Elordada 82 myŋnan asa zeinet jasyndaǧy, 25 myŋ mümkındıgı şekteulı jan bar. Sonyŋ ışınde 1941-1945 jylǧy Ūly Otan soǧysyna qatysqan tek 57 soǧys ardagerı qalǧan.
1 qazan – Halyqaralyq qarttar künıne orai äkımdıkte ötken baspasöz mäslihatynda Jūmyspen qamtu jäne äleumettık qorǧau basqarmasy basşysy orynbasarynyŋ mındetın atqaruşy İlia Skub bas qalada tek atalǧan künı ǧana emes, jyl on ekı ai boiy üzbei qamqorlyq körsetılıp kele jatqanyn aitty.
– Ökınışke qarai, Nūr-Sūltanda 57 Ūly Otan soǧysynyŋ ardagerı qaldy. Tyl eŋbekkerlerı bar. Olardyŋ sany jyldan jylǧa azaiyp barady. Bızdıŋ basqarma memlekettıŋ zeinetkerlerge kömek körsetu saiasatyn jürgızedı. Mäselen, zeinetkerlerge qoǧamdyq kölıkterde jüru, tısterın protezdeu tegın. Sonymen qatar, kurorttyq aimaqtarǧa joldama berıledı, – dedı İlia Skub.
Aita keteiık, ärbır memlekettık jäne ūlttyq merekelerde egde jandarǧa arnap türlı ıs-şaralar, qaiyrymdylyq aksiialary ūiymdastyrylady. Olarǧa memleket tarapynan ärqandai äleumettık kömekter men jeŋıldıkter qarastyrylǧan. Keibır jaǧdaida bır rettık aqşalai kömekter berıledı.
Al jalǧyzılıktı qarttar mäselesımen ainalysatyn «Äleumettık kömek körsetu ortalyǧy» MKQK direktorynyŋ mındetın atqaruşy Erdäulet Amanbaidyŋ aituynşa, «Şarapat» ortalyǧynda jalǧyzılıktı 320 adamǧa jäne tūrǧylyqty üilerınde 406 adamǧa äleumettık qyzmetter körsetıledı. Qarttar künıne orai türlı ekskursiialar, konsertter, köŋıl köteru keşterı ūiymdastyrylady. Meiramhanalarda, dämhanalarda qarttarǧa dastarqan jaiylady.
Qalanyŋ bılım beru mekemelerı soǧys ardagerlermen kezdesuler ötkızedı, tūrmystyq jaǧdailaryna kömektesedı. Käsıporyndar men ūiymdar özderınıŋ eŋbek ardagerıne qūrmet körsetıp, syi-syiapat jasaidy. Qoryta aitqanda, qalanyŋ qarttary eşqaşan nazardan tys qalǧan emes.
