Prezident Nūrsūltan NAZARBAEV: ÄRALUANDYǦYMYZ-BAILYǦYMYZǦA, BIRLIGIMIZ-TABYSYMYZǦA AINALDY
«Nūr Otan» partiiasynyŋ kezekten tys HV qūryltaiy öttı. Oǧan partiianyŋ barlyq öŋırlık filialdarynan kelgen 1200-ge juyq delegat, ükımettık emes jäne jastar ūiymdary, diplomatiialyq korpus ökılderı, memlekettık organdar men ūlttyq holdingter basşylary, mädeniet jäne sport qairatkerlerı qatysty.
«Nūr Otan» damudyŋ dara jolyna bastaidy
Qūryltaida söz söilegen «Nūr Otan» partiiasynyŋ töraǧasy, Elbasy Nūrsūltan Nazarbaev:
– Bügıngı basqosudyŋ orny airyqşa. Ötken 15 jyldyŋ qorytyndysyn şyǧaru tūrǧysynan jäne bolaşaq baǧdar tūrǧysynan da bölekşe kün. Būl – elımız «Qazaqstan 2050» strategiiasyn qabyldaǧannan bergı partiiamyzdyŋ alǧaşqy basqosuy. Bız alys bolaşaqqa köz tıgıp, aldymyzǧa biık mejeler belgıledık. Qandai maqsatqa qai jolmen jetetınımızdı naqtylap, ony jüzege asyruǧa kırıstık. Elımızdıŋ strategiiasyn qalai ıske asyruymyz kerek, sony oilastyramyz. Ony mültıksız jüzege asyryp, Qazaq elın damudyŋ dara jolyna bastau eldegı eŋ quatty saiasi küş – «Nūr Otanǧa» jüktelıp otyr, – dep atap öttı.
Partiia qysqa merzım ışınde köptegen jetıstıkterge jetıp, el senımıne ie bolǧanyna toqtalǧan Memleket basşysy osydan 14 jyl būryn partiianyŋ alǧaşqy sezıne nebärı 400-ge juyq delegat qatysqanyn, sodan keiıngı az uaqytta«Nūr Otannyŋ» 250 filialy, 6300 bastauyş ūiymy bar alyp qūrylymǧa ainalǧanyn aitty. Partiia – atqaruşy jäne ökılettı bilık tarmaqtarynda tızgındı berık ūstady. Eldık ısterdıŋ barlyǧyna belsene aralasyp keledı. Elbasynyŋ bastamalaryna ärdaiym qyzu qoldau bıldırıp, ideialaryn qūlşyna ıske asyryp kele jatqan partiia eldıŋ de köŋılınen şyǧa bıldı.
–Elımızdı älemnıŋ eŋ quatty 30 elınıŋ qataryna qosu – aldymyzdaǧy ülken, ūly maqsat. Būl «Nūr Otannyŋ» bolaşaqqa jol sılteitın temırqazyǧy boluǧa tiıs. Bügıngı sezde qabyldanatyn «Nūr Otannyŋ» jaŋa saiasi doktrinasy da osyny közdeidı. Bız qoǧamymyzdyŋ erekşelıkterın artyqşylyqqa ainaldyra bıldık. Äraluandyǧymyz – bailyǧymyzǧa, bırlıgımız – tabysymyzǧa ainaldy. Osyny ūlt ziialylary ünemı este ūstap, jastarǧa ärdaiym yntymaqtyŋ ülgısın körsetkenı jön, – dedı Elbasy.
Memleket basşysy Saiasi doktrinada qazaq tılıne erekşe män berılgenın qūptai otyryp, memlekettık tıl mäselesıne den qoiatyn kez kelgenın basa aitty. Prezidenttıŋ aituynşa, qazaq tılın bılu azamattyq paryzdy ǧana emes, ūltqa degen qūrmettı de bıldıredı. Otan otbasyndaǧy önegelı tärbieden bastau alady. Osyny ärbır azamat esınde ūstauy tiıs.
