«Astana aqşamy» gazetınde ūzaq jyl qyzmet ıstegen, elımızdıŋ aqparat-baspasöz salasynda 40 jyl ter tögıp, osy salanyŋ örkendep damuyna öz ülesın qosqan maitalman jurnalist Taŋatar Abdollaūly Töleuǧaliev «Aqparat salasynyŋ üzdıgı» tösbelgısımen marapattaldy. Tösbelgını «Elorda Aqparat» JŞS direktory Oljas Sydyqbek tabys ettı.
Taŋatar Töleuǧaliev jurnalistık salada qyryq jyl qyzmet ıstedı. Eŋbek jolyn oblystyq «Oral öŋırı» gazetınde korrektor bolyp bastaǧan ol osy basylymda tılşı, aǧa tılşı, bölım meŋgeruşı boldy. Batys Qazaqstan oblysy äkımı janyndaǧy Qazaqstan halqy kışı Assambleiasy hatşylyǧynda keŋesşı bolyp qyzmet ıstedı.
Jurnalistıŋ şirek ǧasyrlyq ömırı elordamyz – Nūr-Sūltan qalasynyŋ tynys-tırşılıgı, ösıp-örkendeuımen tıkelei bailanysty. 1998 jyly elordaǧa köşıp kelıp, «Astana Aqşamy» gazetıne jūmysqa tūrdy. Qalamynyŋ qarymyn tanytyp, astanalyq basylymnyŋ bölım meŋgeruşısı, bas redaktordyŋ orynbasary qyzmetterın atqardy. Būdan keiın «Astana» jurnaly, Astana qalasy Tılderdı damytu basqarmasy, «Qazaqstan temırjolşysy» gazetı, «Kazkontent» aksionerlık qoǧamynda basşylyq qyzmetter atqardy. Keiın «Astana Aqşamy» gazetıne qaityp oralyp, sodan berı elordanyŋ bas basylymy arqyly qalanyŋ damuyna özındık ülesın qosyp keledı. «Astana aqşamy» gazetınde «Qūqyq» betın jürgızıp, qoǧamda oryn alyp jatqan keleŋsız jaǧdailardy qalamymen tüirep, sodan saqtanuǧa şaqyrdy. Aqyndyǧymen de tanylǧan ärıptesımızdıŋ qazırge deiın ekı kıtaby (poeziialyq jäne publisistikalyq) jaryq kördı.
