Nemese uchaskelık poliseidıŋ bır künı
Qazaqstan Prezidentı Qasym-Jomart Toqaev özınıŋ halyqqa arnaǧan «Jaŋa Qazaqstan: jaŋaru men jaŋǧyru joly» Joldauynda qūqyq qorǧau organdaryna barynşa köŋıl bölıp, olardyŋ jūmystaryn jetıldıru kerektıgı turaly aitqan edı. Qazır osy baǧytta elımızdıŋ ışkı ıster salasynda naqty ıs-josparlar qolǧa alynyp, «tiımdı uchaskelık polisiia inspektory» qanatqaqty jobasy jüzege asyryluda. Bız bügın osy negızde atqarylyp jatqan jūmystarǧa kuä bolyp, Nūr-Sūltan qalasy Jergılıktı polisiia qyzmetıne qarasty №11 uchaskelık qosynynyŋ uchaskelık inspektory, polisiia kapitany Nūraly TÄŊIRBERGENOVTIŊ bır künde atqarǧan jūmysymen tanystyq.
Ǧabiden Mūstafin köşesı, 3/2 üide ornalasqan polisiianyŋ uchaskelık qosynyna kelgenımızde taŋerteŋgı jūmystyŋ jaŋa qyzyp jatqan kezı eken. Nūraly keşe keşte WhatsApp-qa kelıp tüsken tūrǧyndardyŋ aryz-şaǧymdarymen tanysyp jatty.
– Men kündelıktı jūmysymdy osydan bastaimyn. Özıme tiıstı aumaqtaǧy tūrǧyn üilerden qandai aqparattar tüstı, olardyŋ PİK töraǧalary ne aitady, osy üilerde tūratyn belsendı azamattardan qandai habarlamalar tüstı, barlyǧyn bır şolyp şyǧamyn da, osyǧan orai, bır kündık jūmys josparymdy jüieleimın, – deidı uchaskelık inspektor.
Būl onyŋ osy qyzmetke kelgen segız jyldan bergı kündelıktı ädetı eken. Qaraǧandy qalasyndaǧy QR IIM akademiiasyn bıtırgennen keiın elordaǧa jūmysqa kelgen. Ärine, alǧaşqy jyldary täjıribesı azdau jas mamanǧa halyqpen qoian-qoltyq jūmys ıstep ketu qiyndau bolǧanyn ol jasyrmaidy.
«Alǧaşqy jyldar üirenu, täjıribe jinau jyldary boldy. Künıne 14-15 saǧatqa deiın jūmys ısteitınbız. Är üidıŋ esıgın qaǧyp, tūrǧyndarmen jeke-jeke tanysqan künderımız boldy. Söitıp jürıp qyzmettıŋ qyr-syryn meŋgerdık. Adamdarmen qarym-qatynasty, jūmys ıstei bıludı üirendık» deidı ol.
Taŋerteŋgı saǧat 10:00-de uchaskelık inspektormen bırge Ǧabiden Mūstafin köşesındegı 13/1 üige keldık. Osy üidıŋ №68 päterınen keşe keşte tört jıgıt balkonda temekı tartyp tūryp, tūqylyn söndırmesten jerge laqtyrǧany jönınde bır tūrǧynnan şaǧym tüsken bolatyn. Esıktı äiel adam aşty. Uchaskelık inspektor bolǧan män-jaidy baiandap berdı. Üi iesı keşe üide bolmaǧanyn aityp, oqiǧadan habary joq ekenın jetkızdı. Osy kezde basqa bölmeden 8-9 jastaǧy kışkene qyz jügırıp şyǧyp «iä, men kördım, keşe balkonda Erjan aǧalar temekı tartty» dep sairai jöneldı. Būǧan polisiia inspektory: «balaly üidıŋ ūrlyǧy jatpas…» degen, mıne, kışkentei kömekşı» dep riza bolyp qaldy. Sonymen, №68 päterdegı äiel adamǧa tüsınık jūmystaryn jürgızıp, endı qaitalansa, aiyppūl töleitının qataŋ eskertkennen keiın kelıp tüsken kelesı şaǧym boiynşa №92 päterge köterıldık.
