Qazırgı taŋda Astanada 22 invataksi avtokölıgı mümkındıgı şekteulı jandarǧa qyzmet körsetedı, onyŋ 10-y mügedek balalarǧa arnalǧan. Alaida invataksi qyzmetın paidalanuşylar sany künnen künge ösıp keledı. Osyǧan orai, 2019 jyly atalǧan taksi türıne memlekettık tapsyrys köbeiedı. Aldyn ala jasalǧan boljam boiynşa, 2019 jyly mümkındıgı şekteulı balalarǧa arnalǧan 3 invataksi avtokölıgı ıske qosylady.
MENIŊ ŪSTANYMYM- AŞYQ BAILANYS
Keşe Astana äkımı Baqyt Sūltanov dialog.egov.kz saitynda onlain-konferensiia ötkızıp, elorda tūrǧyndaryn mazalaǧan saualdarǧa jauap berdı. Solardyŋ bır parasyn «Astana aqşamy» gazetınıŋ oqyrmandarynyŋ nazaryna ūsynyp otyrmyz.
Mariia Gareeva:
Astanalyqtar būrynǧy äkım Äset İsekeşevtıŋ äleumettık jelılerdegı tūrǧyndardyŋ kötergen mäselelerıne jedel ün qatuyna üirenıp qaldy. Sız nege belsendılık tanytpaisyz? Özıŋızdıŋ Facebook-taǧy jäne özge äleumettık jelılerdegı paraqşalaryŋyzdy «tırıltpeisız» be?
– Astanalyqtardyŋ şaǧymy men qajettılıkterıne jedel ün qatu jüiesı saqtalyp qana qoimai, odan ärı küşeiedı. Öitkenı elordalyqtarmen aşyq bailanys jasau – būl tek uaqyttyŋ ǧana talaby emes, menıŋ de ūstanymym osyndai. Äkımdık aldaǧy uaqytta halyqpen qarym-qatynasyn şirata beredı. Men bos uaqytym bolǧanda Facebook-tı jäne özıme kelgen barlyq şaǧym, ūsynystardy oqimyn.
Samal Aqanova, 2-toptaǧy mügedek:
Qūrmettı Baqyt Tūrlyhanūly! Ai saiyn kalimin därısın üiımnıŋ mekenjaiy boiynşa emhanadan alyp tūruşy edım. Bıraq osy jyldyŋ basynan berı därıgerler: «Därı joq» dep jazyp bermei qoidy. Men ol därını kündelıktı qabyldaimyn. Sızden osyǧan orai kömek sūraimyn.
– Qūrmettı Samal! Kalimin därısın jetkızu boiynşa bırşama qiyndyq bolǧany ras. Bügıngı taŋda ol därı qala emhanalarynda bar.
Sondyqtan özıŋız tırkelgen emhanaǧa nemese qoǧamdyq densaulyq saqtau basqarmasyna habarlasyŋyz. Bailanys telefony: 556829 nemese 1439 nömırı arqyly tegın berıletın därı-därmekterdıŋ tızımın köre alasyz.
Erlan Säkenov:
«Nūrly jol» vokzal keşenınıŋ estakadasyna jeke avtokölıktı qoiuǧa bola ma jäne tariftıŋ özgeruı josparlanǧan ba? Qystygünı ol jerde avtobustar köktaiǧaqtan şyǧa almaidy.
– Būl mäsele tolyq qarastyryldy. Aşyq baiqau ötkızılıp, ony «Astana avtotūraqtar keŋıstıgı» JŞS jeŋıp aldy. Qazırgı kezde vokzaldyŋ aumaǧynda jabdyqtar ornatylyp, avtotūraqtardyŋ oryndary salynuda. 2019 jyldan bastap estakadaǧa ekı jaǧynan kıretın esık aşylady. Al tarifter kelısılgen soŋ, aşylardyŋ aldynda jariialanady. Jeŋıldıgı bar azamattar vokzaldyŋ avtotūraǧyn äleumettık jaǧdaiyna säikes paidalana alady.
