Jyl basynan berı elorda aumaǧynda oryn alǧan 38 tabiǧi jäne tehnogendık sipattaǧy tötenşe jaǧdaidyŋ saldarynan 58 adam zardap şegıp, onyŋ ışınde 9 adam köz jūmǧan.
Qala aumaǧynda 387 märte ot tūtanyp, ört şyqqan. Būl 2016 jylmen salystyrǧanda 12 paiyzǧa köbeiıp, odan kelgen materialdyq şyǧyn 64 million 387 teŋgenı qūrap otyr. Ört söndıruşıler bır adamdy qūtqara almasa da, 408 million teŋgenı qūraityn mülık-mükämmaldy saqtap qala aldy. Tılsız jau köbıne tūrǧyn üi sektorlarynan şyǧyp, 96 jaǧdaida kölık örtenıptı.
Jazdyŋ qūrǧaq ärı ystyq boluy da ört söndıruşılerge qolaisyzdyq tuǧyzyp otyr. Osy kezeŋge deiın jalpy kölemı 153 myŋ şarşy metrdı alatyn jer-jerlerdegı quraǧan qamys pen şöp örtke oranyp, 219 märte tosqauyl bolǧan.
Jedel-qūtqaru jasaǧy jäne Jergılıktı polisiia qyzmetımen kündelıktı bırlesken patruldeu jäne TJD qyzmetkerlerı tarapynan jürgızıletın reidterge qaramastan, tūrǧyndar suǧa şomylu erejelerın saqtamai, bastaryn qaterge tıgedı.
Atap aitqanda, rūqsat etılmegen jerlerge şomylyp, balalardy qarausyz qaldyryp, mas küiınde suǧa tüsu jaǧdaiy jiı kezdesedı. Astanalyqtar üşın rūqsat etılgen üş su aidyny bar. Ol Ortalyq jaǧajai, «Üş teŋgebalyq» jäne «Astanalyq aula» demalys oryndaryndaǧy jaǧajailar. Odan basqa elorda aumaǧynda 15-ke tarta su aidyny bolsa da olardy şomyluǧa abattandyryp, beiımdemegen sebeptı tyiym salynyp, belgılerın ornatqan. Bügıngı künge deiın 12 adam suǧa batyp ketken. Su aidynyndaǧy adam qazasynyŋ negızgı sebepterı – qauıpsızdık erejelerın elemei, rūqsat etılmegen qauıptı jerlerge mas küiınde suǧa tüsu jäne suda qūtqaru qyzmetınıŋ baqylauynan tys jerlerdı jaǧalaitynynda bolyp otyr.
Aigül UAISOVA
