ELIMIZDE 1 ŞILDEDEN BASTAP MINDETTI MEDİSİNALYQ SAQTANDYRU JÜIESI ENGIZILGELI OTYR. ENDI AZAMATTAR ATALǦAN QORǦA AQŞA AUDARYP, QAJETTI EM-DOMYN AQYLY TÜRDE ALATYN BOLADY. ALAIDA BALALARDAN BASTAP ZEINETKERLERGE DEIINGI ÄRTÜRLI SANATTAǦY ADAMDARǦA BŪRYNǦYDAI TEGIN MEDİSİNALYQ KÖMEK KÖRSETILE BEREDI. AL JŪMYS ISTEUGE JARAMDY JANDAR JYL SAIYN 17 MYŊ TEŊGE KÖLEMINDEGI QARJYNY ATALǦAN QORǦA AUDARUǦA MINDETTI.
Juyrda ötken Ükımet otyrysynda Premer-ministr Baqytjan Saǧyntaev 1 şıldeden bastap mındettı äleumettık medisinalyq saqtandyru qory jüiesı engızıletının aitqan bolatyn. Mäselen, «Azamattarǧa arnalǧan ükımet» Memlekettık korporasiiasy arqyly elektrondy täsılmen tırkelıp, öz märtebeŋdı anyqtauǧa jeŋıldık jasalyp otyr. Öitkenı Baqytjan Äbdırūly azamattardy uaqytşa tırkeu kezınde oryn alǧan jaǧdaidyŋ qaitalanuyna jol bermeudı, iaǧni halyqty dürlıktırmeudı tapsyrdy. Osyǧan orai, jauapty ministrlıkterge Memlekettık korporasiiamen bırlesıp, azamattardyŋ atalǧan qyzmettı alu üderısın jeŋıldetu şaralaryn qabyldau tapsyryldy.
Baqytjan Saǧyntaevtyŋ mındettı äleumettık medisinalyq saqtandyru qoryna bailanysty aldyn ala saqtyq tanytuy tegın emes. Sebebı būǧan deiın azamattardyŋ tūrǧylyqty mekenjaiy boiynşa tırkeluı qoǧamda dürbeleŋ tudyrǧan bolatyn. Däl sol siiaqty mındettı äleumettık medisinalyq saqtandyru qorynan da şu şyǧyp ketuı äbden mümkın. Sondyqtan da Ükımet basşysynyŋ būǧan deiıngı ketken qatelıkten sabaq alu kerek dep alaŋdauy tegın emes. Öitkenı qoǧamda būl bastamany qoldauşylar da, qarsylar da barşylyq. Mäselen, äleumettanuşy Äbdıjälel Bäkırdıŋ aituynşa, Ükımet mındettı äleumettık medisinalyq saqtandyru qoryn qarjylyq daǧdarysqa bailanysty amalsyzdan qūryp otyr. Sondai-aq, ol Ükımet qarapaiym halyqtyŋ qaltasynan aqşa almai-aq, medisinalyq kömektı tegın körsete beru kerek edı degen pıkırde.
– Azyq-tülıktıŋ baǧasy qymbattap jatqan kezde mındettı äleumettık medisinalyq saqtandyru qoryna aqşa audaru jyǧylǧanǧa jūdyryq bolyp otyr. Ökınışke qarai, elımızdıŋ medisinalyq salasynda onsyz da «ättegen-ailar» köp. Mäselen, bügınde emhanalarda tegın em alatyn nauqastarǧa därıgerler dūrys qaramaidy. Al aqyly bölımge jatsaŋyz, därıgerler erekşe qūrmetpen qyzmet körsetedı. Sonda aqşasy joq qarapaiym azamattar adam emes pe? Şyny kerek, därıgerler nauqastyŋ aqşasy bar nemese joq ekenıne qatty köŋıl böledı. Al mındettı äleumettık medisinalyq saqtandyru qorynan keiın därıgerlerdıŋ qyzmet körsetu sapasy jaqsarady degenge kümänım bar, – deidı ol.
Alaida medisina salasynyŋ mamandary saqtandyru qorynan ülken ümıt kütıp otyrǧanyn jasyrmaidy. Mäselen №7 qalalyq emhananyŋ bas därıgerı Aigül Quanyşevanyŋ aituynşa, atalǧan qor saladaǧy qordalanǧan mäselelerdı şeşedı.
– Memleketımızdıŋ är azamaty mındettı äleumettık medisinalyq saqtandyru arqyly Qazaqstan aumaǧynda özı taŋdaǧan kez kelgen emhanada medisinalyq kömek ala alady. Bekıtılgen halyq tırkelımıne säikes, bızdıŋ emhananyŋ qyzmet körsetu aumaǧynda 13 myŋnan astam halyq äleumettık märtebesız tırkeldı. Bır ai ışınde tūrǧyndardyŋ äleumettık märtebesın anyqtau boiynşa jūmystar jürgızıldı. Jalpy, medisinalyq qyzmetkerler mındettı äleumettık medisinalyq saqtandyru jüiesın engızuden köptegen paida köredı. Eŋ bırınşı, därıgerlerdıŋ eŋbekaqysy köterılıp, olardyŋ bılıktılıgı artady. Sondai-aq, medisinalyq tehnikalar jaŋartylyp, jūmys ornynda oqytuǧa mümkındık tuady, – deidı ol.
Astana qalasynyŋ Jūmyspen qamtu ortalyǧy elorda äkımdıgınıŋ qoldauymen mındettı medisinalyq saqtandyru qorynyŋ şarttaryn tüsındıru boiynşa jappai şara ötkızıp jatyr. Atalǧan ortalyq elordadaǧy ırı bazarlarda bolyp, 1000-ǧa juyq azamattan saualnama jinaǧan. Alaida bır baiqaǧanymyz, bylaiǧy jūrttyŋ atalǧan qor turaly mälımetı şamaly siiaqty. Öitkenı ortalyqtyŋ saualnamasyna qyzyǧuşylyq tanytyp otyrǧan azamattardyŋ qatary az bolyp otyr. Bır qyzyǧy, «Bırınşı bailyq – densaulyq» dep tüsıngen jūrttyŋ būl mäselege samarqau qarauy tüsınıksız.
