Elordada protezdık-ortopediialyq kömektı qajet etetın mügedek jandar endı basqa el nemese öŋırge barmai-aq, būl qyzmettı tolyǧymen bır jerden alady. Būl ıske Nūr-Sūltan qalasynyŋ Qorşaǧan ortany qorǧau jäne tabiǧatty paidalanu basqarmasy «Kazecotech ǧylymi-tehnikalyq käsıporny» JŞS-men qauıptı qaldyqtardy basqaruǧa memlekettık-jekemenşık serıktestık şartyn jasau arqyly mūryndyq boldy.
Atalǧan Basqarma ūsynysymen joba aiasynda moduldı seh qūrylyp, Nūr-Sūltan qalasynda protezdık-ortopediialyq kömek körsetu ortalyǧyn qūruǧa alǧaşqy qadam jasaldy. Sonyŋ kömegımen elordada tūratyn mügedektıgı bar jandar basqa öŋırlerge barmai-aq tolyqqandy qyzmettı bır jerden alady. Tehnologiialyq prosess barysynda armaturalau ädısımen myqtau materialdary jäne t.b. qaldyqtardy qaita öŋdeu arqyly alynatyn baǧaly qaitalama materialdyq resurstar qoldanylady.
– Joba bırınşı kezekte ekologiialyq tiımdılıkke, qauıptı zattardyŋ auaǧa tastaluyna jol bermeuge baǧyttalǧan. Elorda äkımdıgınıŋ qoldauymen protezdık-ortopediialyq būiymdar men beiımdeu tehnikalyq qūraldary salasyndaǧy älemdık köşbasşy – nemıstıŋ Ottobock (Germaniia) konsernımen kelıssözder jürgızdık. Olardyŋ būl jobaǧa qoldau bıldırıp, belsendı qatysuyna şeşım qabyldanǧan. Jūmys nätijesı köp küttırmedı, bızge kelgen alǧaşqy pasientter tura jäne janama maǧynasynda «aiaqtan tūryp», qalypty ömırge oraluda. Endı ortopediialyq kömek körsetuden ottobock boiynşa eŋ üzdık älemdık sapadaǧy protezder Qazaqstannyŋ astanasynda da bar, – deidı «Kazecotech ǧylymi-tehnikalyq käsıporny» JŞS bas direktory Vladimir Andreev. Bır aita keterlıgı, protezder barlyq mügedekterge bırdei qalypta şyǧarylmaidy. Är adamǧa bölek, onyŋ dene müşelerınıŋ erekşelıkterıne qarai jeke-jeke jasalady. Joba aiasynda olardyŋ jaŋa protezben jüruıne beiımdelu şaralary da qarastyrylǧan.
Nūr-Sūltan qalasynyŋ Qorşaǧan ortany qorǧau jäne tabiǧatty paidalanu basqarmasy qatty tūrmystyq qaldyqtardy retteu bölımınıŋ bas mamany Saǧynyş Saǧyntaevtyŋ aituynşa, Qazaqstanda 90 myŋnan astam mügedek bala bar. Al eresekter arasyndaǧy mügedektıgı bar adamdar sany 700 myŋnan asady. Olardyŋ 20 myŋnan astamy elordada tūrady. Elorda äkımdıgı men jeke serıktestık arasyndaǧy osy äleumettık joba aiasynda bas qalada adamnyŋ qozǧalys funksiiasyn qalpyna keltıruge arnalǧan keşendı qyzmet körsetu klasterı qūrylmaq.
– Osy serıktestık arqyly elımızde kezeŋ-kezeŋımen otandyq qūramdas önımder öndıru jolǧa qoiylmaq. Sonymen qatar mügedek jandar sapaly, bionikalyq önımdermen qamtamasyz etılıp, tolyqqandy ömırge oralady. Sondai-aq protezdık-ortopediialyq salada ǧylymi-zertteu jolymen jaŋalyqtar engızılıp, olardy keiın kommersiialandyru mümkındıgı de qarastyrylady, – deidı bas maman.