Esıktı jiyrmalardaǧy jas jıgıt aşty. Päter jaldap tūrady eken. Körşılerı şaǧymdanypty. Keide tünde tynyştyqty būzatyny bar, onyŋ üstıne tūryp jatqan mekenjailaryna tırkelmegen. Būryn da bırneşe ret eskertulerge qūlaq aspaǧan soŋ būl jıgıtterge aiyppūl jazyp beruge tura keldı.
Bızde uchaskelık polisiia inspektorynyŋ mındetıne bärı kıredı eken. Dükenge betperde taǧyp keluden bastap, äleumettık maŋyzy bar tauarlarǧa şektık baǧanyŋ saqtaluyna deiın şaǧym tüsse, uchaskelık inspektor baqylauǧa aluy qajet.
Al keibır jürgızuşılerdıŋ avtokölıkterın jaiau jürgınşıler jüretın trotuardyŋ üstıne qoiyp ketetın oqiǧalar jiı kezdesedı. Mıne, osy jailarǧa bailanysty da aryz-şaǧymdar az tüspeitın körınedı.
Saǧat 15:30-da polisiia inspektory Raqymjan Qoşqarbaev daŋǧyly boiynda 80/1 üidıŋ aulasynda avtokölıgın üidıŋ kıreberısıne taqap qoiyp ketken bır jürgızuşıge eskertu jasap, sol üidıŋ bır tūrǧynynyŋ telefonmen tüsırgen şaǧymyn qanaǧattandyrdy.
Sondai-aq ol özınıŋ WhatsApp-yna kelıp tüsken şaǧymdar boiynşa da jūmys jürgıze bastady. Bırneşe päterdı aralap, tūrǧyndardyŋ jeke kuälıktegı JSN-ı arqyly qyzmettık planşetpen sol kısınıŋ osy päterde tırkeude bar-joǧyn tekserdı. Mäselen, Ǧ.Müsırepov köşesındegı 19-üidıŋ tūrǧyny tırkeuge tūrmaǧandyǧy anyqtaldy. Oǧan QR ÄQBtK-nıŋ 492-baby, 1-bölıgı boiynşa eskertu berıldı. Endı būl azamat 10 kün ışınde tūrǧylyqty mekenjaiy boiynşa tırkeuge tūrmasa, aiyppūl töleuge mındetteledı.
Polisiia inspektory 18:30-da Ǧabiden Mūstafin köşesınde ornalasqan tırek qosynyna kelıp, özınıŋ WhatsApp-yna tüsken habarlamalarmen tanysyp, köptegen saualdarǧa jauap berdı. Keibırın erteŋ baryp tekseretın bolyp kelıstı. Şaǧymdar köbıne tynyştyqty būzuǧa, sosyn otbasyndaǧy tūrmystyq zorlyq-zombylyqqa bailanysty tüsıp jatady eken.
«Menıŋ qyzmet aumaǧymda 7 üi qamtylady. Onda 1366 päter bar. Mıne, osy päterdıŋ köptegen tūrǧyndary qazır menı tanidy. Qandai da bır mäsele tuyndasa, tıkelei özıme qoŋyrau şalady. Sosyn 3-4 belsendı kömekşım bar. Solar maǧan qoǧamdyq tärtıptı saqtauǧa ünemı kömektesıp otyrady» deidı Nūraly Orynbaiūly.
Sol künı onyŋ jūmysy 23.00 şamasynda aiaqtaldy. «Jūmystyŋ būlai erterek aiaqtalǧanyna quanamyz» deidı ol. Keide tün ortasyna deiın otyryp qalatyn kezderı bolady eken.
