Nūr-Sūltan qalasynyŋ äkımı Altai Kölgınov mektep direktorlarymen kezdesıp, özektı mäselelerdı talqylady.
«Oquşylardyŋ dästürlı oqu formatyna qaita köşkenıne ekı ai öttı. Būl oquşylardy da, pedagogtardy da quantady. Barlyq mūǧalımder men tehnikalyq personal ekpe alǧan, degenmen qataŋ sanitarlyq normalardy saqtaudy jalǧastyru qajet: maska taǧyp, mektepke Ashyq qosymşasy arqyly kıru kerek» dep mälımdedı basqosuda qala basşysy.
Altai Kölgınov qauıpsızdık mäselesıne erekşe köŋıl bölınetının jetkızdı. «Qauıpsızdıkpen qamtamasyz etuge de nazar audaramyz. Bılım beru nysandarynyŋ bärı kameralarmen jabdyqtalǧan. Mysaly, ötken jyldyŋ özınde qosymşa kameralarmen jabdyqtauǧa 600 mln teŋge bölındı. Sondai-aq küzet qyzmetkerlerınıŋ daiyndyǧy men bılıktılıgıne erekşe nazar audaru, terrorizmge qarsy oqu-jattyǧulardy tūraqty negızde ötkızu qajet. Bılım basqarmasyna mektep direktorlarymen bırlesıp, bılım beru nysandaryn dabyl signalizasiiasy batyrmalarymen, turnikettermen jaraqtandyrudy, sondai-aq, mektep psihologtarynyŋ jūmysyn küşeitudı tapsyramyn. Oquşylarmen jeke tüzetu jūmystaryn tūraqty negızde jüzege asyru kerek.
Būdan basqa, bılım beru nysandarynyŋ qoljetımdılıgı jäne jürgızılgen infraqūrylym mäselesı de maŋyzdy. Jyl saiyn jaŋa mektepter sanyn da arttyramyz. Biyl 15 mektep salynbaq. Būl şamamen 40 myŋ oquşy ornyn qūruǧa mümkındık beredı. Salystyrar bolsaq, būl 2020 jylǧa qaraǧanda ekı ese, al 2019 jyldan tört ese köp. Kelesı jylǧa daiyndyq jūmystaryn bastap kettık. Sonymen qatar infraqūrylym boiynşa keste jasaldy. Būl – kıretın joldar, jaiau jürgınşıler joldary, abattandyru» dep tüsındırdı äkım.
