vaşington men Parij, Tokio men Los-Andjeles syndy älemnıŋ ırı megapolisterınde de ūiymdastyru maqsatynda, gastroldık saparǧa attanbaq. Tüpkı maqsat – qazaqtyŋ önerın törtkül düniege tanytu.
Qymbat TOQTAMŪRAT