Qazaq elınıŋ eŋ baǧaly bailyǧy – bırlıgı men tūraqtylyǧy. Al respublika jūrtşylyǧy arasyndaǧy ruhani kelısım bırlık pen tūraqtylyqtyŋ tūtqasyna ainalyp otyr. Keşe Beibıtşılık jäne kelısım saraiynda ötken halyqaralyq konferensiiada qazaq elınıŋ bereke-bırlıgı aişyqtaldy.
Keşe Astanada 18 qazan – Ruhani kelısım künı jäne 25 qazan – Respublika künıne orai «Ruhani kelısım – qazırgı qoǧamdaǧy beibıtşılık pen bırlıktıŋ negızı» taqyrybynda halyqaralyq konferensiia öttı.
Astana qalasynyŋ äkımdıgı, «N.Nazarbaevtyŋ konfessiiaaralyq jäne örkenietaralyq dialogty damytu ortalyǧy» KE AQ, sondai-aq, Astana qalasynyŋ Dınderdı zertteu ortalyǧy ūiymdastyrǧan būl şaraǧa Astana qalasy mäslihatynyŋ toraǧasy Erlan Kanalimov, Astana qalasy äkımınıŋ orynbasary Eset Baiken, Ruhani kelısım künı ideiasynyŋ avtory, QR eŋbek sıŋırgen qairatkerı Tölegen Mūhamedjanov jäne dıni bırlestıkterdıŋ basşylary, sondai-aq, AQŞ, Livan, Ündıstan, Şveisariia, Germaniia, Resei jäne Qyrǧyzstan elderınen kelgen qonaqtar qatysty.
– Qazaqstanda dıni senım bostandyǧyna kepıldık berılgen. Būl turaly Ata zaŋymyzda, sondai-aq, dıni qyzmet jäne bırlestık turaly zaŋnamada naqty aiqyndalǧan. Elımızde türlı ūlt pen dın ökılderınıŋ qūqyǧy teŋ qaralyp, ruhani tūrǧydan qatar damuyna mümkındık berıldı. Sonyŋ negızınde elımızde 18 konfessiianyŋ doktrinasy qalyptasyp, qoǧamda ornyqty. Qazaq halqynyŋ salt-dästürı men ädet-ǧūrpy dınmen ūştasqan. Saliqaly ömır süru, ūrpaqty dūrys tärbieleu, keler ūrpaqqa ülgı-önege körsetu dın men dästürımızdıŋ özara sabaqtasqan erekşelıgı dep aituǧa bolady. Ruhani kelısım, ūlttar men dästürlı dınder arasyndaǧy bırlık – bızdıŋ baǧa jetpes bailyǧymyz, tūraqtylyq tūǧyrymyz. Eldıŋ äleumettık-ekonomikalyq körsetkışı halyqtardyŋ tatulyǧyn tūǧyr etıp, dami tüsedı. Özgerıske toly ärı belgısızdık beleŋ alǧan qazırgı taŋda bügıngı basqosudyŋ män-maŋyzy airyqşa, – dedı Erlan Kanalimov.
«Tatulyq, bereke, bırlık ūiyǧan elge baq qonady» dep söz bastaǧan qala äkımınıŋ orynbasary Eset Baiken qazaq qaşanda bırlıktı tu etken halyq ekenın airyqşa atap öttı.
«Maiqy bidıŋ «Altau ala bolsa, auyzdaǧy ketedı. Törteu tügel bolsa, töbedegı keledı» degen naqyl sözı qanşa ǧasyr ötse de öz qūnyn joiǧan joq. Halqymyz üşın bereke-bırlıktıŋ maŋyzy qaşanda zor. Sol sebeptı elımızde 130-dan astam ūlt pen ūlystyŋ beibıtşılıkte qatar ömır süruı men dınaralyq kelısımnıŋ ädemı körınısın bükıl älemge tanytyp kelemız. Memleket basşysy Qasym-Jomart Toqaev «Halqymyzdyŋ yntymaq, bırlıgı būl taǧdyrdyŋ bere salǧan syiy emes, būl, eŋ aldymen, jūrtymyzdyŋ kündelıktı tabandy eŋbegınıŋ arqasy ekenın dūrys tüsınuımız kerek. Sondyqtan bız bırlıgımızdı kün saiyn nyǧaityp otyruymyz qajet, iaǧni tatulyq pen kelısım halqymyzdyŋ ömır saltyna ainaluy tiıs» dep aitqan bolatyn. Demek, bız üşın tatulyqtan ötken berık tūǧyr joq» dedı äkım orynbasary.
Eske sala keteiık, 1992 jyly 18 qazanda Almatyda Bırınşı düniejüzılık ruhani kelısım kongresı öttı. Adamzat tarihynda tūŋǧyş ret barlyq dınderdıŋ, bıtımgerşılık qozǧalystar men qoǧamdyq ūiymdardyŋ ökılderı, ruhaniiat pen adam ömırınıŋ mäselelerıne alaŋdaityn belgılı ǧalymdar men mädeniet qairatkerlerı bır üstel basyna jinaldy. Osy jinalysqa qatysuşylar 18 qazandy Ruhani kelısım künı – qaqtyǧystar men qaqtyǧystarǧa moratorii künı, adamdar arasynda özara tüsınıstık ornatu künı, meiırımdılık pen körşısıne kömek künı dep jariialady. Sodan berı Qazaqstanda jyl saiyn 18 qazan – Ruhani kelısım künı, äleumettık maŋyzy bar kün. Al konferensiia soŋy saltanatty konsertke ūlasty.
