Qazaqtyŋ qabyrǧaly qalamgerı, qara sözdıŋ ören jüirıgı, daryndy dramaturg, Qazaqstannyŋ eŋbek sıŋırgen qairatkerı Rahymjan Otarbaev 62-ge qaraǧan şaǧynda dünieden ozdy.
Būl qaiǧy qazaq ruhaniiatyna auyr tidı. Qarymdy qalamger naǧyz kemelıne kelıp, şoqtyǧy biık şyǧarmalar tuǧyzar der şaǧynda ömırden ötıp otyr. Ärine, öte ökınıştı. Osy ekı-üş künnen berı qalyŋ el jazuşynyŋ qazasyna orai bır-bırıne köŋıl aityp, qaiǧydan kökırekterı qars aiyryluda.
Jazuşy Atyrau oblysynyŋ Qūrmanǧazy audanynda dünie esıgın aşqan. Oral pedagogika institutyn bıtırgen. Är jyldarda «Oral öŋırı» gazetınde tılşı, qazaq tılı men ädebietı pänınıŋ mūǧalımı, Qazaq teleradio komitetınde redaktor, «Qazaq ädebietı» gazetınde, «Jalyn» almanahynda bölım meŋgeruşısı, Qyrǧyzstanda Qazaqstan elşılıgınıŋ attaşesı bolyp eŋbek ettı. Odan keiın Maŋǧystau oblystyq radio-televidenie kompaniiasynyŋ töraǧasy, Atyrau oblystyq drama teatrynyŋ direktory, QR Prezidentı Äkımşılıgınde sektor meŋgeruşısı, elordadaǧy Ūlttyq akademiialyq kıtaphananyŋ direktory sekıldı lauazymdy qyzmet atqardy. Ömırınıŋ soŋǧy jyldarynda Atyrau oblystyq qazaq drama teatrynyŋ körkemdık jetekşısı boldy.
Rahymjan aǧamyz ädebietke özıne tän soqpaǧymen, öz ünımen keldı. Ardaqty azamattyŋ bolmysy da bekzattyq pen tektılıktıŋ eren ülgısındei edı… Onyŋ qaisar qalamynan «Şer», «Jūldyzdar qūlaǧan jer», «Jaiyq jyry», «Qaraşa qazdar qaitqanda», «Dauysyŋdy estıdım», «Bızdıŋ auyldyŋ amazonkalary» atty prozalyq kıtaptary men «Beibarys Sūltan», «Bas», «Naşaqor jaily novella», «Syrym batyr», «Mūstafa Şoqai» degen dramalyq şyǧarmalar tudy. Būlardyŋ bärı ädebi qauymnyŋ oŋ baǧasyn aldy.
Osy 2-nşı aqpanda bas qaladaǧy №54 mektep-liseiınıŋ oquşylary Rahymjan aǧamen kezdesu ötkızdı. Sonda abzal azamat jas jetkınşekterdıŋ aldynda aqtarylyp söiledı. Ǧabit Müsırepov, Ǧabiden Mūstafin, Tahaui Ahtanov, Äbış Kekılbaev sekıldı aǧalary turaly taǧylymdy äŋgıme örbıttı. Şyǧarmaşylyǧy turaly aitty. Sol ǧibratty kezdesuge men de qatysqan edım. Bıraq jazuşyny aqyrǧy ret körıp tūrmyn dep eş oilaǧan joqpyn. Aǧanyŋ köpşılıkpen soŋǧy kezdesuı de sol bolar dep topşylaimyn.
Mıne, sodan keiıngı az kün ışınde qabyrǧaly qalamger özı de auzynan tastamai aityp jürgen asqar aǧalary bet tüzegen saparǧa köş tartty. Baqūl bolyŋyz, qara sözdıŋ qūlagerı, ardaqty azamat!
Azamat ESENJOL
AQALTEKE
Ajal jetse astyŋdaǧy jar qūlap,
Arqaryŋ da asqar şyŋnan qarǧymaq.
Aiyrylyp sendei aqaltekeden,
Azynaǧan men – araby arǧymaq.
Jazamyn, – dep jamiǧattyŋ jan küiın,
Jüregıŋdı jūlmalady san qūiyn.
«Jan azasy» Mūqaǧali aǧaŋnyŋ
Saǧan da alyp jetken eken äldiın.
Jürgen jerı qalyŋ ört pen qoz qasy,
Mümkın emes tekejaumyt tozbasy.
Sen kettı, – dep tamyp-tamyp ketkenı-ai,
Qorǧasyndai «Şyŋǧys hannyŋ köz jasy».
Özgeşe edı önerdegı ör ünıŋ,
Ör ünıŋnen nege, qalqam, jerıdıŋ?!
Sen jūmaqqa kırıp kettıŋ.
Mūndaǧy ekı-üş janǧa enşı bolyp orynyŋ.
Qoş, Rahym!
Ajal, şırkın, mergenşe
atqanymen, alasarmas sende eŋse.
Dünienıŋ jalǧandyǧyn taǧy ūqtyq,
Taǧy ūmytyp, taǧy bıreu ölgenşe…
Abzal BÖKEN,
aqyn, halyqaralyq «Alaş» syilyǧynyŋ laureaty
