Qarapaiym halyqtyŋ mūŋ-zaryn elemeitın, tıptı azamattarmen kezdesuden qaşqaqtaityn şeneunıkter de bar. Bälkım, solardyŋ kesırınen şyǧar, sailau ötkennen keiın keibır auyldardyŋ tūrǧyndary özderı sailaǧan deputattyŋ türın eşqaşan körmegen. Ol ol ma, mäslihat deputattary qaraşanyŋ aryz-şaǧymdaryna nemqūraidylyqpen qarap, keibıreulerı kezdesuge özınıŋ kömekşılerın jıbere salatyn bolǧan. Juyrda Nur Otan-nyŋ respublikalyq partiialyq baqylau komitetınıŋ otyrysy ötıp, joǧarydaǧydai kemşılıkter ortaǧa salyndy.
Mäselenı şeşe almasa nege otyr?
Partiialyq baqylau komitetı jūmys tobynyŋ mälımetı boiynşa 2019 jyldyŋ 8 aiy ışınde partiianyŋ qoǧamdyq qabyldau nüktelerıne 143,3 myŋ adam jazbaşa şaǧym bergen. Sonyŋ ışınde 79,9 myŋ şaǧym «E-qūjat ainalymy» aqparattyq jüiesıne tırkelıp, 39 paiyzy oŋ şeşımın tapqan, 54 paiyzyna tüsındıru jūmystary jürgızılgen, 8 paiyzy älı oryndalu jaǧdaiynda eken. Halyqty köbınese äleumettık mäseleler (zeinetaqy, aliment töleu, mügedektıktı anyqtau, materialdyq kömek, baspana alu, jūmysqa ornalasu, eŋbek daulary), memlekettık organdardyŋ zaŋsyz ıs-qimylyna şaǧymdar alaŋdatady.
Atap aitarlyǧy, jergılıktı atqaruşy organ ökılderınıŋ jartysyna juyǧy azamattardyŋ mäselesın şeşuge nemqūraidylyqpen qaraityny anyqtalǧan. «Partiianyŋ qoǧamdyq qabyldauyna 8 aida kelıp tüsken 6852 jazbaşa şaǧymnyŋ 47 paiyzy jergılıktı atqaruşy organdardyŋ qūzyretıne jıberılgen. Iаǧni ärbır ekınşı aryzdanuşynyŋ mäselesı şeşılmeidı degen söz. Mūndai jaǧdai memlekettık qyzmetkerler özderıne kelıp tüsken aryzdar boiynşa mäselenı şeşpegendıkten, qarapaiym halyqty Nur Otan-ǧa aryzdanuǧa mäjbürlep otyrǧanyn körsetedı» dep mälımdedı jūmys tobynyŋ jetekşısı, Mäjılıs deputaty Snejanna İmaşeva.
Nūrsūltan NAZARBAEV,
Qazaqstan Respublikasynyŋ Tūŋǧyş Prezidentı – Elbasy:– Nur Otan partiiasynyŋ bügıngı maqsaty – halyqpen bırge bolu, qarapaiym adamdardyŋ mūŋ-mūqtajyn bılu, onyŋ talap-tılegın, aryz-şaǧymyn bilıkke jetkızu, bilıktı halyqtyŋ qamyn oilauǧa mäjbür etu jäne eldıŋ bırde-bır ötınışın jerde qaldyrmau. Būl qūrylym qazırgı kezde būqara men bilıktıŋ arasyn bailanystyruşy qyzmettı atqaruy qajet, jergılıktı jerdegı är adamnyŋ barlyq mūŋ-zaryn bıluge mındettı. Bızdıŋ qatarymyzda 800 myŋnan asa müşelerımız bar, olar elde ne bolyp jatqanyn bes sausaǧyndai bıledı.
