Bügın – Memlekettık rämızder künı. Egemen el ekenımızdı bıldıretın bırden-bır nyşandar – Memlekettık tuymyz, eltaŋbamyz ben änūranymyzben täuelsızdıgımızdıŋ tūǧyry nyq. Azattyǧymyzdy alǧanşa qyzyl tuǧa telmırıp, oraq pen balǧany qūdıret sanap, on bes odaqtas respublikany änge qosyp kelgen bız osydan jiyrma jetı jyl būryn öz rämızderımızge ie boldyq. Qazır kök tuymyz biıkte jelbırep, eltaŋbamyz elımızdı eŋselendırıp, änūranymyz asqaqtap tūr.
Rämızderımızdıŋ bärı de ūlttyq tanymmen, salt-dästürlerımızben qabysady. Aspan tüstes Memlekettık tuymyzda qyran beinesı, jiegınde ūlttyq örnek, ortasynda altyn kün men onyŋ şūǧylasy beinelengen. Tudyŋ tüsınıŋ özı tübımız türkı ekenın bıldıredı. Kök tüs türkı mädenietındegı tereŋ simvoldyq mänge ie. Al qyran ejelden it jügırtıp, qūs salǧan saiatşylyq käsıbımızden habar beredı.
Eltaŋbamyzda ūltymyzǧa tän belgıler, tıptı, köp. Mūndaǧy şaŋyraq, şaŋyraqty ainala kün säulesındei tarap şanşylǧan uyqtar, qanatty pyraqtar bärı de jarasym tapqan. Eltaŋbanyŋ avtory Jandarbek Mälıbekovtıŋ bırde «Jetı saqina – jetı atany, tektılıktı bıldıretın ūǧym. Men özım Eltaŋbadaǧy beinelerge qyryqqa juyq atau berdım. Sol ataular azamattardyŋ elge, atamekenge, halyqqa degen qūrmetın arttyrady» degenın estıgen edık. Demek, eltaŋba jobasy taza ūlttyq ūǧymǧa süienıp jasaldy.
Elordadaǧy Ūlttyq muzeidegı är aptanyŋ alǧaşqy jūmys künı änūranymyzben bastalatyn boldy. Muzei qyzmetkerlerı keşe tūŋǧyş ret jūmystaryn änūrandy şyrqaumen bastady. Mūnyŋ maqsaty – mekemede ūlttyq ruh, patriottyq, otanşyldyqty nasihattau. Öte dūrys, 1986 jyldyŋ jeltoqsan aiynda jastardyŋ ruhyn oiatqan, 2006 jyly änūranǧa ainalǧan «Menıŋ Qazaqstanym» änı älı talai ūrpaqty tärbieleidı.
Bügın elımızde Memlekettık rämızder künı keŋ kölemde atalyp ötıledı. Elordada da 40-tan astam ärtürlı şara rämızderımızdı ūlyqtauǧa arnalady. Rämızderımızben ruhtanaiyq! Kök tuymyz, eltaŋbamyz ben änūranymyz ärqaşanda biıkte bolsyn!
