Astana qalasy äkımdıgıne qarasty «Ömırlık qiyn jaǧdaida qalǧan adamdardy äleumetke qosu ortalyǧy» mekemesı – qūjattaryn joǧaltyp, üisız-küisız jürgen jandarǧa äleumettık kömek körsetetın bırden-bır mekeme.
Bır uaqytta 180 adamdy qabyldauǧa qauqarly mekemede jabyrqau jandardyŋ qūjatyn tügendep, tırşılıkke qaita beiımdeu üşın barynşa jaǧdai qarastyrylǧan. Mäselen, taza tösek-oryn, juynatyn bölmelerdıŋ barlyǧy talapqa sai. Üş uaqyt tamaq berıledı. Soǧan orai qysy-jazy būl jerden keluşıler qatary üzılmeitın körınedı. Onymen qosa mekemenıŋ 50 oryndyq tüngı bölımşesı de jüielı türde jūmys ısteidı eken. Mūnda adamdardy tasymaldauǧa arnaiy jabdyqtalǧan kölıkter, ört qauıpsızdıgınıŋ dybystyq signalizasiiasy, 24 beinebaqylau kamerasy bar.
Mekeme basşysy Mūrat Qarievtıŋ aituynşa, ötken jyly mekemege 1685 adam tüsıptı. Onyŋ 893-ı astanalyq bolsa, 27-sı – şeteldık, basqalary özge öŋır azamattary bolǧan. Al tüngı bölımşege 7628 adam qabyldanypty (3897-sı – elordalyq, 175-ı – şeteldık, qalǧany – basqa aimaq tūrǧyndary). Osy adamdardyŋ 85-ınıŋ qūjaty qalpyna keltırılıptı. Al 114 adam tūrǧylyqty jerlerıne jıberılse, 110 adam otbasylaryna qaitarylypty. Sonymen qatar 19 adam «Şarapat» äleumettık qyzmet körsetu ortalyǧyna jäne psihonevrologiialyq medisinalyq-äleumettık mekemege auystyrylsa, 10 adamǧa mügedektık toby räsımdelıptı. Sondai-aq 919 adam fliuorografiialyq tekseruden ötıp, olardyŋ 137-sınıŋ ökpesınde özgerıs bar ekenı anyqtalyp, 24-ı tuberkulez dispanserıne, 92-sı türlı syrqatpen stasionarlyq emdeu mekemelerıne jatqyzylypty.
– Bızdıŋ mekeme mamandaryn da aq halatty abzal jandar siiaqty adam janynyŋ araşaşysy boluǧa laiyq meiırımdı jürekterdıŋ toǧysqan ortasy dep aituǧa bolady. Mamandarymyz jyl saiyn bılıktılıktı arttyru kurstarynan ötıp tūrady. Qalanyŋ qoǧamdyq ömırıne, sporttyq jäne mädeni şaralaryna da belsendı türde qatysady. Ömırlık qiyn jaǧdaida qalǧan jandarǧa qol ūşyn beruımızge qoldau körsetkenderge şeksız rizaşylyǧymyzdy bıldıremız, – deidı Mūrat Qariev.
Onyŋ sözınşe, osyndai jandarǧa äleumettık qyzmet körsetude bırqatar ūiymmen yntymaqtastyq turaly 10 memorandumǧa qol qoiylypty. 2012 jyldan bastap «Äleumettık patrul» ūtqyr qyzmetı men dispetcherlık qyzmet jūmystary da qolǧa alynǧan. Sonymen qatar atalmyş mekeme elordadaǧy tört audannyŋ polisiia punktterımen, medisinalyq äleumettık oŋaltu ortalyǧymen, Astana qalasy IID köşı-qon polisiiasy basqarmasymen tyǧyz bailanysta jūmys jürgızedı eken.