Mariia Gareeva:
Elordadaǧy «Äbu-Dabi Plaza» ǧimaratynyŋ qūrylysy qaşan aiaqtalady?
– Eŋ aldymen, 2019 jyldyŋ 30 qazanynda «Äbu-Dabi Plaza»-nyŋ janyndaǧy sauda ortalyǧynyŋ, 30 jeltoqsanynda qonaqüi keşenınıŋ qūrylysy aiaqtalady. Al ǧimarattaǧy tūrǧyn üi keşenı 2020 jyly 30 qaŋtarda salynyp bıtedı. Bırınşı jäne ekınşı keŋselık ǧimarattardyŋ qūrylysy 2020 jyly 1-31 qaŋtarynda aiaqtalady. Al eŋ biık köpbeiındık keşen 2020 jyly 30 mausymda paidalanuǧa berıledı.
Erlan Säkenov:
«Astana Mall» sauda-sattyq jäne oiyn-sauyq ortalyǧynyŋ artyna ne salynady? Būl aumaq köpten berı bos jatyr.
– Täuelsızdık daŋǧyly, B.Mailin köşesı, M.Jūmabaev pen B.Momyşūly daŋǧyldary şekaralarynyŋ aumaǧyn egjei-tegjeilı josparlau jobasyna säikes, «Astana Mall» sauda, oiyn-sauyq ortalyǧynyŋ artyna kelesı nysandardy salu josparlanyp otyr: qosymşa ǧimarattary men parkingı bar köppäterlı tūrǧyn üi keşenderı, 1200 oquşyǧa arnalǧan jalpy bılım beretın mektep, mektepke deiıngı bılım beru nysandary, qyzmet körsetu nysandary, kommersiialyq ǧimarattar men avtotūraǧy bar tūrǧyn üi keşenderı, balalar ortalyǧy, sport keşenı.
Aigül Myŋjasar:
Astanada qoǧamdyq kölıkte elektrondy esep-aiyrysu jappai engızılgelı berı avtobustar jolauşylardy tek aldyŋǧy esıkten kırgızıp, köp jaǧdaida jürgızuşıler jolauşylardyŋ validasiia jasauyn qadaǧalaityn boldy. Būl qoǧamdyq kölık jürgızuşısın negızgı qyzmetınen alaŋdatyp, qauıptı jaǧdailarǧa sebep boluy mümkın. Sondai-aq keibır avtobustarda jürgızuşıden bölek taǧy bır qyzmetker jūmys ısteidı, olardyŋ qyzmetı är jolauşydan «validasiia jasadyŋyz ba?» dep sūrau jäne salonda ärı-berı jolauşylardyŋ mazasyn alyp jüru ǧana. Al kerısınşe «KBD» degen jazuy bar jilet kigen qyzmetkerlerdıŋ eşqandai baqylau-tekseru jūmystaryn jürgızbei, jyly aialdamalarda jylynyp tūratyndaryn ǧana körıp jürmız. Eger tekseru-baqylau jūmystary küşeitılse, aqy tölemeitın jolauşylar azaiyp, salonda artyq qyzmetkerdıŋ qajetı bolmas edı.
– Astana qalasynyŋ «Astana LRT» JŞS qyzmetkerlerı kündelıktı qoǧamdyq kölıktık baǧyttarda jürgızıletın monitoring barysynda tölem jasaudan bas tartqan 5 736 azamatty anyqtady. Olar ışkı ıster organdary qyzmetkerlerımen Kodekstıŋ 622-babynyŋ 2-bölımıne säikes 27 mln-nan astam teŋgege äkımşılık jauapkerşılıkke tartyldy.
