Qalada kölık köp. Esesıne avtotūraq tapşy. Būl mäselenı şeşudıŋ bır joly retınde qaŋtar aiynan bastap «Nūrjol» jelekjoly boiynda aqyly kölık tūraqtary jūmys ıstei bastady. Degenmen, jürgızuşılerdıŋ köŋılın küptı qylǧan jait joq emes.
Mäselen, «Nūrsaia-2» tūrǧyn üi keşenınıŋ Türkıstan köşesı boiynda jaǧalai avtotūraq bar. Aqyly tūraq ekenın aiǧaqtaityn arnauly belgıler de qoiylǧan. Bıraq kölık jürgızuşılerı däl osy jerde qatelesedı.
«Mäselen, aqyly tūraq belgısıne qarap, öz kölıgımdı qoiyp kettım. Artynşa jol polisiiasynyŋ qyzmetkerı keldı. Ol mügedekterge arnalǧan orynǧa qoiǧanymdy aityp, aiyppūl jazyp berdı. Aqyly tūraqqa qoiǧanym üşın bır, baiqamai mügedekterdıŋ ornyna qoiǧanym üşın ekı tölegen jaiym bar. Ne sebeptı arnauly oryndy sary syzyqpen syzyp nemese belgını däl sol tūraqtyŋ aldyna emes, trotuarǧa ornatqanyn tüsınbedım» deidı jürgızuşı Erjan Nūrkeev. Aita keteiık, bügınde mügedekterge arnalǧan orynǧa kölık qoiǧan üşın salynatyn aiyppūl kölemı 10 AEK, iaǧni 24 050 teŋgenı qūraidy.
Özımız de baiqaǧandai, «Nūrjol» jelekjolyndaǧy basqa aqyly tūraqtarda mügedekter ornyna arnauly belgıden bölek, sary jolaqpen taiǧa taŋba basqandai etıp syzyp qoiǧan. Halyq, äsırese mügedekter köp keletın Jūmyspen qamtu jäne äleumettık baǧdarlamalar basqarmasy aldyna kelgende būl syzyq nege syzylmai qalǧanyn özımız de tüsınbedık.
«Bügın men de kölıgımdı qoidym. Bıraq mügedekterge arnalǧan oryn ekenın ǧimarattan şyqqanda bır-aq bıldım. Sonda mügedekterdıŋ orny 8 metr degen belgıge qarap, öz aiaǧymyzben ölşeuımız kerek pe? Amalsyzdan jol polisiiasynyŋ qyzmetkerı kelmei tūryp, dereu kölıgımdı alyp ketuge mäjbür boldym» deidı Bekjan Halyqov esımdı jürgızuşı.
Mäselenıŋ anyq-qanyǧyn bılu maqsatynda «Astana qalasynyŋ tūraq keŋıstıgın basqaru» jobasynyŋ elorda tūrǧyndary men qonaqtaryna arnalǧan Call-ortalyǧyna – 88000802888 qoŋyrau şaldyq. Özın Madina Ospanova dep tanystyrǧan operator jol belgılerın ornatu qala äkımdıgımen bırlesıp jasalatynyn ärı belgılengen standartqa sai ekenın alǧa tartty. Eger belgılengen standartqa sai bolsa, nege mügedekterge arnalǧan basqa oryndar qosymşa sary jolaqpen syzylǧan? Mäselen, Türkıstan köşesınıŋ arǧy betınde sary jolaq salynǧan. Ökınışke qarai, tolyq jauap ala almaǧandyqtan, Astana qalasynyŋ tūraq keŋıstıgın basqaru mekemesıne jäne Astana qalasy Işkı ıster basqarmasyna arnaiy sūrau saldyq.
Bälkım, sary jolaq nege syzylmaǧanyn resmi türde tüsındırıp beretın şyǧar…
