Feisbukte «Qainar Oljaidyŋ sabaqtary» toby aşylyp, alǧaşqy jazbalary tüskende, esımızge Mūqaǧali Maqataevtyŋ Äbdılda Täjıbaevqa arnalǧan öleŋı tüstı. Bıraq būl jerde Qainardyŋ qolynda asa emes, qalam. Al bylaişa «aşuly Groznyi patşadaiyn» Äbdılda «jyrdaǧy jalǧandyqpen myltyqtassa», Qainar gazet, sait maqalasyndaǧy nemese telejurnalisterdıŋ mätınındegı qatelermen küresedı.
«Leninşıl jas» gazetınde korrektorlyqtan bastadyq. Sondyqtan qate ataulyǧa janymyz qas» deidı būl turaly belgılı jurnalistıŋ özı. Mūqaǧali jaman jyr jazatyn bolsa, Äbdılda aǧasynyŋ aq taiaǧy arqasynda oinai ma dep qauıptense, bız qazır maqalada qate jıberıp qoiatyn bolsaq, Qainardyŋ qalamynan qorqatyn boldyq.
…Aǧa degen üş ärıpke jetıppız,
Aqyl degen tört ärıptı aita almai, – dep tüiındeidı «Ärıp pen ūǧym» atalatyn ataqty öleŋın aqyn dosymyz Ruslan Nūrbai. Aǧalyq jasqa jetken Qainardyŋ qalamynan qoryqsaq ta, öz basymyz mūny aqyl retınde ūǧamyz. Mäselen, tobyndaǧy «Redaksiialaudyŋ aşyq sabaǧy», «Audarmaǧa abai bolaiyq», «Gazettı qalai şyǧaru kerek?» siiaqty jazbalar kım-kımge bolsyn paidaly. Al jurnalisterge tıpten kerek keŋester.
Eŋbek jolyn qoi baǧudan bastady (bırneşe jyl būryn sol turaly «Qoi baqqan qiyn» atty kıtap şyǧardy). Qainar Oljaiǧa odan oi baqqan jeŋıl tidı me dep oilaimyz keide. Auylynan Almatyǧa ǧaşyqtyq dertı alyp kelgen. «Arman bolǧan qyzdy körgende bır jarym jylǧy sezımge suyq su qūiylǧanyn sezdık. Endı bır tırı aqyndy körıp auylǧa qaitpaq edık. Tūmanbai aǧamyzǧa sälem berıp, aldynda tūryp onnan astam öleŋın jatqa oqyǧan soŋ, qolymyzdan jetektep jurfaktyŋ dekany Qojakeevke aparǧan. «Bır balany oquǧa alsaŋ, mynany al. Özı tūrmaq atasyn tanymaimyn. Osy qara baladan keremet jurnalist şyǧady» degen. Alaida bızdı oquǧa alǧan soŋǧy sözdı Qojakeev emes, rektor Joldasbekov aitty. Sodan bastap ärbır maqalamyzdy Tūmanbai aǧa oqityndai küide otyryp jazyp kelemız. Mäŋgılık motivasiia!» dep eske alady sol kezeŋdı özı.
Būl jerde jyrǧa ǧaşyqtyǧy kömektesken. Öleŋdı jazuǧa kelgende özı de qara jaiau emes. Belgılı jurnalist, ǧalym Bauyrjan Omarūly «Keŋ örıs» atty essesınde Qainardyŋ atasy Oljai aqsaqal Kursk tübındegı şaiqasta bır qolyn qaldyryp, elge jaralanyp qaitqanyn, auruhanada esın jiǧan soŋ bır qoly joq ekenın körıp, ekınşı qolymen auylǧa öleŋmen hat jazǧanyn, keiıpkerımızdıŋ äkesı Qaliaqpardyŋ ınısı Qoŋyrǧazy bırauyz öleŋ şyǧarǧanyn, äjesı Hanymiia köne zamannan jetken öleŋ-jyrlardy köp bılgen kısı bolǧanyn jazady. Osyǧan qarap Qainar Oljaiǧa aqyndyq qanmen kelgenın paiymdaimyz. Alaida öleŋderın jariialamaidy. Bır otyrysta jyryn öz auzynan estıgen edık. «Köpır» dep atalatyn sol öleŋın ūnatyp, feisbukte jariialaudy sūradyq. Baqsaq, būl öleŋ jetpısınşı jyldar soŋynda Qazaq radiosy arqyly oqylǧan eken. Jastar poeziiasy turaly habardy jürgızuşı Amanhan Älım maqtaǧan. Semeide oblystyq gazette praktikada jürgende Merǧali İbraev aǧasynyŋ aldynda oqyp, jaqsy söz estıgen.
