Keşe elorda äkımı Altai Kölgınov Ekologiia, geologiia jäne tabiǧi resurstar ministrı Maǧzūm Myrzaǧalievpen bırge tūrmystyq qaldyqtardy öŋdeu keşenıne bardy.
Astanada ornalasqan qaldyqtardy qaita öŋdeitın zauyt – qaitalama şikızatty qalpyna keltıru arqyly qatty qaldyqtardy sūryptaityn, sondai-aq sūryptalǧan plastmassalardy öŋdeitın öndırıstık nysandary bar qaladaǧy jalǧyz käsıporyn. Elordada 65 qoqys şyǧaratyn kompaniiadan keşenge kün saiyn 950 tonna qatty tūrmystyq qaldyq tüsedı.
Elımızde ötkızılgen ıs-şaralar qatty qaldyqtardy qaita öndeu ülesın 2018 jyly 11,51 prosentke deiın arttyruǧa mümkındık berdı, al 2017 jyly būl körsetkış 9 prosenttı, 2016 jyly 2,6 prosenttı qūraǧan bolatyn. Bügıngı taŋda respublika boiynşa 204 qala men audannyŋ ışınde 51 eldı mekende – ärtürlı kezeŋderde bölek jinau ädısı, 30 eldı mekende sūryptau ädısı engızılgen.
Qatty qaldyqtardy öŋdeu salasyn odan ärı damytu üşın qolaily investisiialyq ahual, memlekettık qoldau şaralary, memlekettık jäne jergılıktı biudjetterden qarajat bölu, sondai-aq jeke investisiialardy tartu qajet. Osyǧan orai Ekologiia, geologiia jäne tabiǧi resurstar ministrlıgı müddelı memlekettık organdarmen jäne ūiymdarmen bırlesıp qatty tūrmystyq qaldyqtardy basqaru salasyndaǧy memlekettık baǧdarlamany äzırleu boiynşa şaralar atqaryp jatyr. Qatty tūrmystyq qaldyqtardy jekelei jinaudy jemıstı jüzege asyruda halyqtyŋ ekologiialyq sanasy men mädenietı de maŋyzdy röl atqarady. Sondyqtan ekologiialyq bılımdı arttyru maqsatynda respublikalyq jäne jergılıktı deŋgeide auqymdy aqparattyq jūmystar da jürgızılude.
