Elordamyzdyŋ tarihyna köz jügırter bolsaq, 1961 jyly qalanyŋ aty Selinograd bolyp özgertıldı. Qalanyŋ köşelerı būryn qandai edı? Tyŋ igeruşıler qalasy, eŋbekqor jastar qalasy, ükılegen ümıtter qalasy… jyldar ötken saiyn qalai özgerıp jatyr?
Bügın bız «Arhivtı aqtarǧanda…» atty aidarymyzdy aşyp, onyŋ jürgızuşısı Nūr-Sūltan qalasy memlekettık arhivınıŋ ǧylymi-zertteu bölımı basşysy Ǧaziza İsahannyŋ mälımetterı boiynşa maqalalar berudı bastaimyz.
Būryn Aqmola, Selinograd atanǧan qalanyŋ bügıngı kelbetı adam tanymastai özgerdı. Qazırgı elordamyzdyŋ sän-saltanatyn, tüngı astanamyzdyŋ közdıŋ jauyn alar sūlulyǧyn tamaşalauǧa respublikamyzdyŋ, sonymen qatar älemnıŋ tükpır-tükpırınen turister kelıp jatady. Bügınde şahardy ekıge bölıp jatqan Esıl özenınıŋ qos jaǧalauyn jalǧastyrǧan bırneşe köpır bar. Arhiv suretterıne zer salyp qarasaq, qalanyŋ qalai özgergenın köruge bolady.
Älemdık örkeniettıŋ bır belgısı köpır salu bolsa, ırgesı qalanǧanyna köp uaqyt bolmaǧan elımızdıŋ astanasy būl baǧytta da sol örkenietke bet tüzep keledı. Mäselen, Aqmola jūmysşy deputattary keŋesı atqaru komitetınıŋ 1961 jylǧy 15 aqpandaǧy №43/4 şeşımımen bır kezderı Esıldıŋ oŋ jaǧalauy men sol jaǧalauyn jalǧaǧan jalǧyz köpırdıŋ qūrylysy turaly qaulysy qabyldanǧan bolatyn. Är köpır özındık qaitalanbas arhitekturasymen erekşelenedı. Keiınnen astana äkımdıgınıŋ 2009 jylǧy 14 qyrküiektegı №70 qaulysy jäne elordalyq mäslihattyŋ 2009 jylǧy 18 qyrküiektegı №253/38-IV şeşımımen Jeltoqsan köşesın qalalyq saiabaqpen qosatyn, Esıl özenı arqyly ötetın jaiau jürgınşıler köpırı «Seruen» dep ataldy. Būl nysan bır kezderı, joǧaryda aitqanymyzdai, osydan 58 jyl būrynǧy Esıldıŋ oŋ jaǧalauy men sol jaǧalauyn jalǧaǧan jalǧyz köpırdıŋ ornynda qaitadan salynyp otyr. Ūzyndyǧy 240 metrden asatyn, enı 25 metr bolatyn köpır qūrylysynda qazırgı zamanǧy tehnologiialar keŋınen paidalanylǧan. Ol halyqaralyq standarttarǧa tolyq jauap beredı. Köpırdıŋ üstınen ötken adam özın erke Esıldıŋ tolqyndaryna terbelgendei sezınedı. Sebebı köpır arnaiy serıppelerdıŋ üstıne ornatylǧan. Bügınde elordanyŋ eskı bölıgı men jaŋa audanyn jalǧap jatqan Esıl özenınıŋ jaǧalauy qala tūrǧyndary men qonaqtarynyŋ süiıktı demalys ornyna ainalǧan.
Jadyra MŪRATBEKOVA