Būdan keiın «Qazaqstan-2050» strategiiasyna toqtalǧan Elbasy osynau maŋyzdy qūjat – älemnıŋ eŋ ozyq 30 elınıŋ qataryna qosyludyŋ maŋyzdy qadamy ekendıgın, damudyŋ būdan basqa joly joqtyǧyn eske saldy. «Baǧdarlama jan-jaqty jasaldy, bız ne ısteu kerektıgın bılemız ärı ony qalai ıstep, sol arqyly qandai maqsattarǧa jetetınımızdı de boljap otyrmyz. Bızdıŋ halqymyz tarihynda mūndai auqymdy äleumettık-ekonomikalyq maqsattar qoiyp, oǧan qol jetkızgen emes. Älbette, ömır bır orynda tūrmaidy, tarih qaşanda özınıŋ argumentterın alǧa tartady. Qūbylysty, būrylysty kezeŋge daiyn boluymyz kerek» dedı Nūrsūltan Äbışūly.
Jiyn barysynda Memleket basşysy «Nūr Otannyŋ» aldynda tūrǧan maqsattar men mındetterdı aiqyndap berdı.
Elbasynyŋ aituynşa, «Nūr Otan» eŋ äuelı elımızdıŋ basty patriottyq küşıne ainaluǧa tiıs. Ekınşı, «Nūr Otan» – jalpyūlttyq bırlıktıŋ negızgı buyny boluy qajet jäne memlekettık tıldı nyǧaituǧa, qazaqtyŋ dästürı men mädenietın jaŋǧyrtuǧa bailanysty qoǧamdyq-saiasi jūmystardyŋ tiımdı jüiesın jasap, elımızdıŋ öŋırlerın, ärtürlı ūlt ökılderın bır-bırımen jaqyndastyratyn däneker bola otyryp, bırlıktı nyǧaita tüskenı dūrys. Sonymen qatar «Nūr Otan» ärqaşan azamattyq qoǧamnyŋ köşbasşysy, äleumettık-ekonomikalyq innovasiianyŋ jalpyūlttyq ortalyǧy, jalpyhalyqtyq baqylaudyŋ basty tetıgı, jastardyŋ belsendı qoldauşysy bola otyryp, elımızdıŋ ışkı saiasi qūndylyqtaryn örkendetudı negızgı mındetıne aluǧa tiıs.
–Aldymyzda biık belester bar. Olardan alqynbai asu, belesterdı barlyqpai baǧyndyru – bızdıŋ öz qolymyzda. Myzǧymas bırlık pen tynymsyz eŋbek, jasampazdyq pen jaŋaşyldyq, jauapkerşılık – bızdıŋ eŋ basty qūralymyz osylar. Bız özımızdı ūdaiy qamşylap, alǧa ūmtyla bılsek qana «Qazaqstan 2050» strategiiasyndaǧy biık maqsattarǧa jete alamyz. Partiiamyz tūǧyrly, eldıgımız ǧūmyrly bolsyn. Mäŋgılık eldı bırge jasaiyq, – dep sözın tüiındedı Elbasy.
Saiasi doktrina – bolaşaqqa baǧdar
«Nūr Otan» partiiasynyŋ kezekten tys on besınşı sessiiasynyŋ kün tärtıbındegı basty mäsele – partiianyŋ «Nūr Otan. Nūrly bolaşaq jolynda!» atty saiasi doktrinasynyŋ qabyldanuy boldy. Partiianyŋ HHI ǧasyrdaǧy missiiasy men elımızdıŋ bolaşaqtaǧy baǧyt-baǧdaryn aiqyndaityn, täuelsızdık qūndylyqtaryn naqtylaityn būl qūjat Elbasynyŋ tapsyrmasymen äzırlengen bolatyn. «Nūr Otan» partiiasy töraǧasynyŋ bırınşı orynbasary Bauyrjan Baibektıŋ aituynşa, doktrina – partiia damuynyŋ jaŋa kezeŋı.
