Astananyŋ 20 jyldyq mereitoiyna orai Tūran daŋǧyly boiynda ornalasqan «Saryarqa» sauda-oiyn-sauyq ortalyǧynyŋ janynda «QazTransOil» kompaniiasynyŋ etnoauyly boi köterdı.
Ūzaqtyǧy 5377 şaqyrymdyq magistraldyq mūnai qūbyry jelısın alyp jatqan «QazTransOil» kompaniialar tobynyŋ öndırıstık nysandary Qaraǧandy, Pavlodar, Türkıstan, Soltüstık Qazaqstan, Atyrau, Maŋǧystau, Batys Qazaqstan, Qyzylorda, Almaty, Aqtöbe, Şyǧys Qazaqstan oblystarynda ornalasqan. Etnoauylda «QazTransOil» AQ-tyŋ är öŋırdegı mūnai qūbyrşylary «Maŋǧystau», «Aq-Jaiyq», «Keŋ Jylyoi», «Mūǧaljar», «Kaspii», «Jetısu», «Jıbek joly» atty bır-bır aqşaŋqan qazaq üiın tıgıp, onda eldıŋ ruhani mūrasy men mūnai-gaz salasynyŋ damuy turaly nasihat jūmystaryn jürgızdı. Mysaly, Qaraǧandy mūnai qūbyry basqarmasynyŋ «Saryarqa» atty kiız üiı «Ruhani jaŋǧyru» baǧdarlamasynyŋ bastamaşysy bolǧan Nūrsūltan Nazarbaevtyŋ eŋbek jolyna arnalsa, pavlodarlyq mūnai qūbyrşylarynyŋ «Baianauyl» kiız üiınde «QazMūnaiGaz» kompaniiasy men onyŋ enşıles käsıporyndary daiyndaǧan Astananyŋ säulettı ǧimarattarynyŋ maketı men elordanyŋ damuy jaily aqparattyq jūmystar körsetıldı. Sol siiaqty özge de kiız üilerde türlı taqyryptyq jūmystar, elımızdıŋ kielı kartasyna engen nysandar men ūlttyq kiımder toptastyrylǧan eksponattar qoiylǧan. «Etnoauyldy ūiymdastyrudaǧy mūnai qūbyrşylarynyŋ maqsaty – keluşılerge ötkendı sabaqtap, elımızdıŋ tarihi-mädeni mūrasyn nasihattap, osy arqyly taǧylymdy tarihty bastan keşırgen halyqtyŋ ruhani qazynasynyŋ baǧa jetpes bailyǧyn körsetu. Öitkenı būl bailyq – mūnaidan da qymbat» deidı ūiymdastyruşylar. Etnoauyldyŋ aşylu saltanatynda än men küi äueledı. Saltanatty şaraǧa qatysqan Astana äkımınıŋ orynbasary Ermek Amanşaev pen «QazTransOil» AQ bas direktory Dimaş Dosanov sahna törıne köterılıp, jūrtşylyqty mereilı merekemen qūttyqtady.
– Elorda – Elbasy negızın salǧan qala. 20 jyl ışınde älemdı moiyndatqan Astana jetıstıktı eselep, biık belesterdı baǧyndyryp jatyr. Mūny elımızge berılgen ülken baǧa dep esepteimız. Jalpy, elorda toiyn bükıl el bolyp toilaidy. Sänı men saltanaty kelısken būl etnoauyl – sonyŋ bır körınısı. Mūnda täuelsız eldıŋ tarihynan syr şertetın jädıgerler köp eken, – degen Ermek Amanşaev jinalǧandardy merekemen qūttyqtai kele, astanalyqtarǧa osyndai ruhani mūraǧa bai auyl ūsynǧany üşın «QazTransOil» kompaniiasynyŋ ūjymyna özınıŋ rizaşylyǧyn bıldırdı.
– Qorşaǧan ortany, ekologiiany qorǧau jäne qorlardy ünemdeu – kompaniiamyzdyŋ basty maqsaty, – dedı «QazTransOil» AQ bas direktory Dimaş Dosanov. – Negızgı mındetımız – jūmysşylarymyzdyŋ äleumettık jaǧdaiyn jaqsarta otyryp, elımızdıŋ ekonomikasyn köteruge üles qosu. Al Astana – täuelsızdık pen jaŋa tarihtyŋ jäne bolaşaqtyŋ simvoly bolǧandyqtan, är öŋırdegı mūnai qūbyrşylary elorda toiyna osylai üles qosudy jön kördı.
7 şıldege deiın etnoauyl aumaǧynda 500-den asa adamdy qamtityn qaiyrymdylyq şaralar ötıp, äleumettık jaǧynan az qamtylǧan otbasylarǧa türlı syilyqtar men azyq-tülık jiyntyǧy ülestırılıp, tüskı as berılmek.
