Ädettegıdei, özınıŋ süiıktı orny – kıtaphanadan taptyq. Teledidar tamaşalap otyr eken. Jazdygünı medisina qyzmetkerlerı künıne orai ortalyqta ūiymdastyrylǧan merekelık şaranyŋ beinetaspasy ekenın bırden bıldık. Sol joly osy taspany Nūrlybek atanyŋ özı tüsırıp edı. «Mūraǧatymda būdan özge özım tüsırgen eluden astam taspa bar» deidı.
Orda būzar otyzǧa tolǧan şaǧynda Arqanyŋ aiazynda jaiau-jalpy qalyp qoiyp, ekı qoly men ekı aiaǧynan bırdei aiyrylady. Qanşama qiyn künderdı basynan ötkızıp, aq halattylardyŋ arqasynda ömırge qaita kelgendei boldy. Därıgerler aiaǧyna jasandy protez ornatady. Al, qol süiegınıŋ tūqylyn medisina tılınde «Krukenberg täsılı» dep atalatyn ädıspen ekıge bölıp, sausaqqa ūqsatyp beredı. Otyz bes jyldan berı bükıl jūmysty osy qoldarymen qanttai etıp atqaryp keledı. Kamerany da käsıpqoi taspagerlerden kem tüsırmeidı.
«Aqauy bar teledidar, radioǧa qoly tiıp ketse bıttı, sairap qoia beredı» deidı ortalyq qyzmetkerlerı.
Aitpaqşy, atai özınıŋ süiıktı kıtaphanasy jaiynda da ūza-aq äŋgımelegendı jaqsy köredı. Qaibır jyly äldekımnıŋ kereksız sanap, qoqysqa tastaǧan kıtaptaryn tügel jinap alǧany bar. Bärın kıtaphana söresıne äkelıp tızıp qoidy. Ortalyqqa qaiyrymdylyq retınde kıtap syilaityndar da kezdesedı keide. Söitıp, kıtaphanasyndaǧy kıtaptar sanyn jetı myŋǧa bır-aq jetkızdı. Mekeme jaŋa ǧimaratqa köşkende bırınde qaldyrmai arqalap äkeldı. Osylaişa qatarlastaryn kıtap oquǧa baulyp jür. Özı de qoly qalt etkende, «Älem klassikterı» söresındegı Aitmatovtyŋ şyǧarmalaryn jiı qolyna alady. «Şyŋǧys Aitmatovtyŋ men oqymaǧan şyǧarmasy joq» deidı.
Memleket saiasaty, jastar mäselesı de aqsaqaldy eşuaqytta beijai qaldyrǧan emes. Äielderdıŋ zeinet jasyn ūlǧaituǧa qatysty aitylǧan ūsynysqa özınıŋ üzıldı-kesıldı qarsy ekenın aitady. Qoǧamdaǧy qazaq tılınıŋ qoldanylu aiasy qazırgıden de keŋei tüsse eken deidı.
Astana qalasynyŋ qarttar men mügedekterge arnalǧan medisinalyq-äleumettık mekemesı bügınde 300-den astam janǧa meken bolyp otyr. Tūrǧyndar arasynda jasy da, jasamysy da bar. Bırı mūnda tıreu bolar tuysy joqtyqtan kelse, endı bırı tuǧan balasynan teperış körıp tüsken. Osyndai qily taǧdyr ielerınıŋ ömır süruge degen süiıspenşılıgın arttyryp, ortaǧa beiımdeluı üşın Nūrlybek atai sekıldı qazynaly qarttar kerek-aq.
Şynar DOSAN