Arşat Orazov:
Qaiyrly kün! Sızge qaladaǧy taksilerge qatysty sūraq qoiǧym keledı. 3 balam bar, bıreuı mügedek. Kün saiyn arnaiy balabaqşaǧa jäne basqa da ortalyqtarǧa aparyp tūramyz. Qalada invataksi qyzmetı bar, ol tegın, bıraq sūranys köp bolǧandyqtan, invataksi bärıne jete bermeidı. İnvataksi sanyn köbeitseŋızder. Bus Lane arqyly jüre beretın Astana taksi qyzmetı qymbattau. «Iаndeks-taksi» siiaqty jeke taksi türlerı sūranys köp saǧattarda tym qymbat aqy sūraidy. Bälkım, memleket tarapynan qarapaiym tūrǧyndarǧa qoljetımdı taksi qyzmetın qosu kerek bolar?
– Jūmyspen qamtu jäne äleumettık qorǧau basqarmasynyŋ mälımetı boiynşa, qazırgı taŋda Astana qalasy boiynşa 22 invataksi avtokölıgımen mümkındıgı şekteulı jandarǧa qyzmet körsetude, onyŋ 10-y mügedek balalarǧa arnalǧan. Būl maqsatqa memlekettık biudjetten 2018 jyly 115 841 myŋ teŋge qarjy bölındı. İnvataksi qyzmetın paidalanuşylar sanynyŋ künnen künge köbeiuıne bailanysty jäne qyzmet aluşylar tarapynan tüsıp jatqan ötınışterın eskere otyryp, joǧaryda atalyp ötken basqarma tarapynan 2019 jylǧa invataksi qyzmetıne memlekettık tapsyrysty arttyru boiynşa tiıstı biudjettık ötınım berılgendıgı turaly habarlaimyn. Aldyn ala jasalǧan boljam boiynşa, 2019 jyly mümkındıgı şekteulı balalarǧa arnalǧan 3 invataksi avtokölık qosylatyn bolady.
Erlan Säkenov:
Täuelsızdık daŋǧylynan Kerei-Jänıbek handar köşesıne deiıngı köpır qaşan tapsyrylady? Ūly Dala köşesınen vokzalǧa deiın aparatyn köpırdıŋ qūrylysy qaşan bıtedı?
– Bügınge deiın Täuelsızdık daŋǧylyndaǧy köpırdıŋ jobalau jūmystary aiaqtaldy. Qūrylystyŋ bastaluy 2019 jylǧa josparlanǧan. Ol nysan 2020 jyly tolyq salynyp, paidalanuǧa berıledı. Sonymen qatar, qazır Ūly Dala daŋǧylynyŋ Täuelsızdıkten Ş. Qaldaiaqov köşesıne deiıngı bölıgınde köpır qūrylysynyŋ jobasy jüzege asyryluda. Būl joba da 2019 jyly aiaqtalyp, nysandar paidalanuǧa berıledı.
Erlan Säkenov:
Qaiyrly kün! LRT qūrylysynyŋ ekınşı jelısınıŋ baǧdary qandai bolady? Būl qūrylystyŋ ekınşı kezeŋın qai jerden köre alamyz? Ministrlıkter üiınıŋ janynda LRT-nyŋ stansasy bola ma?
– Bügıngı taŋda LRT qūrylysynyŋ 2-jelısınıŋ baǧdary älı bekıtılgen joq. Osy jūmys boiynşa tehnika-ekonomikalyq negızdeme daiyndauǧa konkurstyq şaralar jürgızılude. TEN nätijesı boiynşa, ekınşı kezeŋnıŋ baǧdary men stansalary belgılı bolady. Ministrlıkter üiınıŋ janynda 113-stansany salu josparlanǧan. Onyŋ joly men qūny TEN daiyndalǧan soŋ anyqtalady. Bırınşı kezeŋnıŋ jobalary aiasynda Ministrlıkter üiınıŋ maŋynan Mäŋgılık El jäne Syǧanaq köşelerınıŋ qiylysynda stansa salu josparlandy. Qazır osy stansanyŋ qazyǧyn qaǧu jūmystary jürıp jatyr.
