Elımızde qazannyŋ soŋǧy jeksenbısınde äleumettık qyzmetkerler künı atalyp ötedı. 2011 jyly bastau alǧan käsıbi mereke biyl 29 qazanǧa säikes kep tūr. Äsırese densaulyq saqtau jüiesındegı äleumettık-medisinalyq jūmys densaulyqty qalpyna keltıruge, saqtauǧa jäne nyǧaituǧa baǧyttalǧan medisinalyq, psihologiialyq, pedagogikalyq jäne äleumettık-qūqyqtyq sipattaǧy multitärtıptık käsıptık qyzmetten tūrady. 2005 jyly Astana qalasy äkımdıgınıŋ janynan qūrylǧan «Qamqor» äleumettık qyzmet körsetu ortalyǧynyŋ jūmysy da osy äleumettık qyzmet körsetumen tyǧyz bailanysty.
Kämelet jastan asqan, psihonevrologiia auytquşylyǧy bar mümkındıgı şekteulı jandardyŋ tūraqty tūruyna arnalǧan stasionarlyq ülgıdegı ūiym 18 jyldan artyq jūmys ıstep keledı. Ortalyq Aqmola oblysy Aqköl audany Uriupin auylynda, ormandar arasynda ornalasqan. Mekemenıŋ negızgı mındetı – ömırlık qiyn jaǧdaiǧa tap bolǧan jandarǧa jaǧdai jasau, arnauly äleumettık qyzmettermen qamtamasyz etu. Aşylǧan künnen bastap ortalyqta 566 adamǧa arnauly äleumettık qyzmet körsetılgen. Bügınde mekeme I toptaǧy 76, II toptaǧy 294 mümkındıgı şekteulı jannyŋ meiırım mekenıne ainalǧan.
– «Adam balasynan meiırım qaşsa, jer betınen jaqsylyq qaşady» degen söz bar. Mūnda ömır süretınder özın üidegıdei sezınuı üşın memleket barynşa qolaily jaǧdai jasap keledı. Medisinalyq qyzmet zamanaui talaptarǧa sai jabdyqtalǧan bölımşelerde körsetıledı ärı käsıbi bılıktı därıgerler men meiırbikelerdıŋ jūmys jüiesı joǧary därejede üilestırılgen. Ortalyq – 2 zamanaui A jäne B bloktary, «Jeŋıs», «Parasat», «Şeber» atty 3 kottedj, ashana, kır juu bölmesı, qazandyq, avtogaraj siiaqty damyǧan infraqūrylymy bar qalaşyq. Al qauıpsızdık üşın beinebaqylau jüiesı qamtamasyz etılgen. Osy şaǧyn ǧana qalaşyqta 269 qyzmetker eŋbek etedı. Olar – Aqköl qalasynyŋ jäne audanǧa jaqyn maŋdaǧy auyldardyŋ tūrǧyndary. Ortalyqtyŋ damuyna üles qosqan 33 adam qazır zeinette. Olarǧa jyl saiyn eselı eŋbegı üşın qūrmet körsetıledı. Konsert baǧdarlamasy ūiymdastyrylyp, dastarqan jaiylyp, jyly lebızder aitylady. Mūndai şara – ūjymnyŋ jas buynyna jaqsy ülgı, – deidı «Qamqor» äleumettık qyzmet körsetu ortalyǧy» KMM direktory Nazarbek Kökenūly.