– Elımız damudyŋ jaŋǧyru kezeŋıne aiaq basty. Osydan bır jyl būryn Elbasy «Qazaqstan – 2050» strategiiasyn jariialap,onda älemdegı eŋ ozyq 30 eldıŋ qataryna kıru mındetın qoidy. Osy biık asudy baǧyndyruǧa bızge bırlık pen tırlık, jaŋaşa közqaras, aşyqtyq jäne ynta-erık kerek. Az ǧana uaqytta elımızde auqymdy reformalar bastaldy. Qoǧamdyq baqylau, halyq aldyndaǧy eseptılık, memlekettık organdardyŋ aşyqtyǧy, özın-özı basqaru jüiesı aitarlyqtai küşeitıldı. Halyqtyŋ partiiasy retınde bız de osy jūmystarǧa belsene qatysyp, qyzmetımızdı jaŋǧyrtuymyz kerek. Sol sebeptı bız Memleket basşysynyŋ tapsyrmasymen partiianyŋ doktrinasyn äzırledık. Qūjatty ışkı partiialyq talqylaudyŋ aiasynda saiasi keŋes, biuro, ükımet müşelerı, fraksiia deputattary, şalǧaidaǧy auyl aumaqtarǧa baryp, türlı kezdesuler ötkızıp, ekı ai boiy talqylady, – dedı partiia töraǧasynyŋ bırınşı orynbasary.
Būdan keiın Doktrina qabyldanar aldynda taǧy da talqyǧa salynyp, elımızge belgılı azamattar atalmyş qūjat turaly oi-pıkırın ortaǧa saldy.
Söz aldymen QR Parlamentı Senatynyŋ deputaty, Jazuşylar odaǧynyŋ töraǧasy Nūrlan Orazalinge berıldı. «Qazaqstandyqtardyŋ sanasynda Elbasy partiiasy degen saiasi küş retınde bekıgen būl qūryltai erekşe tarihi jaǧdaida ötıp otyr» dep sözın bastaǧan Senat deputaty Elbasynyŋ tıkelei basşylyǧymen elımız «Qazaqstan – 2030» strategiiasynyŋ negızgı mejelerın erlık pen tabandylyqtyŋ, erık pen jıgerdıŋ, yntymaq pen bırlıktıŋ arqasynda merzımınen būryn oryndaǧanyn atap öttı.
– Jeŋısterımızdıŋ arqauy – el men Elbasy bırlıgınde. Būl uaqyt synynan müdırmei ötken şyndyq. Sondyqtan aituly qūjat adam oiy men sanasynyŋ tazartu kezeŋı kelgenın sezıne otyryp, sodan aryluǧa, osyǧan deiın uaqyt synynan sürınbei ötken saiasi ekonomikalyq jäne ruhani baǧyttarymyzdy jetıldıruge şaqyrady. Doktrina jürgızılıp kele jatqan sara saiasattyŋ jetıstıkterın däiekteitın äreketterge qanat bıtıre otyryp, ärbır qazaqstandyqty täuelsızdık atty kielı de qasiettı basty qūndylyǧymyzdy qasterleuge, tögıp-şaşpai bolaşaq ūrpaqqa basy bütın jetkızuge mındetteidı, – dedı Nūrlan Orazalin.
Būdan keiın QR Parlamentı Mäjılısınıŋ deputaty Mäulen Äşımbaev söz alyp, doktrina elımızdıŋ maŋyzdy şeşımderı men bastamalaryna, bolaşaq baǧdarlamalaryna arqau bolatynyn atap öttı.
Jiynda söz kezegın alǧan «Altyn jürek» ūlttyq qaiyrymdylyq jüldesın ūiymdastyru komitetınıŋ töraiymy Jūldyz Omarbekova özınıŋ on jyldan astam uaqyt boiy qaiyrymdylyq qorda jūmys ısteitının, alǧaş jūmysqa kırısken sätten bastap azamattyq ūstanymdaryna «Nūr Otan» partiiasy ünemı qoldau körsetıp kele jatqanyn aitty. Bügınge deiın osy qor arqyly 100 mlrd teŋge kölemınde qaiyrymdylyq jasalyp, sonyŋ esebınen köptegen balabaqşa, mektep salynǧan. Tıptı, ata-anasynyŋ qamqorlyǧynan şet qalǧan balalardan qūralǧan futbol komandasy jasaqtalyp, osy sport türınen bırınşı chempionat ta ötkızılgen eken. Oǧan elımızdıŋ tüpkır-tüpkırınen 100-den astam jetkınşek qatysypty. «İgılıktıŋ ülken-kışısı bolmaidy. Osylai qaiyrymdylyq jasau arqyly da eldıŋ senımıne ie boluǧa bolady. Bızdıŋ tabysymyz – bırlık pen tırlıkte. Oǧan är qazaqstandyq atsalysuy kerek» dep sözın tüiındedı Jūldyz Omarbekova.