(«Habar» telearnasyna bergen sūhbatynda aitqan sözı)
Halyqpen kezdesudı ūmytqan deputattar
Otyrys kezınde Snejanna İmaşeva memlekettık organdar ökılderınıŋ, mäslihat deputattarynyŋ halyqtyŋ ötınışterın közge ılmei, basşylardyŋ özınıŋ ornyna kömekşılerın jıbergenı, keibır jerlerde sailauşylarmen bolmaǧan kezdesudı öttı dep körsetkenı jönınde naqty aiǧaqtar keltırdı. «Alǧa audandyq partiia filialynyŋ mälımetınde oblystyq mäslihattyŋ deputaty G.Latypovtyŋ üş kezdesu ötkızıp, 3 adamdy qabyldaǧany körsetılgen. Alaida sol azamattarǧa qoŋyrau şalyp, teksergende ondai kezdesudıŋ bolmaǧany anyqtaldy. Demek, audandyq partiia filialynyŋ qyzmetkerlerı jalǧan aqparat berıp otyr» dedı S.İmaşeva.
Onyŋ aituynşa, halyqpen jüzdesuge qūlyqsyz şeneunıkter men deputattar tekseru, saualnama jürgızılgen üş öŋır: Aqtöbe, Maŋǧystau, Qaraǧandy oblystarynda anyqtalǧan. Bekıtılgen tärtıpke säikes, partiia müşelerı qoǧamdyq qabyldauda jylyna kem degende 4 adammen kezdesuge mındettı. Mäselen, äleumettık salaǧa jauapty Aqtöbe oblysy äkımınıŋ äleumettık mäseleler jönındegı orynbasary M.Toǧjanov üş qabyldauda 3-aq adammen kezdesıptı. Al jyl basynan berı Aqtöbe oblystyq partiia filialyna äleumettık mäselelerge qatysty 355 aryz-şaǧym tüsken.
Ol az deseŋız, Aqtöbe oblystyq mäslihatynyŋ deputattary bügınge deiın bırde-bır adamdy qabyldamaǧan. Maŋǧystau oblysynda da tura osyndai jaǧdai. Äleumettık jaǧynan tūraqsyzdyǧy basym Jaŋaözende de halyq nur otan-dyq üş deputattyŋ bet-jüzın köruge zar bolypty. Qaraǧandy oblysyndaǧy Priozersk mäslihatynyŋ 10 deputaty 8 aida 1 ǧana adammen kezdesken. Qaraǧandy qalalyq mäslihatynyŋ 27 deputaty bar-joǧy 12 adamdy qabyldasa, qalǧan 35 deputat bırde-bır kezdesu ötkızbegen. Negızınen alǧanda, mūndai zaŋ būzuşylyqtar barlyq oblystarda anyqtalǧan.
Bylyqtardyŋ taǧy bırıne toqtalsaq, deputattar nemese memlekettık basqarmalardyŋ bırınşı basşylary halyqpen kezdesuge öz kömekşılerın jıberetın körınedı. Mysaly, Şymkent qalalyq mäslihatynyŋ deputattary B.Sälımov pen D.Üsenov qabyldauǧa kömekşılerın jıberıp, halyqtyŋ narazylyǧyn tuǧyzǧan. Snejanna İmaşeva taldau barysynda halyqpen kezdesu ūiymdastyrylǧanymen, oǧan bırde-bır adamnyŋ kelmegenı jönınde derekter keltırdı. «Atalǧan üş oblysta deputattar bırneşe kezdesu ūiymdastyrǧan. Bıraq halyq ony estımegennen, bılmegennen nemese senbegennen kelmegen. Mysaly, Qarqaraly audandyq filialynyŋ 9 deputaty 15 kezdesu ötkızıp, eşkımmen söilespegen. Nūra audandyq mäslihatynyŋ 9 deputaty 22 kezdesude bırde-bır adamdy qabyldamaǧan. Osyǧan ūqsas jaǧdai Qaraǧandy, Şahtinsk, Priozersk, Ūlytauda da oryn alǧan» dedı jūmys tobynyŋ jetekşısı.
