…Köpen kökem qai kezde de şyndyqty şyrqyratyp aityp keldı. Köpennıŋ tılıp tüsetın almas qylyştai ötkır satirasyna külıp otyryp, kürsınıp te qalatynymyz sol, synǧa qūrylǧan syqaqtyŋ tübınde aşy zapyran men zary bar eldıŋ şerlı mäselesı jatar edı. Memlekettık tıldıŋ auyr jaǧdaiyn «Jüz jyldyq soǧys» atty maqalasynda jüz jyldan berı memlekettık tılın törıne şyǧara almai kele jatqan qazaq bilıgın aşy sarkazmmen, ötkır tılmen tüirep edı.
Belgılı memleket jäne qoǧam qairatkerı, ruhaniiatqa qamqor, ruhy biık ısker azamat İslam Äbış Su komitetınıŋ töraǧasy bolyp tūrǧanda qazynanyŋ trillionyn qorǧap qalǧany üşın jazyqsyz jala jabylyp, türmege tüskende, Köpen aǧamyz sotyna baryp qatysyp jürdı. Jurnalisterge sūhbat berdı. Būryn İsekeŋe künıne kemınde üş mezgıl telefon soǧyp, saulyǧyn sūrap tūratyn keibır «dostary» qarasyn körsetpei ketkende, Köpen aǧamyzdyŋ sot otyrystaryna qatysyp, İslam ınısınıŋ jaǧdaiyn sūrap, sottyŋ ädıl ötuın talap etuı ülken azamattyq edı. Mūndai erkındık tanytqan ısı üşın «Nūr Otan» partiiasynyŋ müşesı, bır orysşalau partiia şeneunıgı narazylyq tanytyp, eskertu jasapty. Söitse, sözden tosylyp körmegen Köpekeŋ qynaptan qylyş suyrǧandai: «Men İslam ınımnıŋ sotyna «Nūr-Otan» emes, «bratan» bop baryp jürmın» dep, auzyna qūm qūiyp ketıptı…
Köpen kökemız ana jyly Türkıstan oblysy Maqtaral audanyndaǧy Özbekstannyŋ Sardoba suqoimasy jaryluynan suǧa ketken üilerdı baryp aralady. Osy öŋırden şyqqan astanalyq zeinetkerlerdıŋ atynan «Üilerıŋız jaryq bolsyn!» dep jaŋadan salynǧan on üige «Jaqsy yrym ǧoi» dep on liustra ılıp kettı. Jürgen jerın äzılge qaryq qylyp, külkısımen jaryq qylyp jüretın kökemız solai ısımen de jaryq şaşyp ketken edı maqtaraldyqtarǧa.
Köpen Ämırbek kökemız 70 jasyn toilaityn kezde 2020 jyly pandemiia deitın päleket bastalyp kettı. Qasqa men jaisaŋdy qynadai qyrǧan ol qyrǧynnan aman ötken edı… Şymkent arnaiy şaqyrǧanda osy jaman keseldıŋ kesırınen bara almai qaldy. Tek Aqtöbe oblysynyŋ şaqyruymen bır top qalamgermen bırge elmen jüzdesıp keldı. Sodan soŋ Seiıt Kenjeahmetovty eske alu şarasyna Torǧaiǧa baryp qaitypty.
Soŋǧy demın jinap elmen kezdesuı eken ǧoi būl. Boi jazǧany bolar…
Auruhanada jatsam da, estıp jatyp, qalai şydaisyŋ, ekı künnen keiın özıme jüregıme kürdelı ota jasaitynyna qaramai, bas därıgerden sūranyp, Altynbai bauyrymdy şaqyryp, Köpen kökemızdıŋ şaŋyraǧyna kırıp şyqtyq. Inılerı Bazarbek, Şükır Şahai, Kenje Jūmaǧūlovtar bar eken. Esın bılıp, söilep jatypty. «Ara» jurnalyn şyǧaru kerek, qaǧazǧa şyǧaryp qoiǧyn, oquym kerek» deptı jeŋgeige. Qairan, bızdıŋ kökeler, soŋǧy demı qalǧanşa mındetıne adal bolǧan…
Köpen El aǧasy edı! Satiranyŋ sardary, körnektı Köpenın el eşqaşan ūmytpaidy.
Qazybek İSA, aqyn, QR Parlamentı Mäjılısı deputaty
