Ötken aptada Q.Quanyşbaev atyndaǧy Qazaq memlekettık akademiialyq muzykalyq drama teatry 30 jyldyǧyn keŋınen atap öttı.
Täuelsızdık jäne öner oşaǧynyŋ mereitoilary aiasynda «Altaidan auǧan el» spektaklınıŋ premerasy, «Rejisser Jaqyp Omarov» kıtaby men fotoalbomnyŋ tanystyrylymy, teatr muzeiınıŋ aşyluy öttı. Teatr direktory Ernar Jūmataevty Nūr-Sūltan qalasynyŋ äkımı Altai Kölgınov qabyldap, Memleket basşysy Qasym-Jomart Toqaevtyŋ Alǧys hatyn tapsyrdy.
Bırınşı küngı şaraǧa Mädeniet jäne sport ministrı Aqtoty Raiymqūlova arnaiy qatysyp, Täuelsızdık jäne teatr mereitoiymen qūttyqtady. Ūjymǧa memlekettık marapattardy tapsyrdy. Qazaqstannyŋ halyq ärtısı Tılektes Meiramov «Halyq alǧysy» medalımen, bırqatar qyzmetkerler «Qazaqstan Täuelsızdıgıne 30 jyl» merekelık medalımen, «Mädeniet salasynyŋ üzdıgı» tösbelgısımen marapattaldy.
Spektakl Halifa Altaidyŋ «Altaidan auǧan el» jäne Hasen Oraltaidyŋ «Elım-ailap ötken ömır» şyǧarmalary jelısımen qoiyldy. Qoiuşy rejisserı – Farhad Moldaǧali. Sahnalyq nūsqasyn jasaǧan – Miras Äbıl.
Ötken ǧasyrdyŋ otyzynşy jyldary Qytaidyŋ qol astyndaǧy Şyǧys Türkıstan qazaqtary sol eldıŋ ozbyr saiasatyna şydamai, bas köterdı. Bır qauym el, barlyǧy 18 myŋ adam otyrǧan oryndaryn tastap, Ündıstan jaqqa üderı köştı. Taklamakan şölınen ötıp, Gimalai tauyn asty. Sol jolda qanşama qiyndyqtardy kördı. Qanşama jan qūrban boldy. Aqyry eluınşı jyldary Türkiia memleketı Päkıstan jäne Ündıstandaǧy qazaqtarǧa kömek körsetıp, öz elderıŋde qabyldau turaly arnaiy qūjat qabyldady. Bıraq Stambulǧa aqyr aiaǧynda 1400-ge juyq qazaq qana jetıp, bır-bırımen qauyşty.
Qoiylym osy qasırettı tarih turaly syr şertedı. Onda basty oryn osy köştı bastaǧan Qalibek Raiymbekūlyna berıldı. Onyŋ beinesın belgılı ärtıs, Qazaqstannyŋ eŋbek sıŋırgen qairatkerı Quandyq Qystyqbaev somdady. Jalpy spektaklge myqty akterlık qūram qatysty. Atap aitqanda, Qazaqstannyŋ halyq ärtısı Tılektes Meiramov, Qazaqstannyŋ eŋbek sıŋırgen qairatkerlerı Nūrken Öteuıl, Ainūr Bermūhambetova, Qazaqstannyŋ eŋbek sıŋırgen qairatkerı, Memlekettık syilyqtyŋ iegerı Altynai Nögerbek, Täuelsızdık mereitoiyna orai «Qūrmet» ordenımen marapattalǧan Erjan Nūrymbet, t.b. belgılı ärtıster tartyldy.