Ol elımızdegı eldı mekenderdıŋ sany 6,5 myŋ ekenın, öŋırlerde nūrotandyq 3 myŋnan astam deputat baryn mysalǧa keltırdı. Aituynşa, sailaudan soŋ bırde-bır deputattyŋ türın körmegen auyldar bar. Sol auyldaǧy tūrǧyndar qaşan kımge dauys bergenın de ūmytyp qalǧan. «Jergılıktı jerde deputattar sözıne qūlaq aspaǧan soŋ, oblysqa jäne elordaǧa sabylady. Mäselesı jergılıktı jerde şeşımın tappaǧan soŋ aimaqtarda tūratyn tūrǧyndardyŋ 70 paiyzy bas qalaǧa Nur Otan-nyŋ qabyldau bölmesıne keledı. Bızdıŋ qatarymyzdaǧy keibır ärıptesterımızdıŋ öz ısıne būlai salǧyrt qarauy partiianyŋ maqsat-müddesımen säikes kelmeidı. Ondai adamdardy partiiadan şyǧaru kerek» dedı S.İmaşeva.
Astanaǧa nege sabylady?
Partiialyq baqylau komitetınıŋ töraǧasy, Mäjılıs deputaty Pavel Kazansev öz ärıptesterın formalizmnen arylyp, halyqtyŋ ötınışıne jürdım-bardym qaramauǧa ündedı. «Halyqtyŋ sözıne qūlaq aspaityn deputattardy Nur Otan jazalaidy. Jūrtpen jūmys ıstei almaityn nemese oǧan qūlyqsyzdardy öz qatarymyzdan şyǧaramyz. Qarapaiym tūrǧyndar zar-mūŋyna partiianyŋ qūlaq asatynyna, qoldan keletın barlyq kömektı beretınıne senımdı boluy tiıs. Sondyqtan är adamnyŋ aryzyna mūqiiat qarau – ärbır nūrotandyqtyŋ jeke jauapkerşılıgı» dep mälım ettı töraǧa.
«Astana» telearnasynyŋ direktory, komitet müşesı Qūrmanbek Jūmaǧali azamattardyŋ problemalaryn şeşpeitın partiia müşelerı turaly oi-pıkırın aşyq aitty. «Jaqynda partiialyq baqylau komitetınıŋ otyrysyna qatysyp, jergılıktı jerlerde qaraşa jūrttyŋ aryz-şaǧymdary men tılekterın eskermek tügılı eş elemeitın, qarapaiym ǧana ötınışın oryndamaq tügılı qūlaǧyna da ılmeitın jauapsyz partiialastarymnyŋ bar ekenıne qynjyldym» degen bastamasyna qoldau bıldıremın» dep jazdy ol feisbuktegı paraqşasynda.
Nūr-Sūltan qalalyq mäslihatynyŋ deputaty Miras Şekenov azamattardy qabyldau turaly habarlamasyn äleumettık jelıler arqyly jariialau jönınde ūsynys aitty. Aitpaqşy, qataŋ syn aitylǧan oblystyq partiia filialdarynyŋ ökılderı ǧalamtordaǧy bailanystyŋ naşarlyǧynan, jüie jiı ısten şyǧatyndyqtan tüzetılgen derekter ortalyq apparatqa der uaqytynda jıberılmedı degen uäj aitty. «Jūmysyna syn aitylǧan öŋırlerdıŋ bärı tehnikany kınälaidy. Bız 21-ǧasyrda ömır sürıp jatyrmyz. Eger ǧalamtor jūmys ıstemese, ūialy telefon arqyly ekı-üş kün būryn basşylyqqa bärın baiandauǧa bolady. Men azamattardyŋ mäselelerın şeşkısı kelmeitın partiia müşelerın jazalaudy ūsynamyn» dep sözın jalǧady Pavel Kazansev.
