Qos altynnyŋ quanyşy
Olimpiada oiyndary bastalǧaly qazaq janküierınıŋ quanyşynda şek joq…
… Jeŋıs ruhymen jelpınıp jürmız.
… Qos altyn qazaqtyŋ qūdıretın köterıp tūr.
Tünımen-künımen bırın bırı qūttyqtaǧan aǧaiynnyŋ köŋılı şat-şadyman…
Törtkül dünienıŋ eŋ üzdık sportşylary tört jylda bır ret saiysqa tüsetın dübırlı doda bastalǧan künı- aq küllı älemge «Qazaqstandyq sportşy – Olimpiada chempiony!» degen aqjoltai aqparat tarap kettı…
İä, qazaqstandyq veloşabandoz Aleksandr Vinokurov, şyny kerek, kütpegen jerden, London olimpiadasynyŋ qaharmany atandy. Ataqty «Vino» 250 şaqyrymdyq jarysta aldyna jan salmai, märe syzyǧyn bırınşı bolyp kestı. Būl Qazaqstan qorjynyn tüsken alǧaşqy altyn medal boldy.
«Menıŋ būl jeŋısımdı Qazaqstanǧa arnaimyn. Būl menıŋ jeke jeŋısım emes, būl – bapkerlerımnıŋ, janküierlerımnıŋ jeŋısı. Şynymdy aitsam, sporttan däl osylai ädemı ketemın oilamaǧan edım. Endı bapkerlık nemese menedjerlık käsıppen ainalysatyn şyǧarmyn», – dedı Londondaǧy «Qazaq auylynda» baspasöz mäslihatyn ötkızgen Vinokurov.
Alǧaşqy altynnyŋ quanyşy boiymyzdan taramai-aq qazaq jūrtşylyǧy taǧy bır keremet jeŋıstıŋ kuägerı boldy. Būl joly auyr atlet Zülfiia Chinşanlo bükıl älemge Qazaqstan änūranyn tyŋdatty. Bidai öŋdı boijetkenımız Olimpiada chempiony bolyp qana qoimai, älem rekordyn da jaŋartty. Jūlqa köterude 95 kelı, serpe köterude 131 kelı salmaqty baǧyndyrǧan Zülfiia özınıŋ jeŋıs qūrmetıne Qazaqstan tuy köterılıp, änūranymyz şaryqtaǧan sätte köz jasyna ie bola almady…
Jeŋıstı sätten keiın bergen sūhbatynda Zülfiia chempion «Men būl jeŋısımdı Qazaqstan elıne arnaimyn. Älı de Olimpiada chempiony bolǧanyma sene almai otyrmyn. Būl altyn medal jaiynda men bes jyl oilap jürdım… Bıraq qazır eşteŋenı esıme tüsırgım kelmeidı. Äitpese, taǧy da jylap jıberemın. Men taǧy da bır olimpiadalyq siklda, iaǧni tört jyldai sportta bolyp, qazaqstandyqtardy jaŋa rekordtarmen, jeŋıstermen quanta bergım keledı», – dep aǧynan jaryldy.
Sözderınen de, közderınen de qazaq elınıŋ şynaiy patriottary ekenı aitpai-aq aŋǧarylatyn qos chempionǧa bız de rizaşylyq sezımmen qaraimyz. Būl jeŋıster şyn mänınde bükıl qazaqstandyqtardy şeksız quanyşqa bölep, talai qazaq balasynyŋ jüregıne jeŋıs ruhyn sıŋırgenı aiqyn. Olai bolsa, eldık märtebemızdı, ūlttyq mereiımızdı ösıretın osyndai jeŋıstı künderımız jalǧasa bergei.
London törınde kök bairaǧymyz jelbırep, änūranymyz şaryqtai tüssın!
Londonnan alatyn jüldemız älı de bar. Olimpiada oiyndarynan jüldesız qaitpaityn boksşylarymyz ben baluandarymyz, İlin sekıldı «altyn balanyŋ» şeşuşı saiystary älı alda. Demek, qazaq janküierı taqymyn qysyp, jüregı eljıreitın sätter de aldaǧy künderdıŋ enşısınde.
Är jarysqa eleŋdep otyrǧan bar qazaqtyŋ bügıngı oiy osyndai…
Ǧalym QOJABEKOV