Elorda äkımı Baqyt Sūltanov qalalyq äkımdıktıŋ kezektı mäjılısınde tiıstı vedomstvolardyŋ basşylaryna äleumettık nysandardy paidalanuǧa berudı belgılengen merzımınen keşıktırmeudı tapsyrdy, dep habarlady Nūr-Sūltan qalasynyŋ resmi saity.
Äkımdık otyrysynda 2019-2020 jyldarǧa arnalǧan jylytu mausymyna daiyndyq turaly qala äkımınıŋ orynbasary Arman Tūrlybek mälımdedı. Onyŋ aituynşa, qalanyŋ energetikalyq jüiesıne kürdelı jöndeu jūmystary bastaldy. Biyl ūzyndyǧy 3,9 şaqyrym bolatyn jylumen qamtu jelılerın kürdelı jöndeu jäne 28570 şaqyrymdyq elektr jelılerın retke keltıru josparlanuda. «2019-2020 jyldarǧa arnalǧan jylytu mausymyna daiyndyq jäne ony ötkızuge qatysty qalalyq ştab qūryldy. Audan äkımderı audandyq ştabtar qūryp, qys mezgılınde tūrǧyndardan kelıp tüsken ötınışterdı tūrǧyn üilerge qyzmet körsetetın PİK jäne basqa da mäseleler boiynşa jylu beruge qatysty taldau jasau qajet» dedı Arman Tūrlybek. Tūrǧyn üi jäne äleumettık nysandar qūrylysy mäselelerı boiynşa äkımnıŋ orynbasary Nūrlan Nūrkenov baiandady. Qalada 228 kompaniia tūrǧyn üi salumen ainalysady. «Bızdıŋ taldauymyzşa, būzylu qaupı bar problemalyq nysandar bar. Būl – 336 myŋ şarşy metr nemese elordanyŋ türlı audandaryndaǧy 24 TK. Bız olardy erekşe baqylauǧa alamyz. Biyl bız tapsyrudy josparlap otyrǧan 4 äleumettık nysan boiynşa da qauıp tönıp tūr. Būl – № 31 köşesınıŋ oŋtüstıgıne qarai, Nūra-Esıl arnasynyŋ şyǧysyna qarai ornalasqan 1200 oryndyq mektep. Nysan daiyn, qasbet jūmystary jürgızılude. Qazır mektepke aparar jol da joq, sondai-aq injenerlık jelıler de tartylmaǧan. Bız mekteptı salǧanmen, oǧan aparatyn joldar men jelılerdı de qosa salu kerek» dedı ol. Baqyt Sūltanov Kölık jäne jol-kölık infraqūrylymyn damytu basqarmasynyŋ basşysy Ashat Qaraǧoişinge qysqa merzımde infraqūrylymdy jetkızu üşın barlyq qajettı şaralardy qabyldaudy tapsyrdy. «Şılde-tamyz ailarynda mūǧalımder jūmys ıstep, jaŋa oqu jylyna daiyndaluy tiıs. Nysan şılde aiynda injenerlık jelılermen bırge tapsyryluy tiıs» dep atap öttı qala äkımı. Nūrlan Nūrkenovtıŋ aqparaty boiynşa qazırgı taŋda Nūr-Sūltan qalasynda 102 äleumettık jäne mädeni nysan, onyŋ ışınde biudjet qarajaty esebınen 29 nysannyŋ qūrylysy jürgızılude. Būl – 19 mektep pen olarǧa japsarlas ǧimarattar, bır balabaqşa. Densaulyq saqtau salasyndaǧy sifrlandyru turaly Qoǧamdyq densaulyq saqtau basqarmasynyŋ basşysy Marat Şoranov baiandama jasady. Onyŋ aituynşa, bügın 083, 086, 094, 095 medisinalyq anyqtamalar, auruhanalyq paraqtar men medisinalyq kıtapşalar medisinalyq aqparattyq jüiede tırkelıp, barlyq qalalyq medisinalyq ūiymdarda berıledı. «Qazırgı uaqytta atalǧan mäselenı memlekettık tapsyrys alatyn jeke medisinalyq ūiymdar arasynda jüzege asyru jūmystary jürgızılude. Sonymen qatar, qazırgı uaqytta QR Densaulyq saqtau ministrlıgı qataŋ eseptılık blankılerınde mörsız uaqytşa eŋbekke jaramsyzdyq paraǧyn beru üşın elordalyq densaulyq saqtau salasynda pilottyq jobany jürgızu mümkındıgın qarastyruda. Būl şara biudjet qarajatyn ünemdeuge mümkındık beredı» dedı ol. Sondai-aq, basqarma basşysy qalalyq medisina salasyndaǧy mälımetterdı jinalyp, taldau jürgızıletın bıryŋǧai situasiialyq ortalyqtyŋ jūmysy turaly aitty. Osy rette Baqyt Sūltanov ana ölımıne qatysty mäselelerge sapaly taldau qajettıgın atap öttı. «Jüktı äielderdı aldyn ala şaqyru, olardy esepke qoiu, ünemı qoŋyrau şalu qajet. Zamanaui medisina salasyndaǧy jobalardy jalǧastyru maŋyzdy» dedı qala äkımı.
