«Qanattylardyŋ» «Qyzjylaǧany»
![](https://astana-akshamy.kz/wp-content/uploads/2022/11/c188457a-7ecd-4f30-84d0-f3eb1c5180ea-780x470.jpg)
Byltyr Astana qalasy äkımdıgınıŋ qoldauymen jūmysyn bastaǧan «Qanattylar» inkliuzivtı teatrynyŋ II mausymy belgılı jazuşy-dramaturg, Abai atyndaǧy Memlekettık syilyqtyŋ laureaty Roza Mūqanovanyŋ «Mäŋgılık bala beine» şyǧarmasy jelısımen sahnalanǧan «Qyzjylaǧan» dramasymen aşyldy. Spektakldıŋ qoiuşy rejisserı – Abzalbek Ashatūly.
Avtordyŋ aituynşa, tuyndynyŋ düniege keluıne 1987 jyly «Semei-Nevada» qozǧalysy ūiymdastyrǧan fotokörme sebep boldy. Sonda qalamger şyǧarma prototipı Eŋlıktıŋ suretın körıp, aldymen äŋgıme jazdy. Keiın pesaǧa ainaldyryp, ol bırqatar beldı, belgılı drama teatrlary men Quyrşaq teatrynda sahnalandy. Kinorejisser Satybaldy Narymbetov körkem film tüsırdı.
– Täuelsızdıkke qolymyz jetken kezde ǧana osy şyǧarmany jazuyma mümkındıgım tudy. Eger täuelsızdık kelmegende, mūndai jabyq taqyryptarǧa bara almaǧan bolar edım. Mūndai jabyq taqyryptardy aşyq aituǧa, halyqqa jetkızuge, obraz somdauǧa, keiıpker tuǧyzuǧa täuelsızdıktıŋ arqasynda mümkın boldy, – dedı Roza Mūqanova.
Semei poligonynyŋ qasıretı turaly qoiylymnyŋ bas keiıpkerı Läilänıŋ beinesın Malika Mūhtarova äserlı somdap şyqty. Jalpy dramadaǧy on şaqty keiıpker beinelerınıŋ eşqaisysy körermenderdı beijai qaldyrmady.
– «Mäŋgılık bala beine» inkliuzivtı teatr üşın jazylǧandai. Läilä – Malikanyŋ akterlık şeberlıgın körıp, onyŋ osynşalyq eŋbekqorlyǧyna, jankeştılıgıne taŋǧaldym. Şynyn aitar bolsam, onyŋ myna oiyny menı qorqytty. Jas qyzǧa süisınıp otyryp, köz jasymdy sürte berdım, sürte berdım. Läilänıŋ ışkı älemın qatygezdenıp ketken qoǧamǧa jaiyp saldy, – deidı Roza Mūqanova.
«Qanattylar» Eŋlıktı ızdep tauyp, spektaklge arnaiy şaqyrdy. Qoiylymnan keiın körermender avtor men şyǧarma prototipınıŋ alǧaşqy kezdesuıne kuä boldy. Būl körınıs te tebırentpei qoimady.
– Bärımız tebırenıp, qoiylymdy kördık. Bız qasıretımızdı qasietımızben jeŋgen halyqpyz. Spektaklde mümkındıgı şekteulı jandar öz ömırın oinap şyqqandai äser qaldyrdy. Ynta-jıgerı men ömırge degen qūlşynysy arqyly öz mümkındıgınıŋ şeksız ekenın körsettı. Olardyŋ tabandary topyraq baspasa da, jürekke jalǧanǧan ai qanattary arqyly şeksızdıkke samǧai alatyn perışteler ekenın kördık. Qoiylym inkliuzivtı qoǧamǧa nazar audaruymyz qajet ekenın taǧy bır qaperge saldy, – dedı dramany tamaşalaǧan Aqparat jäne qoǧamdyq damu ministrı Darhan Qydyrälı.