Ortalyqta tūratyndardyŋ köŋıl küiın köteruge jäne bos uaqytyn jaqsy ötkızuıne de basa män berıledı. Ūjym är merekege qyzyqty qoiylymdar, konsert baǧdarlamalaryn, türlı oiyndar ūiymdastyrady, olardy önerge baulidy. Byltyr säuır aiynda chirlidingten ötken inkliuzivtı aşyq turnirde ortalyq qyzmetkerlerı 150-den astam qatysuşy arasynda bas jüldenı jeŋıp aldy. Al araǧa ekı ai salyp elorda törınde eseptık keş ūiymdastyryp, düiım jūrttyŋ aldynda önerın paş ettı. Ortalyqta tūryp jatqan jandardyŋ ata-anasymen, tuǧan-tuysqanymen jylda aşyq esık künı ötıp tūrady. Jaqyndarynyŋ qoldauymen juyrda qonaq bölmesı aşyldy. Endı osy mekemede atqarylyp jatqan ıs-şaralarǧa ata-anasyn, tuǧan-tuysyn jūmyldyrudy niet etıp otyr. Ortalyq qyzmetkerlerınıŋ auqymdy ısterınıŋ arqasynda 12 qyzmet aluşy otbasyna oralyp, jaqyndarymen qaita qauyşty. Būl da ülken eŋbektıŋ nätijesı.
– Mūnymen qosa, salauatty ömır saltyn ūstanuǧa köp köŋıl bölınedı. Ortalyqtyŋ sport, jattyqtyru zaldary, tennis bölmesı bar. Dene şynyqtyru mūǧalımı Berık Jaisanbaevtyŋ eŋbegın erekşe atap ötu kerek. Öitkenı «Qamqor» äleumettık qyzmet körsetu ortalyǧynyŋ sporttaǧy jetıstıkterınıŋ geografiiasy keŋ. Gresiia, Gollandiia, Oŋtüstık Koreia men Avstriia, Liuksemburg jäne Belgiia, AQŞ, Resei, Abu-Dabi, Germaniiada ötken jarystardan tek jüldemen qaitty. Biyl 17-25 mausym aralyǧynda Germaniianyŋ Berlin qalasynda rolikpen syrǧanau jäne körkem gimnastikadan düniejüzılık jazǧy olimpiada oiyndary ötken edı. Rolikpen syrǧanaudan 1 altyn, 3 qola jülde, körkem gimnastikadan 1 altyn, 1 kümıs jüldege ie boldyq. Ötken aidyŋ 23-ınde Kökşetau qalasynda qazaqstandyq arnaiy olimpiadanyŋ pauerlifting pen bochcheden ūiymdastyrylǧan respublikalyq turnirınen de qūr qol qaitpadyq. Pauerliftingten 4 altyn, 2 kümıs jäne 1 qola jüldege ie bolsaq, bochcheden 2-oryndy ielendık. Taǧy bır atap öterlıgı, tek qyzmet aluşylar ǧana emes, merekelerde qyzmetkerler arasynda da saiystar ötıp tūrady. Tıptı vedomstvolyq baǧynysty ūiymdar arasyndaǧy ıs-şaralardan tys qalmai, ünemı jüldelı oryndarǧa ie bolady, – deidı Nazarbek Kökenūly.
2021 jylǧy «Astana qalasy boiynşa äleumettık qorǧau jüiesınıŋ üzdıgı» baiqauynda «Üzdık äleumettık qorǧau mekemesı» nominasiiasynyŋ jeŋımpazy atanuy – ülken märtebe. Jalpy alǧanda, ūjymnyŋ qai baǧytta bolmasyn jaŋaşyl, tyŋ ideiaǧa, qyzmet körsetu sapasyn odan ärı arttyra tüsuge degen talpynysy baiqalady. Ortalyqqa jan-jaqtan täjıribe almasuǧa ärıptester keletını de igı dästürge ainalyp ketkenı quantady. Osynyŋ bärı jūmysty jüielep, ūjymǧa qoldau körsetıp jürgen mekeme basşysy jäne ortalyq qyzmetkerlerınıŋ tynymsyz eŋbegınıŋ körınısı ekenı anyq. Eŋ bastysy, qoldauǧa mūqtaj jandardyŋ ömırge degen süiıspenşılıgı artyp, sapaly qyzmet alatyny – köŋılge demeu. Öitkenı taǧdyr tälkegıne tap bolǧan är adam qamqory baryn sezıngısı keledı. Ortalyqtyŋ közdegenı de sol – meiırımnıŋ şekarasy joq ekenın däleldeu.
