Salyq tölemderın uaqytynda audaryp otyru – ärbır azamat pen mekemenıŋ mındetı. Elımızdıŋ keibır azamattaryna 15 jyl (!) boiy salyqtyŋ qaryzyn tölemegenı turaly habarlama keledı eken. Jyl saiyn oǧan ösımaqy qosylyp otyrady. Al olardyŋ köpşılıgı jeke käsıpker emes, qarapaiym adamdar ekenı anyqtalǧan.
Söitse, Memlekettık kırıs komitetı ösımaqynyŋ 7 mlrd teŋgesın osylai ainaldyryp otyrǧan körınedı. Mūndai bylyq-şylyqtardy keşe Mäjılıstıŋ jalpy otyrysynda tömengı palatanyŋ töraǧasy Nūrlan Nyǧmatulin jaiyp saldy.
«Memlekettık kırıs komitetınıŋ deregı boiynşa, elımızde azamattyq tūlǧalardyŋ salyq (KTS, QQS, ÄS) boiynşa 700 mln teŋge qaryzy bar. Alaida mūndai salyqty tek zaŋdy tūlǧalar ǧana töleidı. Sızder ol qaryzdy 15 jylǧa jazyp, jyl saiyn ösımaqyny qosyp, esep beresızder. «Halyq salyǧyn tölemeidı! Ösımaqy ösıp jatyr!» dep ūialmai qaǧaz toltyrasyzdar!» dep şüilıktı Mäjılıs spikerı Qarjy ministrınıŋ orynbasary Qanat Baedılovke. Qūzyrly ministrlık ökılı şynynda da 16 myŋ adamnyŋ azamattyq tūlǧa ekenı anyqtalǧanyn rastady. Ol Qarjy ministrlıgıne mälımetter jıberetın özge memlekettık organdardy kınälady. 2019 jyldyŋ 1 mamyryna deiın älı 30 myŋnan asa mälımetterdıŋ tüzetılmegenın mysalǧa keltırdı.
Aitpaqşy, ötken joly deputat Şäkır Hahazov saual joldap, Nūr-Sūltan qalasynyŋ bır tūrǧynyna 200-den asa avtokölıkterınıŋ salyǧyn töleu turaly habarlama kelgenıne jaǧasyn ūstaǧan. Al Qaraǧandyda bır zeinetkerdıŋ 22 jyl būryn satqan kölıgıne 46 267 teŋge salyq qaryzy kelgen. Jerge, jer uchaskesıne, jyljymaityn mülıkke qatysty da mūndai bylyqtar jeterlık. Kım kınälı? Memlekettık organdar ma? Sonda salyq boiynşa keşırım jasau solardyŋ özderıne kerek bolyp otyr ma?
Baiybyna barsaq, mälımetterdıŋ ala-qūlalyǧyna, salyq qaryzy turaly jalǧan aqparatqa memlekettık organdardyŋ özderı kınälı eken. Mysaly, Qazaqstanda tırkelgen
4 mln-nan asa avtokölıktıŋ 1 mln-ynyŋ tırkeuıne qatysty derekterde qatelıkter kezdesken. IIM men Qarjy ministrlıgı būl jūmysty 2019 jyldyŋ soŋyna deiın onlain-tärtıpke köşırmekşı. Nūrlan Nyǧmatulin zaŋ qarjylyq qyzmettı tūtynatyn adamdardy qorǧau qajettıgın qadap aitty. Aitpaqşy, Mäjılıs bırınşı oqylymda maqūldaǧan «QR-nyŋ keibır zaŋnamalyq aktılerıne qarjy naryǧyn retteu men damytu jäne mikroqarjylyq qyzmet mäselelerı boiynşa özgerıster men tolyqtyrular engızu turaly» zaŋynyŋ jobasynda lombardtardyŋ, nesielık ūiymdardyŋ qyzmetın retteu mäselesı engızılgen.
