Täuelsızdıktıŋ şirek ǧasyrlyq toiyna orai ūiymdastyrylyp jatqan igı ıster az emes. Osynau uaqytta öz qoly öz auzyna jetıp, öz-özın qamtamasyz etetındei deŋgeige köterılgen Astanada äleumettık jaǧynan az qamtylǧan aǧaiyn nazardan tys qalmady. Jaqynda elordanyŋ äkımı Äset İsekeşevtıŋ bastamasymen egemendıgımız jariialanǧan jeltoqsan aiyn tügel qamtityn «Astana – meiırımdı qala» aksiiasy bastalyp kettı. Osy ailyqtyŋ aiasynda qaladan qaşyqtau ornalasqan «Qamqor» äleumettık qyzmet körsetu ortalyǧy da Täuelsızdık künın atap öttı.
Mümkındıgı şekteulıler merekelık konsert qoidy
Şahar şetındegı «Qamqordyŋ» qamköŋıl jūrty şettep qalmasyn dep halın bıluge, merekemen qūttyqtap, köŋılın aulauǧa qalalyq Eŋbek, jūmyspen qamtu jäne äleumettık qorǧau basqarmasynyŋ ökılderı men bır top öner adamdary Astanadan arnaiy at terletıp baryp qaitty.
Bızdı elorda äkımdıgıne qarasty kommunaldyq-memlekettık mekemesınıŋ direktory Nūrbol Zūlqarnaev bastaǧan bır top äleumettık qyzmetkerler jylyūşyrai qarsy aldy. Būl ortalyq kämelettık jasqa tolǧan psihonevrologiialyq auytqulary bar jäne tūrmystyq jäne medisinalyq kütımdı talap etetın jandardyŋ tūraqty tūruyna arnalǧan.
Mūndaǧy jūrttyŋ kıreberısten bastap körsetken ıltipatynan merekege ynty-şyntysymen daiyndalǧany baiqaldy. Aldymen qyzmetkerler men osy jerdıŋ tūrǧyndary bırlesıp ūiymdastyrǧan konserttı tamaşaladyq. Nazarymyzdy än-biımen ǧana emes, är şyqqan saiyn auystyrylǧan aluan türlı kiımderı de audardy. Söitsek, būl kostiumderdıŋ bärın osyndaǧylar özderı tıkken eken. Būny keiınırek bıldık.
Konsertte Astana qalasy Eŋbek, jūmyspen qamtu jäne äleumettık qorǧau basqarmasy basşysynyŋ orynbasary Säule Nūrǧojina arnaiy söz alyp, ystyq lebızın jetkızıp, ortalyqta künı-tünı erınbei kömegın tigızıp jürgen äleumettık qyzmetkerlerdı marapattady. Ol bügınde osy salada qyzmet etetınderdıŋ eŋbegı erekşe eskerıluı kerek ekenın aitty.
Soŋyna qarai sahnanyŋ törıne belgılı estrada jūldyzy Bauyrjan İsaev köterıldı. Ony körgen köpşılık qolpaştap, änın bırge qosylyp şyrqady. Änşınıŋ özı būl jerge ekınşı ret taban tırep tūr eken. Sondyqtan jüzı tanystar būryn tyŋdaǧan süiıktı änderın aituǧa qolqa saldy. Bauyrjan elordaǧa qonys audarǧanyna tört jyl bolǧanyn, osy uaqyt aralyǧynda qaladaǧy qaiyrymdylyq şaralaryna jiı qatysatynyn, sonyŋ ışınde Qarttar üiıne de bırneşe ret baryp, än şyrqap, ülkenderdıŋ razylyǧyn alǧanyn aitty.
Oǧan qosa, aty endı tanyla bastaǧan änşı Asqar Jailaubaev ta ortaǧa şyǧyp, öner körsettı.
