Elorda halqyn salauatty ömır saltyna beiımdeu maqsatynda köptegen igı şaralardyŋ qolǧa alynyp jatqany jasyryn emes. Solardyŋ bırı retınde halyqty jappai velosportqa tartu aiasynda ūiymdastyrylatyn jarystardy aituǧa bolady.
Ekınşı jaǧynan, qan ainalymdy qalypqa keltırıp, dene quatynyŋ odan ärı artuyna sebepşı bolatyn velosporttyŋ bolaşaǧyna degen senımımız de arta tüsude.
Astana künı jaqyndaǧan saiyn qolǧa alynyp jatqan būqaralyq şaralardyŋ ışınde velosiped tebuşılerge de uaqyt bölındı. Ony qala äkımı İmanǧali Tasmaǧambetovtıŋ özı bastap, Serık Säpiev, İlia İlin, Baqtiiar Artaev sekıldı Olimpiada chempiondary qoldau körsettı. Sonymen qatar, käsıpqoi sportşylarmen tıze qosa otyryp alǧa ūmtylǧan äuesqoilardyŋ soŋynan jedel järdem kölıkterı erıp otyrdy.
BEDELSÖZ
Qala äkımı İmanǧali Tasmaǧambetov:
«Süiıktı qalamyzǧa mahabbatymyzdy qalai körsetemız?! Ärine, onyŋ joly san tarau. Sonyŋ bırı, mıne – bügın sızder demalysqa qaramastan taŋmen şyǧyp, sport şeruıne qatystyŋyzdar! Osylaişa elordaǧa degen süiıspenşılıkterıŋızdı körsettıŋızder. Ol üşın öz atymnan, Astananyŋ barlyq halqynyŋ atynan myŋ da bır rahmetımdı aitamyn».
«Qaisar keruen» atty velojarys Saltanat saraiy aldynan «Astana-Arena» stadiony aralyǧyndaǧy 4600 metr qaşyqtyqqa sozyldy. Köpşılık ony jarty saǧat şamasynda baǧyndyrdy. Jarysqa resmi türde tırkelgen qatysuşylardyŋ jalpy sany – 1500 adam. Al, nömırsız beiresmi sport äuesqoilaryn esepke alar bolsaq, barlyǧy 2000 adam şamasyna juyqtaityny anyq. Tıptı, söre basynan osy bır ızgı şaraǧa öz ülesın qosqysy kelıp üş döŋgelektı «Baldyrǧan» velosipedın mıngen 3-4 jasar säbidı de baiqadyq. Veloşeruden tüsken qarjy mümkındıgı şekteulı azamattardyŋ sportyna bölınetın bolyp şeşıldı.
Nūrislam Qūspanǧali
