Qytai Halyq Respublikasynan jaiau şyqqan Esbol Asqarūly Astanaǧa jettı. 60 künde 3000 şaqyrymdy jaiau jürıp kelgen marafonşyny elorda tūrǧyndary men qonaqtary qarsy aldy.
Astananyŋ töl qūrdasy Qytaidyŋ Manas audanynan 1 mamyrda jaiau jolǧa şyqqan edı. Ekı aiǧa sozylǧan saparǧa ol 4 jyl daiyndaldy. Sol uaqyt ışınde ol kündelıktı 15-20 şaqyrym jügırudı ädetke ainaldyrdy. Maqsaty – qazaq-qytai dostyǧyn älemge äigıleu.
Marafonşymen kezdesu barysynda Almaty audany äkımınıŋ orynbasary Nūrmat Abdraimov oǧan alǧys hat tabystady.
«Euraziianyŋ törındegı Qazaqstannyŋ bas qalasy – Astananyŋ 25 jyldyǧy qarsaŋynda döŋgelengen dünienıŋ jüzın jaiau aralap, marafondy elordamyzda sättı aiaqtauyŋyzben şyn jürekten qūttyqtaimyn! Bügıngı taŋda 1,5 millionǧa juyq tūrǧyny bar, qarqyndy damyp kele jatqan elorda künı merekesıne orai Astanaǧa at basyn tıreuıŋız äuelı josparlanǧan joldyŋ mejesıne jetıp, qazaǧymyzdyŋ qaisar qasietın nasihattaudaǧy ızgı nietıŋızge ystyq yqylasymyzdy bıldıremız» delıngen alǧys hatta.
Keiın qala tūrǧyndary men qonaqtary marafonşynyŋ iyǧyna şapan japty.
Esbol būl saparyn elordanyŋ tuǧan künıne arnady. Bala kezden bergı armany «Bäiterektı» köru edı. Bolaşaǧyn da Qazaqstanmen bailanystyrǧysy keledı. Käsıp aşyp, el damuyna üles qossam deidı.
«Atajūrtqa saǧynyşymyz erekşe. Jol boiy Qazaqstannyŋ körıktı jerlerın, tarihi oryndaryn suretke tüsırıp, äleumettık jelılerge salyp otyrdym. Olardy Qytaidaǧy qandastarymyz körıp, jaqyn tanysty. Osynda jinalǧan qauymǧa alǧys aitamyn. Menı qūşaq jaia qarsy alyp, jyly lebızın bıldırıp jatyr» dedı Esbol Asqarūly.
