Elordada «EKSPO-2017» halyqaralyq mamandandyrylǧan körme aiasynda ötıp jatqan Qaraǧandy oblysynyŋ mädeni künderı şeŋberınde «Astana» konsert zalynda «Saryarqa – ūly dala örkenietınıŋ altyn besıgı» körmesı aşylyp, «Sälemı Saryarqanyŋ än bop ūşqan» konsertı ūiymdastyryldy.
Körmege Qaraǧandy oblystyq tarihi-ölketanu mūrajaiy men oblystyq beineleu önerı muzeiındegı jädıgerler men kartinalar, kıtaptar, jalpy alǧanda ölke tarihynan syr şertetın, bügıngı tynysynan habar beretın önımder qoiyldy. Olardyŋ arasynda Ūlytaudaǧy Alaşa han, Joşy han kesenelerınıŋ jäne Aiaqqamyr, Beskümbez mazarlarynyŋ maketterı, Altynşoqydaǧy Aqsaq Temırdıŋ tas jazuynyŋ, Taŋbalytastaǧy qazaq rulary taŋbalarynyŋ, 2010 jyly Qarqaraly audanyndaǧy «Taldy-2» qorymynan arheolog Arman Beisenov tapqan altyn adamnyŋ köşırmelerı nazardy erekşe audartady.
«Astanaǧa üş jüzden astam jädıger äkelındı. Būl jädıgerler ūly tarihymyz, köşpendılerdıŋ tarihy, tarihta ötken tūlǧalar ömırınen syr tartady. Mäselen, Qazdauysty Qazybek bi, Älihan Bökeihan, Jaqyp Aqbaev, Tättımbet, Mädi Bäpiūly turaly bıraz mälımetterdı jetkızdık. Sondai-aq, oblysymyzda jüzege asyp jatqan äleumettık jobalardan habar beretın aqparatty da qamtydyq» deidı Qaraǧandy oblystyq tarihi-ölketanu mūrajaiynyŋ direktory Erjan Nūrmaǧambetov.
Sonyŋ ışınde noqtaǧa basy syimai ketken aqyn, halyq kompozitory Mädi Bäpiūlynyŋ nasybai ükkışı men şoqpary bız üşın jaŋalyq boldy. Mūrajai direktorynyŋ aituynşa, Mädi özınıŋ būl zattaryn atqosşysy Äkbar Smaiylūlyna berıp ketken. Äkbar aqsaqal toqsan jastan asyp, ömırden öterınde qyzy Zaǧiraşqa būl jädıgerdı auylyna küieu bala bolyp keletın Qūdaibergen Bäkeevke tapsyrudy amanattaǧan. Qarqaraly audanynyŋ qūrmettı azamaty Qūdaibergen Bäkeev būl jädıgerdı oblystyq tarihi-ölketanu mūrajaiyna byltyr öz qolymen tapsyrdy.
Al beineleu önerı muzeiıne kelsek, qylqalam şeberı Raiymqūl Esırkeev (1921-1980) 1963 jyly kestelegen Doskei aqyn men änşı Qali Baijanovtyŋ portretterı, Nūrlan Däurenbenkov salǧan qazaqtyŋ tūŋǧyş ǧaryşkerı Toqtar Äubäkırovtıŋ suretı, Qazaqstannyŋ halyq suretşılerı Äubäkır Ysmaiylov pen Aişa Ǧalymbaevanyŋ tuyndylary, taiauda dünieden ozǧan Qazaqstannyŋ halyq suretşısı Sabyr Mämbeevtıŋ osydan tura 50 jyl būryn kestelengen «Qyzǧylttaǧy etiud» kartinasy janynda bıraz aialdadyq.
Al konsert zalynyŋ sahnasynda öner körsetken Tättımbet atyndaǧy halyq aspaptar orkestrı men Q. Baijanov atyndaǧy konserttık bırlestık, Qūrmaş Ybyşev, Erjan Bazarbekov, Qairat Äbeuov, Serjan Mūsaiyn, Gülmira Tapai, Merueş Başai, t.b. önerpazdar qūlaq qūryşyn qandyrdy.
Amanǧali QALJANOV