Maqalalarynda da aqyndardyŋ öleŋ şumaqtary jiı kezdesedı. Materialdary bızdı sonysymen de tartady. Taqyryp qoiuǧa da şeber. Özı aitpaqşy, «surettı qimyldatqan kinonyŋ bızdıŋ eldegı atasy Ämen Haidarov» turaly jazǧan alǧaşqy maqalalarynyŋ bırı «Qiyn önerdı qūlaǧynan bastaǧan» dep atalsa, ärı qarai «Şyraq soŋyndaǧy sūraq» dep ǧaryşqa samǧaidy. Bızdıŋ maqalamyzǧa da jaqsy taqyryp qoiyp bergenı bar. Aqyn Däuıtälı Stambekovtıŋ tuǧanyna 70 toluyna orai jazǧanymyzǧa «Arqada tuyp, Alatauda tüledı» degen taqyryp qoiǧanbyz. Gazetke sol taqyryppen şyǧyp ketken. Sony oqyǧan Qainar aǧa «Jūmyr jerdegı jäne bır būirabas» dep qoiylsa jön bolatynyn aitty. Endı kıtap şyǧaratyn bolsaq, sol maqalany aǧanyŋ qoiǧan taqyrybymen engızemız dep josparlap otyrmyz.
Seidahmet Berdıqūlov, Şerhan Mūrtaza syndy maitalman qalamgerlerdıŋ mektebınen ötkenı baǧy dep oilaimyz. «Bozaŋnan ızdeidı köz Berdıqūlovty», «Mūz däuırınen Mūrtaza däuırıne deiın» degen esselerdı jazyp, ūstazdarynyŋ aldynda paryzyn oryndady.
Jalpy, Qainar Oljaidyŋ qalamy kez kelgen taqyrypta jorǧalai ketedı. Kezınde, mysaly, kırdı qalai juu kerektıgı turaly «därısın» feisbukten oqyp, mūny da jazuǧa bolady eken dep taŋǧalǧanbyz. Ūstazymyz Talǧat Batyrhan gazetımızde jürgende «Qiiali dünie nege jazbaisyŋdar?» deuşı edı, al Qainardyŋ qalamynan şyqqan qiiali dünieler köp. Soǧan da süisınemız.
Ökınıştısı, Qainar Oljaidyŋ bırde-bır kıtaby qolymyzǧa tüspedı. Maqalalaryn äleumettık jelıden nemese gazetterden ǧana oqimyz. Sondyqtan şyǧarmaşylyǧyn tolyq tanimyz dep aita almaimyz. Kezınde Qainar aqmyltyq jurnalist Jūmatai Sabyrjanūlyna «Jüke, oqyrmandaryŋyzdyŋ eŋ naşary men bolaiyn» degen tılek aitqan edı. Şyn mänınde olai emestıgın bıletın ärıptesı soǧan qatty riza bolǧan. Bız qazır osy sözdı sızge, Qaineke, qaitalap aituǧa mäjbürmız. Oǧan kelısesız be, kelıspeisız be, özıŋız bılesız. Käsıbi merekemızben qatar kelgen mereitoiyŋyz qūtty bolsyn!
