Astana äkımdıgınıŋ Zorlyq-zombylyq nemese zorlyq-zombylyq qaupı saldarynan qiyn jaǧdaiǧa tap bolǧan adamdarǧa arnalǧan daǧdarys ortalyǧynda Nauryz toiy öttı.
Ūlystyŋ ūly künıne ortalyq qyzmetkerlerı tyŋǧylyqty daiyndalǧan. Halqymyzdyŋ ǧajaiyp dästürlerınen körınıs qoidy. Qūda tüsıp, qyz ūzatty. Törde otyrǧan qūdalar maqaldap söilep, dombyramen än aityp, küi şerttı. Tanymal änşı Arai Asqap ūzatylyp bara jatqan qyzdy syŋsu aityp şyǧaryp saldy. Artyq-kemı joq, kädımgı şynaiy ömırdegıdei boldy. Otbasy qūndylyǧyn därıptegen dästür köp adamǧa oi saldy.
Sonymen bırge, Qazaqstan halqy assambleiasynyŋ özbek, äzerbaijan, täjık, türık, bolgar jäne gruzin etno-mädeni bırlestıkterınen kelgen önerpazdar merekenıŋ körıgın qyzdyrdy. Özbekşe bi bilep, türıkşe än aityldy. Basqa ūlttar da öz önerlerın körsettı.
– Bügınde bızdıŋ ortalyqta 13 äiel, 32 bala tūryp jatyr. Olardyŋ bärı de qamqorlyqqa alynǧan. Bız olarǧa tamaşa merekelık köŋıl-küi syilaǧymyz keldı. Maqsatymyz oryndaldy. Äsırese, balalardyŋ quanyşynda şek joq. Etno-mädeni bırlestıkterınıŋ ökılderı jetkınşekterge syilyq tartu ettı. Olarǧa ülken alǧys aitamyz, – deidı mekeme qyzmetkerı Torǧyn Ahmetova. Şara soŋynda qonaqtar nauryz köjeden däm tatyp, ortalyq ūjymyna rizaşylyqtaryn bıldırdı.
Azamat Esenjol
