Qazır Qazaqstan äskerınde on ekı myŋnan astam qyz-kelınşek qyzmet etedı. Onyŋ 800-ge juyǧy – ofiser, 20-sy – polkovnik jäne 5 myŋǧa juyǧy – azamattyq personal.
Ardana Botai Keŋes Odaǧynyŋ Batyry N.Äbdırov atyndaǧy Qaraǧandy aviabazasynda äskeri qyzmet atqarady. Ol, ärine, bırden äskeri ūşqyş bolǧan joq. Būl biıkke jetu üşın tabandylyq pen qaisarlyq tanytuyna tura keldı. Äuelı Qazaqstandaǧy memlekettık aviasiia ortalyǧyn bıtırıp, äuesqoi ūşqyş bılıktılıgın alady. Ony kezınde Aqtöbedegı ekı märte Keŋes Odaǧynyŋ Batyry T.Bigeldinov atyndaǧy Äue qorǧanysy küşterınıŋ äskeri institutyna qabyldamai qoiǧany da ras. Alaida qaisar qyz öz armanynan bas tartpai, Almatydaǧy azamattyq aviasiia akademiiasyna oquǧa tüsedı. Ekınşı kurstan keiın Ardana Finliandiiada oqyp, europalyq deŋgeidegı kommersiialyq ūşqyş lisenziiasyna ie bolady. Aldymen ol öte jeŋıl TL-2000, Tecnam P-2002 jäne Diamond DA42 ūşaqtaryn basqarudy üirendı. Bırtındep auyr An-26 äskeri-kölık ūşaǧyn jäne AERO L-39 Albatros oqu-äskeri ūşaǧynyŋ şturvalyna otyrady. Al ötken jyly aǧa leitenant Ardana Botai Su-30SM köpfunksionaldy joiǧyş ūşaǧynyŋ ekipaj komandirı retındegı bılıktılıgın Äue qorǧanysy küşterınıŋ bas qolbasşysy, aviasiia general-leitenanty N.Ormanbetovtıŋ aldynda däleldedı.
Bızdıŋ taǧy bır keiıpkerımız – Q.Qaisenov atyndaǧy mehanikalandyrylǧan brigadanyŋ äskeri qyzmetkerı Nūrgül Aimanbetova. Nūrgül – «Beibıtşılık sarbazy-2022» jarysynyŋ jeŋımpazy. Erkın küres, prezidenttık köpsaiys, qolma-qol aiqas, şaŋǧy tebu siiaqty sport türlerınıŋ şeberı. Joǧary sport şeberlıgı klubynyŋ, Qazaqstan sport psihologtary assosiasiiasynyŋ müşesı. 2015 jyly «Sport psihologiiasy» oqulyǧyn jazyp şyǧarǧan. 2007-2015 jyldary arasynda Qazaq sport jäne turizm akademiiasynda därıs bergen. Endıgı armany – äskeri psiholog bolu. Nūrgüldıŋ aituynşa, äskeri psihologiia turaly qazaq tılındegı oqulyqtar joqtyŋ qasy. Endı sol olqylyqtardyŋ ornyn toltyruǧa niettenıp otyr eken. «Talapty jeter mūratqa» demekşı, onyŋ būl maqsatqa da qol jetkızetınıne kümän joq.
Qazaq qyzdary elımızden tysqary jerde de ūlt maqtanyşyna ainalyp otyr. Osydan bırneşe jyl būryn otandyq jäne şeteldık BAQ qarşadai qazaq qyzynyŋ Qytaida äskeri kemenı ūrşyqşa üiırıp jürgenı turaly jazdy. Keme bolǧanda da ūşaqtardy tasityn alyp keme – avianosestıŋ şturvalyn ūstau er adamnyŋ özıne oŋai emes. Qazaqparattyŋ habarlauynşa, QHR azattyq armiiasynyŋ qūrylǧanyna 69 jyl toluyna orai äskeri jattyǧuda 1995 jyly tuǧan Jadyra Qabyl atty qazaq qyzy alyp äskeri ūşaq tasyǧyş kemenı jürgızgen. Sondai-aq 81.cn agenttıgınıŋ mälımetınşe, Jadyra Qabyl tızgındegen «Liiau Niŋ» – Qytai äskeri-teŋız küşterınıŋ eŋ ülken äskeri kemesı. Mūndaida «Men qazaq qyzdaryna qairan qalam» degen aqyn sözın qaitalaudan basqa şara joq.
Äbubäkır Smaiylov