Äleumettık qyzmetkerlerdıŋ eŋbegı adal
Konsertten keiın mekeme basşysy Nūrbol Zūlqarnaev kelgen qonaqtarǧa ortalyqtyŋ tynys-tırşılıgımen tanystyryp, aralatty. «Qamqor» äleumettık qyzmet körsetu ortalyǧy Astana qalasy äkımdıgınıŋ qaulysymen 2005 jyldyŋ aqpan aiynda qūrylǧan eken. Qazır būl jerdıŋ qamqorlyǧynda 258 adam bar. Olarǧa äleumettık sipatta medisinalyq; tūrmystyq; psihologiialyq; mädeni; eŋbektık; ekonomikalyq jäne qūqyqtyq qyzmet türlerı körsetıledı.
– Men būl mekemede äleumettık jūmys jönındegı maman bolyp 2013 jyldan berı qyzmet etemın. Menıŋ mındetıme jeke jūmys josparlaryn jasau jäne olardyŋ dūrys oryndaluyn qadaǧalau, toqsan saiynǧy qyzmet aluşylardyŋ jaǧdaiyndaǧy özgerısterge monitoring jasau, qajetıne qarai özgerıster engızu, qamqordaǧylardyŋ qūjattaryn jürgızu, mügedekterdıŋ qajettılıkterıne sai gigienalyq qūral-jabdyqtar, jürıp-tūruǧa arnalǧan kömekşı qūral-jabdyqtar alu, qyzmet aluşylardyŋ qūqyqtaryn qorǧau jatady. Osynda jūmys ısteu psihologiialyq qiyn jäne jauapkerşılıgı köp bolǧanymen, öte qyzyqty. Sebebı būl jerde bız mümkındıgı şekteulı mügedek jandarǧa kömektesemız. Tamaqtary toq, kiımderı bütın, bos uaqyttaryn tiımdı ötkızedı. Sondai-aq, türlı merekelık konsertter, sporttyq şaralardan tys qalmaidy. Kündelıktı jūmysqa kelıp, olardyŋ jaidary jüzderın körıp, eŋbekterımızdıŋ eş ketpegenın baiqaimyn. Olardyŋ özderın osy qoǧamnyŋ tolyqqandy müşesı retınde sezınuı üşın memleket bar jaǧdaidy jasauda, – deidı ortalyqtyŋ qyzmetkerı Köken Nazarbek.
Ortalyqtyŋ jalpy aumaǧy 7 gektardy alyp jatyr. Mūnda kündelıktı ömırge qajettı dünielerdıŋ bärı bar. Basy auyryp, baltyry syzdasa, därıgerlerı de osynda, uaqytynda tamaqtandyratyn aspazdary da osynda, tıptı şaşyn qidyram dese, arnaiy ştatta jūmys ısteitın şaştarazdar da bar eken. Tıs därıgerı Elena Golovina 25 jyldyq täjıribesı baryn, mūnda biyldan bastap ıstep jatqanyn, özınen kömek sūrap kelgenderge tıs jūlu jäne emdeu; parodonta jäne auyz quysynyŋ basqa da aurularyn emdeu siiaqty em-dom şaralaryn jasaidy.
Aitpaqşy, joǧaryda aitqan merekelık kiımderdı tıgetın şeberhana da jūmys ısteidı. Ūlttyq kiımderge toltyrylǧan bölmenı kördık.
– Bes jyldan berı osyndamyn. Mındetım – äleumettık-eŋbektık qyzmet türın körsetu. Eŋbek terapiiasynyŋ kabinetınde suret salu, ärtürlı täsıldermen tıgu, biserden türlı būiymdar jasau, qaǧaz jäne basqa da materialdardan tuyndylar jasau siiaqty qolöner şeberlıgıne baulimyz. Künıne eŋbek terapiiasy kabinetıne 15 qyzmet aluşy keledı. Būl jattyǧular qol matorikasyn damytu, şyǧarmaşylyq oilar tuyndauyna jäne fantaziiasyn arttyruǧa kömektesedı, – deidı eŋbek nūsqauşysy Aliia Aqqoşqarova.
Direktordyŋ aituynşa, 2017 jyly ortalyq auqymyn keŋeitıp, taǧy 100 adamdy syidyra alatyn jaŋa nysanyn aşady. Qazır būl nysannyŋ qūrylysy da äjepteuır közge körınıp qalypty.
Orynbek ÖTEMŪRAT
