Qauymdastyq töraǧasy, elorda äkımı Altai Kölgınov ekologiia taqyrybynda onlain breinstorming ötkızdı. Bırıkken Ūlttar Ūiymynyŋ tūraqty üilestıruşısı Mikaela Friberg-Stori da öz közqarasymen bölıstı.
Auqymdy kögaldandyru jūmystary jäne qatty tūrmystyq qaldyqtardy bölek jinau, qaldyqtardy qaita öŋdeu zauyttaryn jaŋartu, ainalma joldar, tazartu qondyrǧylaryn salu – qorşaǧan ortaǧa ziiandy zattardyŋ şyǧaryluyn azaitudyŋ tiımdı şaralary. Astanalar men ırı qalalar halyqaralyq qauymdastyǧy müşelerı qorşaǧan ortany jaqsartu jäne tıkelei täjıribe almasu boiynşa tiımdı şaralar äzırleuge kelıstı.
«Halyq sanynyŋ qarqyndy ösuın eskersek, ırı qalalar üşın ekologiia mäselelerı ärqaşan özektı. Qorşaǧan ortaǧa ziiandy zattardyŋ bölınuın azaitu üşın bız bırqatar şaralar qabyldaudamyz: 1. Qalany gazdandyru. Qazaqstannyŋ Tūŋǧyş Prezidentı Nūrsūltan Nazarbaevtyŋ elordany gazdandyru turaly tarihi şeşımınıŋ arqasynda ziiandy zattardyŋ şyǧaryluy azaiady. Sonymen qatar būl qala tūrǧyndarynyŋ ömır süru sapasyn jaqsartady. Sonyŋ ışınde 1-JEO jäne 2-JEO gazǧa auysady. 2. Jelıge 100 elektr avtobusy şyǧaryldy. Jaqynda taǧy sonşama avtobus jelıge şyǧady. 3. Bız karerdı odan ärı rekultivasiialau arqyly qūrylys qaldyqtaryn saqtauǧa jäne öŋdeuge arnalǧan alaŋ saludy bastadyq. Qaldyqtardy qaita öŋdeu zauytyn, poligondy qalpyna keltıru jūmystaryn jürgızemız. Sonymen qatar aulalarda qaldyqtardy bölek jinauǧa arnalǧan konteinerler ornatudy jalǧastyramyz. Mektepterde eko-saǧattar ötkızıledı. 4. Memleket basşysynyŋ tapsyrmasy boiynşa jäne qalanyŋ «tynysyn» aşu arqyly bız auqymdy abattandyru jūmystaryn jürgızıp jatyrmyz. Är audannyŋ özınıŋ ekologiialyq aimaqtary boluy kerek. Bız otyrǧyzylǧan aǧaştardyŋ sanyn jyl saiyn köbeitetın bolamyz. 5. Qaladan ötetın Esıl özenıne būryn kollektorlardan su tıkelei aǧyp, ony lastaityn. Endı sol aumaqta jabdyqtau kollektorlaryn qaita qūryp, tazartu qondyrǧylaryn salyp jatyrmyz. Būl özenge jıberer aldynda jaŋbyr men erıgen qar suynyŋ tazaruyn qamtamasyz etedı. Bız jūmys ıstep jatqan basqa da bırqatar baǧyttar bar. Qazır bükıl älemde ekologiiaǧa erekşe köŋıl bölınıp jatqanyna quanyştymyn. Är qalanyŋ jäne eldıŋ özınıŋ erekşe täjıribesı bar, al Astanalar men ırı qalalar halyqaralyq qauymdastyǧy platformasy bızdıŋ täjıribemızben tıkelei bölısuge mümkındık beredı» dedı elorda äkımı Altai Kölgınov.
Onlain-konferensiia barysynda Astanalar men ırı qalalar halyqaralyq qauymdastyǧy bırınşı vise-prezidentı Iýrii Meşeriakov, TMD Ekonomikalyq damu ıskerlık ortalyǧynyŋ bas direktory Vladimir Savchenko jäne basqa qauymdastyq müşelerı Qazaqstan astanasy men Elbasy tūrǧyndaryn astanany Almatydan Aqmolaǧa köşıru künımen qūttyqtap, «Qalanyŋ avtory – Tūŋǧyş Prezidenttıŋ köregen şeşımı el astanasyn tabysty, älemge äigılı qalaǧa ainaldyrǧanyn» atap öttı.
