Qytymyr qystyŋ qyspaǧynan qūtylyp, tırşılıktıŋ jaŋaşa tynys, sony serpın alar şaǧy da tudy. Osynau qūbylyspen qatar jetıp jer-kökke nūryn şaşatyn, būqaraǧa būlqynǧan ümıtter syilaityn Nauryz toiy – elımız üşın erek meiram. Jyl basy sanalatyn ūlyq merekenı qaşanda qala tūrǧyndary yp-ystyq yqylaspen, şat-şadyman köŋıl-küimen atap ötedı. Astanalyqtardyŋ būl jolǧy yntasy da biık.
Dübırlı dumandy tamaşalamaq nietpen şahardyŋ qaq törınde ornalasqan «Qazaq elı» monumentıne jol tarttyq. Alaŋdaǧy äsem än-küidıŋ ünı anadaidan qūlaqqa jetıp, nazardy erıksız audarady. Täuelsızdık daŋǧylynyŋ boiymen ketıp bara jatqan jūrtşylyqtyŋ köbı älgı dauysqa elıtıp, solai qarai būryluda. Qalyŋ nöpırmen bırge bız de sonda jyljydyq. Qaz-qatar tıgılgen aqşaŋqan kiız üilerdıŋ arasymen aiaŋdap kelemız. Bärınıŋ esıkterı aiqara aşuly. Işterındegı kısıler qonaqtardy asqan ızettılıkpen qarsy alyp, dastarhanǧa şaqyruda.
«Nauryz köjeden däm tatyp, bauyrsaqtan auyz tiıŋızder» dep jymidy bızge de bır kelınşek. Būlar Astana qalasynyŋ äkımdıgıne qarasty Kommunaldyq mülık jäne memlekettık satyp alu basqarmasynyŋ qyzmetkerlerı eken. Şai ışıp, jürek jalǧaǧan soŋ Qymbat Älıbekova esımdı bas maman özderınıŋ bügıngı baǧdarlamalarymen tanystyrdy.
– Nauryz qarsaŋynda qazaqtyŋ baiyrǧy dästürlerı jaily körınıs ūiymdastyryp, halyqqa paş etpekpız. Äsırese, qala adamdarynyŋ bırazy mūndai ädet-ǧūryptardy ūmytyp barady. Mäselen, bız qazır aşamaiǧa mıngızu degennıŋ qandai salt ekenın tüsındıremız. Ol – bala ömırındegı maŋyzdy ärı aituly künderdıŋ bırı. Baldyrǧan tört-bes jasqa tolǧanda, tuystary oǧan bäsıre tai syilap, aşamai ertteidı. Aşamai – balaǧa arnalǧan aişyqty er. Ülkender jaǧy «Mıne, sen endı at jalyn tartyp mıner jıgıt boldyŋ» dep, büldırşınge bata bergen. Osydan keiın balanyŋ esı kırıp, aqyly tolysyp, özınıŋ jauapkerşılıgın sezıngen, – dep äŋgımelep berdı basqarma ökılı köterıŋkı köŋılmen.
Al «Astana ormany» mekemesı saltanatty şara kezınde qūdalyq räsımın sahnalady. Atalǧan käsıporyndaǧy äkımşılık bölımınıŋ basşysy Gauhar Eşmūhambetovanyŋ aituynşa, qūdalyqqa da qatysty ūmytylyp bara jatqan dünieler köp. Mädenietımızdıŋ ädemı ädet-ǧūryptaryn bır-bırınen böle jarmai, tolyqtai oryndaǧanda ǧana qazaqtyǧymyzdyŋ ırgesı bekıp, tamyr jaiady.
Būl künı elordalyqtarǧa tabiǧattyŋ da meiırı tüsıp, jaimaşuaq aua raiy-men quantty. Änşeiınde qoiyn-qonyşyŋa kırıp berekeŋdı qaşyratyn qara suyqtyŋ ızı de joq. Aspannyŋ da qabaǧy jazylyp, sūp-sūr būlttaryn köz jetpes şalǧaiǧa köşırıp jıberıptı. Bala bıtkennıŋ kündı süietın ädetı emes pe?! Telpekterın şeşıp tastap, altybaqannyŋ qyzyǧyna tüsken. Jandaryna jaqyndap, jön sūradyq.
– Bız №50 mektep-liseidıŋ oquşylarymyz, – dep taq-taq etedı aralaryndaǧy elgezek ūl. – Är ūlttyq meiram saiyn osynda kelıp, altybaqan tebemız. Bıraq altybaqan az, adam köp. Sondyqtan kezekke tūruǧa tura keledı. Astananyŋ bıraz jerlerıne altybaqan qūrsa, bylaiǧy uaqytta da baruşy edık…
Säbi tılegıne ıştei bız de qosyldyq. Jalpy, kez kelgen merekenı, eŋ äuelı, balalar şyn jüregımen kütedı ǧoi. Endeşe, kışkentailardyŋ da armanyn eskerudı ūmytpaiyqşy…
Botagöz MARATQYZY
astana-akshamy.kz
