Jaqynda Niu-Iorktegı «Barclays Center» sahnasynda Dimaş Qūdaibergennıŋ jeke konsertı öttı. Qazaqstannyŋ AQŞ-taǧy mädeniet künderı aiasynda QR Mädeniet jäne sport ministrlıgınıŋ qoldauymen ötken būl konsertke AQŞ, Avstraliia, Meksika, Resei, Chili, Bolgariia, Filippin, İspaniia, Kanada, Japoniia siiaqty 60-tan asa elden 15 myŋǧa juyq körermen jinaldy.
Gremmi syilyǧynyŋ iegerı, perulık ataqty änşı Eva Ailan Dimaş Qūdaibergennıŋ än keşın tamaşalau üşın öz konsertın keiınge şegerıp, Niu-Iorkke ūşyp kelgenınıŋ özı atalǧan än keşınıŋ ataǧyn odan ärı aspandatsa, Dimaştyŋ är ūlt äuenderın, äsırese, qazaqtyŋ halyq änderı men küilerın ǧajap sezımmen, tättı äuenmen oryndaǧany tyŋdauşylaryn airyqşa äserge bölegen tärızdı. Dimaş halyq änı «Daididaudy» qazaq tılınde şyrqaǧanda, zal toly körermen oryndarynan tūryp, bırge aitqan videosyn körıp, Qazaqstanda otyrǧan bızdıŋ de boiymyzdy maqtanyş sezımı kernedı. Al AQŞ-taǧy qazaqtardyŋ Dimaş keşınen alǧan äserı tıptı bölek. Sonyŋ bırı – Nazym Janǧazinovanyŋ estelıgı.
«Saǧat taŋǧy 08:00. AQŞ, Niu-Iork qalasy. Osylaişa Dimaştyŋ Amerikadaǧy konsertı aiaqtaldy» dep bastapty ol özınıŋ tebırenıske, alqauǧa, maqtanǧa toly jazbasyn.
«Men bügın ūiqydan müldem basqa adam bolyp oiandym. Ömırımde bırınşı ret men özımnıŋ qazaq degen halyqtyŋ qyzy ekendıgımdı maqtan tūtyp, keudem tola quanyşpen oiandym. Jüregım «men qazaqpyn!» dep dürsıldep oiandy. Osy sezımmen älemnıŋ eŋ alyp, eŋ keremet qalalarynyŋ bırınde otyryp, bügın öz elımdı qatty saǧyndym.
Şynymdy aitsam, osyǧan deiın jer kölemı boiynşa 9-oryndaǧy, jer asty paidaly qazbalarǧa öte bai, tarihy da, taǧylymy da mol bolsa-daǧy, menıŋ osyndai elımdı eşkım bılmeitınınen, mende azyraq bolsa da özımdı kemşın ūlttyŋ qyzyndai tömen sezınu, öz-özıme senbeu bar edı, ony jasyryp qaitem? Men osy ūlttyŋ öskeleŋ ūrpaǧy ekendıgıme ūialatynmyn da.
Bıraq bügın bızdı qoiyp, eresekterımızdıŋ özı halyq änderın bılmeitını jäne tyŋdamaityny üşın men bügın bırınşı ret qatty ūialdym. Ülkenderge kerek emes dünie, bızge ne üşın kerek deitınbız. Ol oiymnyŋ mülde beker ekenın şyndap sezındım. Keşe tünde bız qazaqtardyŋ özderı qazaqtyŋ ūlttyq qūndylyqtaryn qanşalyqty baǧalamaitynymyzdy anyq tüsındım. Jüregım auyrdy, jyladym…
Keşe osynau alyp el – Amerikada 15 myŋnan astam adam Dimaşpen bırge halyq änı «Daididaudy» qosyla şyrqaǧan kezde men jüregım jaryla jyladym. Konsert aiaqtalǧannan keiın artyma qarasam, ärbır üşınşı qonaqtyŋ qolynda menıŋ elımnıŋ kök tuy jelbırep ketıp barady. Qandai maqtanyş deseŋızşı! Būl keşte maǧan tıptı tuymnyŋ tüsı de müldem basqaşa ystyq qabyldandy.
Niu-Iorkte körgenımderımnıŋ bärın tılmen aityp jetkıze almaimyn! Dimaş menıŋ oiymdy tübegeilı özgerttı. Menıŋ ruhymdy oiatty. Tūŋǧyş ret qazaq ekenıme qatty quandym. Konsertten keiın Dimaş özınıŋ däl osyny bala kezınen armandaǧanyn aitty. Amerika turaly emes, Amerikada än saludy da emes, Amerikaǧa, tıptı bükıl älemge özımen qosylyp qazaqtyŋ halyq änderın jatqa aitqyzsam dep armandaǧanyn aitty. Jäne ol mūny jasady.
Keşegı «Barclays Center»-de bolǧan oqiǧa bızdıŋ tarihymyzda qalady. Men oǧan senemın. Qazaqstandyq jas änşı älem jūldyzdary jinalǧan auditoriiany jinap, amerikalyq myŋdaǧan körermendı qazaqtyŋ halyq änderın şyrqatyp, dombyranyŋ ünıne jylatty.
Jasa, Dimaş! Jasa, Qazaq elı!».
Dimaş Qūdaibergennıŋ AQŞ-ta ötken än keşı turaly būdan artyq eşteŋe aitudyŋ qajetı joq. Sebebı Dimaş «Öz asylymyzdy baǧalamai, jattyŋ jasyǧyn jaǧalap jürgenımızdı» de, «Özıŋdı-özıŋ syilasaŋ, jat janynan tüŋıler» degen ataly sözdıŋ astaryn da osy än keşımen-aq däleldep ketken sekıldı.
Dimaş 12 jeltoqsan künı Nūr-Sūltanǧa oraldy. Äuejaida ony otandastarymyz ülken saltanatpen qarsy alsa, sol künı QR Täuelsızdık künıne orai Dimaş Qūdaibergenge «Qazaqstannyŋ eŋbek sıŋırgen qairatkerı» qūrmettı ataǧy berıldı.
