QASİETTI BORYŞ
Er jıgıt üşın eŋ qasiettı boryş – Otandy qorǧau. Būl – är azamattyŋ boiyna bala kezınen sıŋırıletın qaǧidat. Al öskeleŋ ūrpaq otansüigıştık, ūltjandylyq qasietterdı qaidan alady, olarǧa kım ülgı-önege körsetedı? Mıne, däl osy saualdy alǧa tartyp, Astana qalasyndaǧy «Auǧanstan soǧysy mügedekterı men ardagerlerı odaǧy» qoǧamdyq bırlestıgınde bolyp, aituly ūiymnyŋ jūmysymen tanysyp qaitqan edık.
Auǧanstan soǧysyn bastan keşken jauyngerler bas qosatyn ūiymda qaşan kelseŋız de qyzu jūmys. Öitkenı mūnda jauynger-internasionalisterdıŋ tūrmys-tırşılıgıne qatysty mäselenıŋ bärı qaralyp, talqylanyp jatady.
– Qatarynda 1300-den asa müşesı bar bızdıŋ bırlestık qoǧamdyq ūiym bolyp sanalǧanymen, atqaratyn jūmysymyz san qyrly. Ärine, bırınşı kezekte, bız Auǧanstan soǧysynda qaza tapqan jauyngerlerdıŋ otbasylaryna, soǧys saldarynan mügedek bolǧan maidandastarymyzǧa qolymyzdan kelgenşe ruhani da, materialdyq ta kömek körsetemız. Sodan keiıngı basty mındetımız – jas ūrpaqqa patriottyq tärbie beru. Bız üşın öz elın, öz jerın süietın jastardy tärbieleu eŋ qasiettı ıs bolyp tabylady. Būl rette köp jyldardan berı qalyptasqan dästürlı şaralarymyz bar. Mäselen, tūraqty türde qaladaǧy mektepterde «Erlık sabaqtaryn», joǧary oqu oryndary men mekemelerde kezdesuler ötkızemız. Ūly Otan soǧysy maidangerlerıne qūrmet körsetıp, olardy özımızdıŋ şaralarymyzǧa şaqyryp otyramyz. Bırneşe dästürlı sport jarystaryn ūiymdastyramyz. Atap aitqanda, jyl saiyn aqmolalyq jauynger-internasionalister Qazbek Abdrahmanov, Saǧyndyq Smaiylov jäne Janaidar Jirentaev atyndaǧy futbol, voleibol jarystaryna tek qana Astana qalasynan ǧana emes, respublika aimaqtarynan komandalar qatysady. Būl jarystarǧa eresektermen qatar, jastar jäne balalar da köptep tartylady. Sonymen qatar, elordamyzda ötıp tūratyn qoǧamdyq, saiasi jäne mädeni şaralarǧa qatysamyz, – deidı bızben äŋgımesınde Astana qalasynyŋ «Auǧanstan soǧysy mügedekterı men ardagerlerı odaǧy» QB töraǧasy Serık Kenjebekov.
Şynymen de, oq pen otqa şarpylǧan jauynger-internasionalisterdıŋ soǧys zardabyn şekkenderge qaiyrymdylyq tanytuy, jas ūrpaqqa patriottyq tärbie beruı, qalamyzdaǧy qoǧamdyq şaralarǧa belsendı qatysuy önege körsetkışı dese bolady. Sonau seksenınşı jyldary Auǧanstan alapatyn körgen jap-jas jıgıtter bügınde samaiyna aq tüsken jıgıt aǧalary bolyp qaldy. Aldy nemere süiıp, ardaqty ataǧa da ainalyp jatyr.
– Erteŋ bızdıŋ jauynger-internasionalister Qazaqstan Qaruly Küşterınıŋ 25 jyldyǧyna arnalǧan äskeri paradqa qatysady. Būl – bız üşın ülken märtebe. Saltanatty şeruden soŋ Auǧanstan soǧysy qūrbandarynyŋ memorial-eskertkışı aldynda Otan qorǧauşylar künıne arnalǧan saltanatty jiynymyzdy ötkızemız, – dep tüiındedı öz sözın astanalyq ūiymnyŋ jetekşısı.