Qoiylym leitmotivıne Almahan Kenjebekovanyŋ muzykasy men Ermūrat Zeiıphannyŋ tuǧan jerge saǧynyşqa toly «Künes-ai» änı alyndy. Osy muzyka oqiǧalar jelısımen qabysyp, sai-süiektı syrqyratady. Qazaqtyŋ älemge tarydai şaşyluy da ädemı körsetılgen. Jalpy sättı rejisserlık şeşımder jeterlık. Mäselen, osy köş barysynda Qalibek Raiymbekūlynyŋ qyzdarynan aiyryluy, ūlt bolaşaǧyn tūspaldaityn besıktıŋ sahnaǧa şyǧaryluy siiaqty körınıster beijai qaldyrmaidy. Sahnadan osy köş barysynda şeiıt ketkenderge oqylatyn dūǧa äserdı küşeite tüsedı. Osy spektakl myŋdaǧan qūrbandar ruhtaryna taǧzym ıspettes tuyndy. Jalpy teatrǧa ǧana emes, kinoǧa sūranyp tūrǧan şyǧarma.
Ekınşı küngı şaralar teatrdyŋ negızın qalaǧan Jaqyp Omarovtyŋ basyna baryp, qūran baǧyştaudan bastaldy. «Rejisser Jaqyp Omarov» kıtabynyŋ tanystyrylymyna Halyq ärtısı, Qazaqstannyŋ Eŋbek Erı Asanälı Äşımov bastaǧan qonaqtar, öŋırlerdegı teatrlardyŋ basşylary qatysty. Al kıtapty teatrdyŋ «Qoǧammen bailanys jäne marketing» bölımınıŋ meŋgeruşısı Äsem Namazbekova qūrastyrdy. Oǧan rejisserdıŋ sūhbattary, ol turaly estelıkter toptastyrylǧan. «Astana aqşamy» gazetınde jaryq körgen osy joldar avtorynyŋ «Jaqyptyŋ jüregı» maqalasy da endı. Tanystyrylym barysynda da köz körgender estelıkterın aityp, teatr önerınıŋ özektı mäselelerın qozǧady. Al fotoalbomda teatrdyŋ jarqyn sätterınen suretter toptastyryldy.
Teatr muzeiınde Qalibek Quanyşbaevtyŋ qoldanǧan zattary, spektaklderde jäne kinoda rölderdı somdau kezınde kigen kiımderı,öner oşaǧy tarihynan syr şertetın qūjattar, Jaqyp Omarovtan qalǧan jädıgerler, ömırdıŋ soŋǧy jyldary teatr direktorynyŋ keŋesşısı qyzmetın atqarǧan synşy Äşırbek Syǧaidyŋ portfelı siiaqty mūralar jinaqtaldy. Erekşe atap öterlıgı, «Aqmola aqiqaty» (qazırgı «Astana aqşamy») gazetı 1991 jyldyŋ 14 qaraşasynda şyqqan nömerınde «Qazaq muzykalyq drama teatry şaŋyraq köterdı» dep jūrttan süiınşı sūrady. Būl gazet betı de teatr muzeiı törınen oryn aldy. Taǧy bır qūjat – QazKSR Mädeniet jönındegı memlekettık komitetınıŋ töraǧasy Qanat Saudabaevtyŋ qoly qoiylǧan Jaqyp Omarovty Selinograd oblystyq qazaq muzykalyq-drama teatrynyŋ körkemdık jetekşısı qyzmetıne taǧaiyndau turaly būiryq. Būl būiryq 1990 jyldyŋ 17 tamyzynda şyqqan. Teatr tarihyn sodan bastauǧa bolady.
Otyz jyldyq tarihynda Qalleki teatry talai belesten ötıp, köp jetıstıkke jettı. Byltyr öner oşaǧy Elbasy Nūrsūltan Nazarbaev jäne Memleket basşysy Qasym-Jomart Toqaevtyŋ qoldauymen boi kötergen jaŋa, keŋ, eŋselı ǧimaratqa köştı. Osylaişa ūjymnyŋ talai jylǧy armany oryndaldy. Demek, alda da şyǧarmaşylyq örleuge negız bar. Sony tıleimız!
