QOBYZǦA QŪMAR KRAUZE
Jaqynda M.Ötemısov atyndaǧy oquşylar saraiynda 1 mamyr – halyq bırlıgı merekesıne orai №1 Balalar muzyka mektebınıŋ «Aiauly Astanam» atty jyldyq esep beru konsertı öttı. Keştıŋ şymyldyǧyn ūlt aspaptar orkestrı K.Kümısbekovtıŋ «Muzykalyq eskizderımen» aşty.
Tartymdy ötken şara körermen köŋılınen şyqty. Äsırese, küişı Rauşan Orazbaevanyŋ jetekşılıgımen oryndalǧan Qorqyt küilerı konserttıŋ salmaǧyn arttyrdy. Äsırese, sonau Germaniiadan kelgen Rozamari Krauze hanymnyŋ qylqobyzda oinau şeberlıgı köpşılıktı taŋ qaldyrdy.
Germaniianyŋ Erlangen qalasynda tūratyn Rozamari Krauzenıŋ negızgı mamandyǧy – därıger. Özınıŋ aituynşa, sezım qylyn şerter muzyka ızdep, ǧalamtordy şarlaǧan eken alǧaşynda. Aldymen, mysyrlyqtardyŋ bır aspabyna kezıgıp, sony tauyp üirenedı. Ile-şala būl aspaptyŋ dybysy oǧan ūnamai qalady. Sodan keiın türık elınıŋ syrnaiyn tauyp, ony da oinap köredı. Bırde internet saittaryn aqtara otyryp, airyqşa muzykany qūlaǧy şalady. Osy aspapty ızdei kele, Qytai elınıŋ Ürımşı qalasynda tūratyn ūiǧyr şeberı jasaǧan qylqobyz ekenın bıledı. Köp ūzatpai älgı şeberge tapsyrys berıp, üş ai degende qylqobyzdy qolyna tüsıredı. Alaida, onyŋ tılın ūǧynu qiynǧa soǧady.
Osyndai künderdıŋ bırınde qazaq qobyzşysy Rauşan Orazbaevanyŋ Avstriia elınıŋ Gras qalasynda jeke konsertın beretının estıp, ızdep barady.
Sodan bastap Rozamari Rauşannyŋ şäkırtıne ainalady. Avstriiada bastalǧan därıs Germaniiada jalǧasypty. Ötken jyly Almaty qalasyna arnaiy ızdep kelıp, ekı apta boiy qylqobyz tartudy taǧy üirenedı. Mıne, nemıs qyzy juyrda ǧana ötken №1 Balalar muzyka mektebınıŋ esep beru konsertıne kelıp öner körsettı.
«Ekı jyl būryn Avstriianyŋ Gras qalasynda qyzym Toqjan ekeuımız qobyz küilerınen konsert berdık. Konsertten soŋ qasymyzǧa Rozamari kelıp, qobyz aspabyna qūştarlyǧyn, tartqysy keletının aitty. Men, ärine, betın qaqqan joqpyn. Sebebı, qobyzdyŋ ünı, rasynda, adamnyŋ jüregın emdeidı, sezımın terbeidı.
Jyl saiyn Germaniia men Avstriia memleketterınde konsert beremın. Halyq menı asyǧa kütedı. Mıne, Rozamarige de däm-tūz būiyryp, Astanaǧa jol tüstı. Ol menıŋ «Aqqu» atty şyǧarmaşylyq konsertıme arnaiy kelıp, ülesın qosty. Şäkırtterımnen tūratyn ansamblge qatysyp, Qorqyttyŋ küilerın oryndady» deidı №1 Balalar muzyka mektebınıŋ ūstazy, Qazaq ūlttyq öner universitetınıŋ aǧa oqytuşysy Rauşan Orazbaeva.
Ospan SÜLEIMENŪLY,
«Muzyka – şeksız älem» qauymdastyǧynyŋ prezidentı