Astana künı qarsaŋynda qalalyq mäslihat deputattary üş azamatqa «Astana qalasynyŋ qūrmettı azamaty» ataǧyn beru turaly şeşım şyǧardy.
– Astana şaǧyn qaladan ırı megapoliske ainaldy. Elordanyŋ ösıp-örkendeuı azamattardyŋ eren eŋbegımen jüzege asuda. Sondai tūlǧalardyŋ qataryna Serık Aqşolaqov, Qaisar Omarov, Nikolai Tihoniuktı jatqyzuǧa äbden bolady. Bas qalanyŋ qalyptasuy men damuyna qomaqty üles qosqan tūlǧalarǧa «Astana qalasynyŋ qūrmettı azamaty» ataǧyn beruge ūsynamyn, – dedı mäslihat otyrysyna qatysqan elorda äkımı Jeŋıs Qasymbek.
Ūsynylǧan azamattar bolmys-bıtımımen tanylyp, qabılet-qasietımen erekşelenedı. Serık Aqşolaqov ūzaq jyldar densaulyq saqtau salasynda qyzmet atqaryp, Ūlttyq neirohirurgiia ortalyǧynyŋ jūmysyn jüieleuge eŋbek sıŋırdı. Parlament Senatynda deputat retınde ūzaq jyldar qyzmet etken Qaisar Omarov zaŋnamalyq bazany jetıldıruge üles qosty. Ol qūrylys, ülestık qatysu jäne taǧy basqa mäseleler boiynşa zaŋnamalyq bazany jaqsarta tüstı. Al Nikolai Tihoniuktıŋ basşylyǧymen Astananyŋ simvoly – «Bäiterek» keşenı, älemdegı eŋ biık şatyrly ǧimarat – «Han Şatyr» sauda, oiyn-sauyq ortalyǧy, teŋızden eŋ alys ornalasqan «Duman» okeanariumy, «Astana Opera» opera jäne balet teatry, «Saryarqa» velotregı jäne taǧy basqa jobalar boi köterdı. Iаǧni elorda qūrylysynda özındık ızı bar qūrylysşy maman ärı menedjer.
Mäslihat deputattary qala äkımınıŋ ūsynysyn qoldap, bırauyzdan dauys berdı.
Aita ketetını, Astana qalasy mäslihatynyŋ 2009 jylǧy 6 qaraşadaǧy şeşımımen «Astana qalasynyŋ qūrmettı azamaty» ataǧyn beru erejesı bekıtıldı. Sodan berı «Qūrmettı azamat» ataǧy berılıp keledı. Būl qatarda Grekiia men Moldovanyŋ būrynǧy Prezidentı Konstantinos Stefanopulos pen Petru Luchinski, Fransiianyŋ memleket qairatkerı Jak Attali, Türkiianyŋ ısker azamaty Fettah Tamindjenı atauǧa bolady. Ǧylym, öner, ädebiet, mädeniet salasynda eŋbek sıŋırgen Äzerbaijan Mämbetov, Şerhan Mūrtaza, Myrzatai Joldasbekov, Tölegen Mūhamedjanov, Bibıgül Tölegenova bar. Är jyldary Astana qalasyn basqarǧan Ädılbek Jaqsybekov, Temırhan Dosmūhambetov, Ömırzaq Şökeev, Asqar Mamindı de qūrmettıler tızımınen tabuǧa bolady.
