Qazaqşa seansqa bilet alu da – bır mūŋ
Jaqynda Aslan esımdı astanalyq tanysym alty jasar qyzy Aişanūrdy multfilmderdıŋ qazaqşa seansyna aparu kädımgıdei problema ekenın aitty. Olar Angliiada bırneşe jyl boiy tūryp kelgendıkten, älgı büldırşın tek qana qazaqşa jäne aǧylşynşa söileidı. Orysşa mülde tüsınbeidı. «Qas qylǧanda, kinoteatrlarda multfilmderdıŋ qazaqşa seansy künıne bır-ekeu ǧana. Onyŋ özı yŋǧaisyz uaqyttarda: taŋerteŋ nemese tüste» deidı äkesı.
Äleumettık jelını qoldanuşylarda qazaqşa seanstardyŋ sirek körsetıletınımen qatar, olarǧa bilettı onlain satyp aludyŋ qoljetımdı emestıgın aituda. Mysaly, Bella esımdı Facebook qoldanuşysy bylai dep jazady:
– «Chaplin Cinemas» kinoteatrlar jelısı, dälırek aitsaq, «Chaplin Mega Silk Way» kinoteatry «Ralf internetke qarsy» multfilmınıŋ bır künge 17 seansyn ūsynǧan. Bıraq sonyŋ bıreuı ǧana qazaqşa. Onyŋ özınde, basqa orysşa seanstarǧa bilettı onlain satyp aludyŋ mümkındıgı bar da, älgı qazaqşa seans üşın ondai mümkındık joq. Jaraidy dep, «Kinopark 7 IMAX Keruen» kinoteatryn qaradyq. Mūnda qazaqşa seansqa bilet alu mümkındıgı bolǧanmen, satyp alu tüimesın basqanyŋda, ekrannan basqa, iaǧni, orysşa seansty taŋdau turaly sypaiy ūsynys şyǧady.
Bız de tekserıp körmek bolyp, «Kinopark» mobildı qosymşasyn aşsaq, «Ralf internet qarsy» multfilmınıŋ 26 qaraşa küngı bırde-bır qazaqşa seansy tızımde joq bolyp şyqty. Qyzyǧy, kino.kz portaly bızge «Kinopark 8 IMAX Saryarka» kinoteatrynda saǧat 10.20 jäne 12.30 kezderınde qazaqşa seans körsetıletını turaly aqparat bergenımen, «Kinopark» mobildı qosymşasynda ol uaqytqa bırde-bır seansty tappadyq.
Būl mäselenıŋ sebebın atalǧan seanstarǧa bilettıŋ tügeldei satylyp ketuımen tüsındırer bolsaq, onda kinoteatr äkımşılıgı qazaqşa seanstarǧa sūranystyŋ joǧary ekenın eskerıp, olardyŋ sanyn ösıru kerek emes pe qaita? Būl sūraqty bız «Kinopark Theatres» kompaniiasynyŋ öŋırlık direktory Baqytjan Apizovqa joldadyq. Jauap kelgen künı özderıŋızben bölısetın bolamyz.