Qazaqstan Prezidentı Ūlttyq bank töraǧasy Daniiar Aqyşevtı qabyldady
Kezdesu barysynda D.Aqyşev Memleket basşysyna Ūlttyq banktıŋ qazırgı qyzmetı, aqşa-nesie saiasatynyŋ basty baǧyttary turaly, sonymen qatar eldıŋ qarjy naryǧyndaǧy ahual turaly baiandady.
Elbasy ışkı valiuta naryǧyndaǧy jaǧdaidy tūraqtandyrudy qamtamasyz etu, respublikanyŋ bank jüiesın damytu jäne ekınşı deŋgeilı bankter arqyly ekonomikany nesielendıru kölemın arttyru jönınde tiıstı şaralar qabyldau qajettıgıne nazar audardy.
Nūrsūltan Nazarbaev sondai-aq, teŋge baǧamyna bailanysty jaǧdaiǧa qatysty tiımdı aqparattyq-tüsındıru jūmysyn jalǧastyrudyŋ maŋyzdylyǧyn atap öttı.
– Erkın aiyrbas baǧamyn engızu turaly şeşım dūrys boldy. Alaida, qazır keibır keleŋsız jaǧdailar oryn aluda jäne onyŋ sebepterın jūrtqa tüsındıru qajet, – dedı Elbasy.
Ūlttyq banktıŋ töraǧasy ūlttyq valiutanyŋ dollarǧa qatysty baǧamynyŋ älsıreuıne äser etken faktorlar jönınde aitty.
– Biylǧy alǧaşqy alty aida mūnai baǧasy barrelıne 27-den 52 dollarǧa qymbattady, alaida şıldede 52-den 42 dollarǧa –15%-ǧa arzandady. Barlyq şikızat eksporttaityn damuşy elderde osyndai jaǧdai oryn aldy. Olardyŋ ūlttyq valiutalary Qazaqstandaǧy siiaqty bekıp, keiınnen 2-3%-ǧa tömendedı. Şıldede teŋge şartty türde 4,2%-ǧa älsıredı, būl qalypty özgerıs dep sanaimyz. Qazırgı uaqytta jaǧdai tūraqtady. Aldaǧy uaqytta baǧam qandai da bır jaǧdailarǧa bailanysty özgere qoimaidy. 2016 jylǧy şıldedegı teŋgenıŋ erkın aiyrbas baǧamy jaǧdaiyndaǧy auytquy ışkı ekonomikalyq tūraqtylyq üşın eşqandai qauıp töndırmeidı, – dedı D.Aqyşev.
Būdan bölek, Ūlttyq banktıŋ töraǧasy eldegı infliasiia üderısterın ūstap tūru üşın jürgızıp jatqan jūmystar turaly mälımdedı.
– Jyl basynan bastap infliasiia ösımı 5,2%-dy qūrady. Osy körsetkışte 2015 jylǧy qyrküiek-qaraşa ailarynda baǧa tez ösken kezeŋdegı baǧamdy tüzeudıŋ äserı qamtylǧan. Būl endı artta qaldy. Jyldyŋ qorytyndysy boiynşa bız Ükımet közdegen 6-8% infliasiialyq dälızdı qamtamasyz etemız degen senım bar, – dedı D.Aqyşev.
Memleket basşysy kezdesu qorytyndysy boiynşa bırqatar tapsyrma berdı.
akorda.kz
