Q.Quanyşbaev atyndaǧy Qazaq memlekettık akademiialyq muzykalyq drama teatrynda asa körnektı memleket jäne qoǧam qairatkerı, qazaq keŋes ädebietınıŋ negızın qalauşylardyŋ bırı – Säken Seifullinnıŋ 125 jyldyǧyna arnalǧan «Qairatker aqyn» ädebi-sazdy keş pen körme öttı. Şara Qanat Jünısovtıŋ «Säken-Sūŋqar» dramasymen tüiındeldı.
Atalmyş teatr men Säken Seifullin muzeiı bırlesıp ūiymdastyrǧan şarada memleket jäne qoǧam qairatkerı Oralbai Äbdıkärımov tūlǧa mereitoiy biyl elımızde keŋınen atalyp ötıp kele jatqanyn aitty. Sonyŋ ışınde Nūr-Sūltan men Qaraǧandy qalalarynda konferensiialar, Jaŋaarqa audanynda dübırlegen toi öttı. Tıptı elımızdıŋ şekarasynan asyp, Türkiianyŋ Ankara şaharynda ataldy. Türksoi ūiymy Iliias, Beiımbet, Säkendı bölıp-jarmai, bauyrlas elde ūlyqtaluyna mūryndyq boldy.
Säken Seifullin muzeiı de qarap otyrmady. Muzei direktory, aqyn, Memlekettık syilyqtyŋ laureaty Nesıpbek Aitūly mädeni oşaq ötkızgen şaralarǧa toqtalyp, tūlǧa esımın ardaqtau aldaǧy uaqytta da jalǧasa beretındıgın jetkızdı.
Nūr-Sūltan qalasy Mädeniet jäne sport basqarmasynyŋ basşysy Nūrlan Syzdyqov Säkendei ardaqty tūlǧadan ülgı-önege aluǧa şaqyrsa, Q.Quanyşbaev atyndaǧy Qazaq memlekettık akademiialyq muzykalyq drama teatrynyŋ direktory Ashat Maemirov osy şaranyŋ maŋyzdylyǧyn atap öttı.
Säkendı ülgı tūtyp, erekşe qūrmetteitın aqyn, änşı, akter, dramaturg Qanat Jünısov tūlǧanyŋ ūlt üşın atqarǧan eŋbegıne toqtalyp, oǧan arnaǧan öleŋın oqydy. Belgılı änşı, ūstaz, Qazaqstannyŋ eŋbek sıŋırgen ärtısı Qapaş Qūlyşeva Säkennıŋ änderıne saldy. Jas aktrisa Aqjan Qanatqyzy «Aqqudyŋ aiyryluy» poemasynan üzındı oqydy. Osylaişa Säken aty taǧy bır asqaqtady.
