Qalalyq äkımdıkte «Bäsekege qabılettı biznes – bäsekege qabılettı ekonomika» atty jiyn öttı. Jiynda jergılıktı bilık jäne ministrlıkter ökılderı, memlekettık organdar qyzmetkerlerı jäne «Atameken» ūlttyq käsıpkerler palatasynyŋ ökılderı men şaǧyn jäne orta käsıp ielerı bas qosty.
İnvestisiialar jäne käsıpkerlıktı damytu basqarmasynyŋ basşysy Älışer Äbdıqadyrovtyŋ töraǧalyq etuımen ötken jiynda alǧaşqy bolyp söz alǧan Strategiialyq bastamalar ortalyǧynyŋ jobalau jönındegı direktory Baqytjan Särkeev biznestıŋ bäsekege qabılettılıgı turaly aitty.
– Astana – elımız boiynşa şaǧyn jäne orta käsıpkerlıktıŋ köşbasşysy. Elordada jeŋıl önerkäsıp ılgerı basyp keledı. Sonymen qatar, bas qalanyŋ qūrylys industriiasy da qarqyndy. Sondyqtan qūrylys materialdaryn öz elımızde köptep şyǧaruymyz kerek. Jalpy, Astananyŋ äleuetı zor. Degenmen, el ekonomikasyn odan ärı köteru üşın şaǧyn jäne orta biznestı älı de damytu qajet. Elımızde önım öndıruşı kompaniialar az bolǧandyqtan, otandyq tauarlar eksportqa asa köp şyǧarylmaidy. Käsıpkerler üşın kredit aluda da mäseleler joq emes. Al AQŞ, Germaniia, Singapur siiaqty ekonomikasy damyǧan elderde bärı basqaşa. Eldegı öndıruşıler sanyn köbeitıp, eksportqa şyǧatyn otandyq tauarlardy ūlǧaityp, ekonomikamyzdy köteru üşın käsıpkerler küş bırıktırıp jūmys ısteuı kerek, – dedı B.Särkeev.
Odan keiın söz alǧan «Ekonomikalyq zertteuler instituty» AQ strategiialyq zertteuler ortalyǧynyŋ jobalau jönındegı direktory Baqytgül Qambarova IMD reitingısındegı biznes bäsekelestıgıne toqtaldy.
– Reiting – ülken bäige. Osyǧan qarap-aq är eldıŋ strategiialyq qabılettılıgın baiqauǧa bolady. Al IMD reitingısıne älemnıŋ 60-tan asa elı qatysady. Qazaqstan – būl reiting boiynşa byltyr 32-orynda bolsa, biyl 38-orynda. Bırqatar memleketpen salystyrǧanda, būl – elımız üşın ülken jetıstık. Aita ketu kerek, osy älemdık bäsekede 27 tıl resmi türde tırkeldı. Sonyŋ bırı – qazaq tılı. Būl da quanarlyq jaǧdai, – degen B.Qambarova barşa käsıpkerlerdı atalmyş bäigege qatysuǧa şaqyrdy.
Al öz kezegınde Ūlttyq ekonomika ministrlıgı Strategiialyq josparlau jäne taldau departamentı direktorynyŋ orynbasary Bauyrjan Tūrlybekov Qazaqstandaǧy qolaily biznes ortany qalyptastyru tūrǧysynda atqarylyp jatqan jūmystar turaly söz qozǧady. Onyŋ aituynşa, aǧymdaǧy jyldyŋ 24 mamyrynda Prezident Käsıpkerlıktı retteu turaly Zaŋǧa qol qoiǧannan keiın köleŋkelı bizneske tyiym salynyp, aiyppūldar kölemı tömendetılgen. Jiyn barysynda käsıpkerler spikerlerge kökeilerındegı saualdaryn qoiuǧa mümkındık aldy.
– Qazaqstanda zergerlerdıŋ 95 paiyzy köleŋkelı biznespen ainalysady. Öitkenı bızde būl käsıpke jaǧdai jasalmaǧan. Aşyq türde tırkelu üşın mındetteletın qūjat sany öte köp. Qosymşa qūn salyǧy taǧy bar. Sonymen qatar şikızat materialdary da qymbat. Otandyq materialdardy satyp alǧannan görı Türkiiadan äkelınetın äşekei būiymdardy erıtıp, sodan qaita jasap şyǧaru tiımdırek. Ūlttyq oiu-örnekpen bezendırılgen äşekei-būiymdardy brendke ainaldyrsaq dep josparlaǧanbyz. Bıraq osyndai türlı mäselelerdıŋ saldarynan jobalardy jüzege asyru mümkın bolmai tūr. Osy mäselenı bırjaqty etıp berseŋızder, – dedı käsıpker Taimas Mūqaşev.
Eger äşekei-būiymdar eksportqa şyǧarylsa, qosymşa qūn salyǧy alynyp tastalatynyn tılge tiek etken Bauyrjan Tūrlybekov būl mäselenı joǧarǧy jaqqa jetkızetının aitty. Spikerler käsıpkerlerdıŋ osy jiynda kötergen mäselelerı nazardan tys qalmaitynyn jetkızdı.
