Prezident Qasym-Jomart Toqaev Q.Quanyşbaev atyndaǧy Memlekettık akademiialyq qazaq muzykalyq drama teatrynda sahnalanǧan «Joşy han» spektaklınıŋ premerasyn körermendermen bırge tamaşalady. Qoiylym «Şyŋǧys ordasy» men «Qazaq ordasy» atty ekı bölımnen tūrady. Spektaklde Şyŋǧys han men ūly Joşy arasyndaǧy qarym-qatynas, olardyŋ el basqaru ısındegı qabyldaǧan şeşımderı, ömırınıŋ belgılı kezeŋderı keŋınen suretteledı.
Sondai-aq Ūly daladaǧy türkı taipalaryn bır ūlysqa bırıktırıp, Ūlytauda ordasyn tıkken Joşy oǧlan beinesı Qazaq memlekettıgınıŋ negızın qalauşy – Joşy han därejesıne deiın köterıledı. Tarihi dramanyŋ avtory – belgılı jazuşy-dramaturg Duman Ramazan, qoiuşy rejisserı – Qazaqstannyŋ eŋbek sıŋırgen qairatkerı Bolat Ūzaqov.
Memleket basşysy qoiylymdy tamaşalaǧan soŋ tuyndy avtorymen jäne teatr ūjymymen äŋgımelestı. «Qūtty bolsyn! Öte keremet qoiylym boldy. Şyn mänınde, pesanyŋ taqyryby öte maŋyzdy, özektı. Mūndai tuyndylar halqymyz üşın qajet dep oilaimyn. Pesanyŋ tılı, mätını öte jaqsy jazylǧan. Ärtısterdıŋ bärı jaqsy oinady. Şeberlıgı myqty eken. Bızdıŋ tarihymyzdy, tarihi qūndylyqtarymyzdy qazırgı taŋda halyq arasynda keŋırek därıpteuımız kerek. Keibıreuler qazaqtardyŋ öz tarihy, memleketı, elı bolmaǧan degen sözder aityp jür. Ol – bızdıŋ tarihymyzdy būrmalau. Önerlerıŋız qaşanda tabysty bolsyn. Barşaŋyzǧa amanşylyq tıleimın» dedı Memleket basşysy.
Prezident teatr ūjymyna şyǧarmaşylyq tabys tılep, öner ordasyna ūlttyq märtebe beru jönınde şeşım qabyldaǧanyn aitty. Tiıstı Jarlyq qazan aiynda Respublika künı qarsaŋynda jariialanady.
