Keşe Nūr-Sūltan qalasy mäslihatynyŋ kezekten tys sessiiasynda qalanyŋ 2020-2022 jyldarǧa arnalǧan biudjetıne engızılgen özgerıster men tolyqtyrular qaraldy. Tiıstı baiandamany Ekonomika jäne biudjettık josparlau basqarmasynyŋ basşysy Qaisar Maŋqaraev jasady. Sessiiaǧa qala äkımınıŋ orynbasary Nūrlan Nūrkenov qatysty.
Qala biudjetıne kırıster somasyna qarai şyǧyndar da qalyptasqanyn aitqan baiandamaşy, būl qarjy basymdyq berılgenın baǧyttarǧa, atap aitqanda, äleumettık salaǧa, bılımge, densaulyq saqtauǧa bölınıp otyrǧanyn jetkızdı. Sonyŋ ışınde äleumettık salaǧa 1 mlrd 254 mln teŋge jūmsau qarastyrylǧan.
– Būl qarjynyŋ negızgı bölıgı jürıp-tūruy qiyndaǧan I top mügedekterıne jeke kömekşılerdı taǧaiyndauǧa baǧyttalady. Al 200 million teŋge PSR zerthanaǧa arnalǧan qūral-jabdyqtardy satyp aluǧa jūmsalady, – dedı Q.Maŋqaraev.
Kölık infraqūrylymyn damytuǧa qosymşa 7 mlrd 270 mln teŋge qarastyrylǧan. Sonyŋ 5 mlrd 451 mln teŋgesı jolauşylardy tasymaldaudy subsidiialauǧa bölınedı. Qalany gazdandyru jūmysyna qosymşa 404 mln teŋge bölu turaly şeşım şyǧaryldy. Būl qarjy gazdandyru jobasynyŋ ekınşı jäne üşınşı kezeŋderın jalǧastyruǧa baǧyttalady. Keibır nysandardyŋ qūrylysyn aiaqtauǧa 1 mlrd 74 mln teŋge bölınıp otyr.
1 mlrd 651 mln teŋge qūrylys qaldyqtary poligonyn saluǧa jäne saiabaqtar men şaǧyn baqtar qūrylysyn jalǧastyryp, aiaqtauǧa qarastyrylǧan. Qala audandary äkımdıkterıne de ärtürlı jūmystarǧa qosymşa qarjy bölındı. Būl qarjy negızınen şahardy abattandyru men sanitarlyq tazalauǧa jūmsalady. Mäslihat deputattarynyŋ bölıngen qarjyny igeru jönındegı eskertuınen keiın biudjet bekıtıldı.
Qalalyq Tūrǧyn üi jäne tūrǧyn üi inspeksiiasy basqarmasynyŋ basşysy Asylbek Esenbaev memleket mūqtajdyǧy üşın alynatyn jer telımderı tızbesımen tanystyrdy. Onyŋ mälımdeuınşe, 9 nysan qūrylysyna arnalǧan 59 jer telımı boiynşa tiıstı jūmystar jürgızılıp jatyr. Būl telımderdıŋ jalpy somasy 131 mln teŋgenı qūraidy.
Jer telımderı Täuelsızdık daŋǧyly men Şarl de Goll köşesı qiylysyndaǧy, Ş.Qūdaiberdı men Manas köşelerı audanyndaǧy, Ş.Qosşyǧūlūly men Jambyl köşelerı qiylysynda japsarlastyra salynǧan orynjailar men parkingı bar köppäterlı tūrǧyn üi keşenderı qūrylysyna, S-189 köşesındegı 600-800 oryndyq köpsalaly auruhanany saluǧa, Tūran daŋǧyly men №24 köşesı qiylysyndaǧy orta mektep qūrylysyna arnalady.
Tiıstı joba boiynşa Saryarqa daŋǧyly boiyndaǧy köpırden bastap «Köktal» tūrǧyn alabyna deiıngı Esıl özenınıŋ arnasy besınşı kezek aiasynda qaita jaŋartylady. Y.Altynsarin men Gete köşelerı qiylysyndaǧy jäne Ş.Qosşyǧūlūly, 8 mekenjaiyndaǧy aumaqtar abattandyrylady. V.Vişnevskii köşesı, 10 mekenjaiy boiyndaǧy injenerlık jelı jaŋarady.
