Astana tek zäulım ǧimarattarymen ǧana emes, jasyl-jelek, saiabaq, gülbaqtarymen de ädemı. Bas şaharda qyzyqty oryndarymen qatar, bır sät damyldap, tıze bügıp otyruǧa arnalǧan oryndyqtarǧa da basa män berıledı.
Elordada ädemı oiu-örnekpen bezendırılgen erekşe oryndyqtar jeterlık. «Nūr jol» jelekjolynyŋ boiyndaǧy oryndyqtardyŋ ekı jaq şetı qazaqtyŋ oiuy örnektelgen mramorlarmen qaptalǧan. Oryndyqtar otyruǧa da jaily. Mūndai ädemı ärı jaily oryndyqtar qaladaǧy alaŋdarmen qatar, köşelerdıŋ qaltarys-būltarystarynda, saiabaqtarda da sansyz. Sondai-aq Astananyŋ 20 jyldyǧy qarsaŋynda paida bolǧan erekşe aialdamany atap ötuge bolady. Respublika daŋǧylynyŋ boiyndaǧy «BUS» degen ülken jazumen ornatylǧan aialdamada avtobus kütken jolauşylarǧa tıze büguge yŋǧaily.
Jalpy, qaladaǧy oryndyqtar aǧaş, temır siiaqty türlı materialdardan jasalǧan. Olardyŋ aişyqtalyp, bezendırıluı de ärtürlı. Endı äinek oryndyq ta paida boldy. Jaqynda ǧana «Bäiterek» monumentı alaŋyna Astananyŋ 20 jyldyǧyna orai, qalalyq mäslihattyŋ 6-şaqyrylym deputattary syiǧa tartqan äinek oryndyq qoiyldy. Arqaly oryndyqtyŋ joǧarǧy jaǧynda körsetılgen QR kod arqyly mäslihattyŋ elektrondy saity men feisbuk äleumettık jelısındegı paraqşasyna kıruge bolady. Elordanyŋ mereitoiyna jasalǧan mūndai syilyqtar az emes. Mysaly, Astananyŋ sol jaǧalauyndaǧy jaŋa velojoldardyŋ boiynda 39 smart oryndyq ornatyldy. Būl oryndyqtar – Astananyŋ 20 jyldyǧyna Pavlodar oblysynyŋ jasaǧan syiy. Jaŋa oryndyqtardyŋ smartfondarǧa bliutuz arqyly qosylu jäne dinamika arqyly muzyka tyŋdau qyzmetı bar. Sondai-aq telefondy symsyz jäne USB port arqyly quattauǧa bolady. Oryndyqtar elektr quatyn kün batareialary arqyly alady. Eŋ bastysy, būl oryndyqtar velosipedter üşın tūraq qyzmetın de atqara alady. Smart oryndyqtardyŋ jaŋa velojoldardyŋ maŋaiyna ornatyluynyŋ sebebı de sol. Qytaida jasalǧan aqyldy oryndyqtardyŋ bıreuınıŋ baǧasy – 1,2 mln teŋge. Är oryndyqtyŋ üş jylǧa deiın kepıldık merzımı bar.
Qalanyŋ qauyrt tırşılıgınen bır uaq tynystap, osyndai zamanaui ärı jaily oryndyqtarǧa otyryp, gazet-jurnal, kıtap oqudyŋ özı bır ǧanibet emes pe…