Käsıpkerler men elımızge oralǧan qandastar atynan söilegen «Erke-Nūr» kompaniiasynyŋ prezidentı Farida Merhamitqyzy: «Täuelsızdık – bar baqyttyŋ bastauy. Düniejüzı qazaqtarynyŋ jüregı Qazaqstan dep soǧady. Osydan jiyrma jyl būryn özıŋızdıŋ «tarydai bolyp şaşylǧan qazaqtar, Atamekenge oralyŋdar» degen şaqyruyŋyzǧa ün qosyp, qaraşaŋyraqtyŋ bır uyǧy bolaiyq dep Qytai Halyq Respublikasynan Qazaqstanǧa oralǧan alǧaşqy qazaq jastarynyŋ bırı edım. Men osy sättı paidalanyp, Täuelsızdıkpen bırge elge oralu baqytyna ie bolǧan qandastarymyzdyŋ atynan basymdy iıp, Sızge ülken rahmet aitamyn» dedı. Ol käsıbın alǧaşqy kezde nebary bes tıgın maşinasymen bastap, bügınde ülken jetıstıkke jetıp otyrǧanyn aita kelıp, bar qiyndyqtardy ūlttyq önerge degen talpynysy jeŋgenın söz ettı. «Doktrinada töl mädeniet pen ruhaniiatqa ülken oryn berılıptı. Būl – qūptarlyq ıs. Men de sandyqtyŋ tübıne jatqan halyqtyŋ qolönerın özıne qaitaryp, qyzmet jasaudy özıme paryz sanaimyn. Bır ūsynysym, ekonomikalyq klasterdı damytu barysynda toqymaşylyq önerge de män berılse deimın. Jıp iırıp, jün basu – qanymyzda bar qasiet. Sondyqtan osy sala da el igılıgıne ainaluǧa tiıs» dedı ol.
Jūrtşylyqtyŋ talqylauynan keiın «Nūr Otan» partiiasynyŋ Saiasi doktrinasy bır auyzdan qabyldandy.
Partiianyŋ logotipı men atauy özgerdı
«Nūr Otan» partiiasynyŋ HV kezekten tys qūryltaiynda kün tärtıbı boiynşa partiianyŋ saiasi keŋesı qūramyna jäne jarǧysyna özgerıster engızıldı. «Nūr Otan» partiiasy töraǧasynyŋ bırınşı orynbasary Bauyrjan Baibektıŋ aituynşa, saiasi qūramnyŋ 49 paiyzy jaŋaryp otyr. Atap öterlıgı, endı osy qūramda memlekettık organdar qyzmetkerlerınen görı basqa mamandyq ielerınıŋ ülesı basym boldy.
Alqaly jiynda aitylǧan taǧy bır ülken jaŋalyq – «Nūr Otan» partiiasynyŋ jaŋa logotipınıŋ qabyldanuy men partiia atauynyŋ özgeruı boldy.
Partiiany aişyqtaityn emblema negızgı üş elementten tūrady. Ol – biıkke köterılgen kün, tau şyŋy, qar barysy men partiianyŋ atauy.Kün bolaşaqtaǧy jetıstıkter men Qazaqstannyŋ jarqyn jeŋısterın beineleidı. Tau şyŋy qazaqstandyqtardyŋ biık maqsattary men bolaşaqqa degen ūmtylysyn bıldıredı. Qar barysy – täuelsızdıktıŋ, küş pen bekzattyqtyŋ körınısı. «Qazaqstan-2030» strategiiasyn qabyldaǧan sätten berı barys respublikamyzdyŋ alǧa qarai senımmen qadam basuynyŋ simvolyna ainaldy. Emblemada jazylǧan partiia atauy – elımızdıŋ qalyptasuy men damuyndaǧy Elbasynyŋ tarihi ülesın beineleidı.
Al partiianyŋ qaita özgertılgen atauyna kelsek, saiasi biuronyŋ keŋeitılgen mäjılısınde engızılgen ūsynys boiynşa, būdan bylai partiianyŋ «halyqtyq-demokratiialyq» degen tırkesı alynyp tastalyp, tek «Nūr Otan» partiiasy» dep atalatyn boldy.
Qymbat TOQTAMŪRAT